ਉੱਤਰੀ ਗਾਜ਼ਾ ''ਚ ਸਕੂਲ ''ਤੇ ਇਜ਼ਰਾਇਲ ਵੱਲੋਂ ਹਵਾਈ ਹਮਲੇ, 11 ਲੋਕਾਂ ਦੀ ਮੌਤ

ਅਲ-ਬਲਾਹ (ਗਾਜ਼ਾ ਪੱਟੀ) : ਗਾਜ਼ਾ ਦੇ ਉੱਤਰੀ ਖੇਤਰ 'ਚ ਇੱਕ ਸਕੂਲ 'ਤੇ ਇਜ਼ਰਾਈਲੀ ਹਮਲੇ 'ਚ ਘੱਟ ਤੋਂ ਘੱਟ 11 ਲੋਕਾਂ ਦੀ ਮੌਤ ਹੋ ਗਈ ਅਤੇ 22 ਲੋਕ ਜ਼ਖਮੀ ਹੋ ਗਏ। ਗਾਜ਼ਾ ਦੇ ਸਿਹਤ ਮੰਤਰਾਲੇ ਨੇ ਇਹ ਜਾਣਕਾਰੀ ਦਿੱਤੀ। ਇਸ ਹਮਲੇ 'ਚ ਮਾਰੇ ਗਏ ਲੋਕਾਂ 'ਚ ਔਰਤਾਂ ਅਤੇ ਬੱਚੇ ਵੀ ਸ਼ਾਮਲ ਹਨ। ਉੱਤਰੀ ਗਾਜ਼ਾ 'ਚ ਸਥਿਤ ਇਸ ਸਕੂਲ 'ਚ ਹਜ਼ਾਰਾਂ ਵਿਸਥਾਪਿਤ ਫਲਸਤੀਨੀਆਂ ਨੇ ਸ਼ਰਨ ਲਈ ਹੈ। 

ਇਜ਼ਰਾਈਲੀ ਫੌਜ ਨੇ ਪੁਸ਼ਟੀ ਕੀਤੀ ਹੈ ਕਿ ਉਸ ਨੇ ਜਬਾਲੀਆ ਸ਼ਰਨਾਰਥੀ ਕੈਂਪ ਦੇ ਇਕ ਸਕੂਲ 'ਤੇ ਹਮਾਸ ਦੇ ਅੱਤਵਾਦੀਆਂ ਨੂੰ ਨਿਸ਼ਾਨਾ ਬਣਾਉਣ ਲਈ ਹਮਲਾ ਕੀਤਾ ਸੀ। ਉਨ੍ਹਾਂ ਕਿਹਾ ਕਿ ਅੱਤਵਾਦੀ ਇਜ਼ਰਾਇਲੀ ਸੈਨਿਕਾਂ 'ਤੇ ਹਮਲਾ ਕਰਨ ਦੀ ਯੋਜਨਾ ਬਣਾ ਰਹੇ ਸਨ। ਇਸ ਦਾਅਵੇ ਦੀ ਸੁਤੰਤਰ ਤੌਰ 'ਤੇ ਪੁਸ਼ਟੀ ਨਹੀਂ ਕੀਤੀ ਜਾ ਸਕੀ। ਗਾਜ਼ਾ ਦੇ ਸਿਹਤ ਮੰਤਰਾਲੇ ਨੇ ਤੁਰੰਤ ਇਹ ਨਹੀਂ ਦੱਸਿਆ ਕਿ ਮਰਨ ਵਾਲਿਆਂ ਵਿੱਚ ਕਿੰਨੀਆਂ ਔਰਤਾਂ ਅਤੇ ਬੱਚੇ ਸਨ। ਇਜ਼ਰਾਈਲੀ ਫੌਜ ਨੇ ਵਾਰ-ਵਾਰ ਸਕੂਲਾਂ 'ਤੇ ਹਮਲੇ ਕੀਤੇ ਹਨ ਅਤੇ ਦਾਅਵਾ ਕੀਤਾ ਹੈ ਕਿ ਹਮਾਸ ਦੇ ਲੜਾਕੇ ਸਾਡੇ 'ਤੇ ਹਮਲਿਆਂ ਦੀ ਯੋਜਨਾ ਬਣਾਉਣ ਲਈ ਸਕੂਲਾਂ ਨੂੰ 'ਕਮਾਂਡ ਸੈਂਟਰ' ਵਜੋਂ ਵਰਤਦੇ ਹਨ। ਸੰਯੁਕਤ ਰਾਸ਼ਟਰ ਨੇ ਕਿਹਾ ਕਿ ਇਜ਼ਰਾਇਲੀ ਹਮਲਿਆਂ 'ਚ ਵੱਡੀ ਗਿਣਤੀ 'ਚ ਲੋਕ ਮਾਰੇ ਗਏ ਹਨ। 

ਇਜ਼ਰਾਈਲੀ ਬੰਬਾਰੀ ਅਤੇ ਹਮਲਿਆਂ ਕਾਰਨ ਆਪਣੇ ਘਰ ਛੱਡ ਕੇ ਭੱਜਣ ਵਾਲੇ ਹਜ਼ਾਰਾਂ ਫਲਸਤੀਨੀ ਗਾਜ਼ਾ ਦੇ ਸਕੂਲਾਂ 'ਚ ਰਹਿ ਰਹੇ ਹਨ। ਗਾਜ਼ਾ ਦੇ 2.4 ਮਿਲੀਅਨ ਲੋਕਾਂ ਵਿੱਚੋਂ 1.9 ਮਿਲੀਅਨ ਤੋਂ ਵੱਧ ਲੋਕ ਲਗਭਗ ਇੱਕ ਸਾਲ ਤੋਂ ਜਾਰੀ ਯੁੱਧ ਕਾਰਨ ਬੇਘਰ ਹੋ ਗਏ ਹਨ। ਸਿਹਤ ਮੰਤਰਾਲੇ ਵੱਲੋਂ ਸ਼ਨੀਵਾਰ ਨੂੰ ਜਾਰੀ ਕੀਤੇ ਗਏ ਨਵੇਂ ਅੰਕੜਿਆਂ ਮੁਤਾਬਕ ਗਾਜ਼ਾ 'ਚ ਇਜ਼ਰਾਇਲੀ ਹਮਲੇ 'ਚ ਹੁਣ ਤੱਕ 41,500 ਤੋਂ ਜ਼ਿਆਦਾ ਫਲਸਤੀਨੀ ਮਾਰੇ ਜਾ ਚੁੱਕੇ ਹਨ ਅਤੇ 96,000 ਤੋਂ ਜ਼ਿਆਦਾ ਜ਼ਖਮੀ ਹੋਏ ਹਨ।