ਬੱਚਿਆਂ ਦੀ ਸਿਹਤ ਹੀ ਨਹੀਂ, ਦੇਸ਼ ਦੀ ਇਕਾਨਮੀ ਲਈ ਵੀ ਖਤਰਾ ਹੈ ਮਾਂ ਦਾ ਦੁੱਧ ਨਾ ਪਿਲਾਉਣਾ

ਨਵੀਂ ਦਿੱਲੀ— ਜੇ ਤੁਹਾਨੂੰ ਇਹ ਲੱਗਦਾ ਹੈ ਕਿ ਮਾਂ ਦਾ ਦੁੱਧ ਸਿਰਫ ਬੱਚੇ ਦੀ ਸਿਹਤ ਲਈ ਜ਼ਰੂਰੀ ਹੈ ਤਾਂ ਤੁਸੀਂ ਗਲਤ ਹੋ। ਮਾਂ ਦਾ ਦੁੱਧ ਸਾਡੇ ਦੇਸ਼ ਦੀ ਅਰਥ-ਵਿਵਸਥਾ ਦੀ ਸਿਹਤ ਨਾਲ ਵੀ ਜੁੜਿਆ ਹੋਇਆ ਹੈ। ਸੰਯੁਕਤ ਰਾਸ਼ਟਰ ਦੀ ਇਕ ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਭਾਰਤ ਵਿਚ ਹਰ ਸਾਲ ਲਗਭਗ ਇਕ ਲੱਖ ਬੱਚੇ ਅਜਿਹੀਆਂ ਬੀਮਾਰੀਆਂ ਨਾਲ ਮਰਦੇ ਹਨ, ਜਿਨ੍ਹਾਂ ਨੂੰ ਮਾਂ ਦਾ ਦੁੱਧ ਪਿਲਾਉਣ ਨਾਲ ਰੋਕਿਆ ਜਾ ਸਕਦਾ ਸੀ। ਇਸਦੇ ਨਾਲ ਹੀ ਰਿਪੋਰਟ ਵਿਚ ਇਹ ਵੀ ਕਿਹਾ ਗਿਆ ਹੈ ਕਿ ਮਾਵਾਂ ਵੱਲੋਂ ਘੱਟ ਮਾਤਰਾ ਵਿਚ ਬੱਚਿਆਂ ਨੂੰ ਦੁੱਧ ਪਿਲਾਉਣ ਕਾਰਨ ਹੋਣ ਵਾਲੀਆਂ ਮੌਤਾਂ ਅਤੇ 
ਹੋਰ ਨੁਕਸਾਨਾਂ ਨਾਲ ਦੇਸ਼ ਦੀ ਅਰਥਵਿਵਸਥਾ ਨੂੰ 14 ਅਰਬ ਡਾਲਰ ਤੱਕ ਦਾ ਨੁਕਸਾਨ ਪਹੁੰਚ ਸਕਦਾ ਹੈ। 
ਯੂਨੀਸੇਫ ਅਤੇ ਵਿਸ਼ਵ ਸਿਹਤ ਸੰਗਠਨ ਨੇ ਗਲੋਬਲ ਬ੍ਰੈਸਟ ਫੀਡਿੰਗ ਕਲੈਕਟਿਵ ਨਾਲ ਮਿਲ ਕੇ ਇਕ ਨਵੀਂ ਰਿਪੋਰਟ ਗਲੋਬਲ ਬ੍ਰੈਸਟ ਫੀਡਿੰਗ ਸਕੋਰ ਕਾਰਡ ਜਾਰੀ ਕੀਤਾ ਹੈ। ਇਸ ਵਿਚ ਕਿਹਾ ਗਿਆ ਹੈ ਕਿ ਮਾਂ ਦਾ ਦੁੱਧ ਪਿਲਾਉਣ ਨਾਲ ਨਾ ਸਿਰਫ ਡਾਇਰੀਆ ਅਤੇ ਨਿਮੋਨੀਆ ਤੋਂ ਬਚਣ ਵਿਚ ਮਦਦ ਮਿਲਦੀ ਹੈ, ਸਗੋਂ ਮਾਵਾਂ ਲਈ ਬੱਚੇਦਾਨੀ ਦੇ ਕੈਂਸਰ ਅਤੇ ਛਾਤੀਆਂ ਦੇ ਕੈਂਸਰ ਦੇ ਖਤਰੇ ਵੀ ਘੱਟ ਹੋ ਜਾਂਦੇ ਹਨ। ਚੀਨ, ਭਾਰਤ, ਨਾਈਜੀਰੀਆ, ਮੈਕਸੀਕੋ ਅਤੇ ਇੰਡੋਨੇਸ਼ੀਆ ਵਿਚ ਮਾਵਾਂ ਵਲੋਂ ਘੱਟ ਮਾਤਰਾ ਵਿਚ ਦੁੱਧ ਪਿਲਾਉਣ ਕਾਰਨ ਹਰ ਸਾਲ 2.36 ਲੱਖ ਬੱਚਿਆਂ ਦੀ ਮੌਤ ਹੋ ਜਾਂਦੀ ਹੈ ਅਤੇ ਇਸ ਨਾਲ ਪ੍ਰਤੀ ਸਾਲ ਪਹੁੰਚਣ ਵਾਲਾ ਨੁਕਸਾਨ ਲਗਭਗ 119 ਅਰਬ ਡਾਲਰ ਦਾ ਹੈ।