ਸ਼ਓਮੀ ਦਾ ਗਾਹਕਾਂ ਨੂੰ ਝਟਕਾ, ਰੈੱਡਮੀ ਨੋਟ-10 ਦੀ ਕੀਮਤ 'ਚ ਕੀਤਾ ਵਾਧਾ

ਨਵੀਂ ਦਿੱਲੀ- ਸ਼ਓਮੀ ਨੇ ਇਸ ਸਾਲ ਰੈੱਡਮੀ ਨੋਟ-10 ਸੀਰੀਜ਼ ਦੇ ਫੋਨ ਲਾਂਚ ਕੀਤੇ ਹਨ। ਲਾਂਚ ਤੋਂ ਲੈ ਕੇ ਹੁਣ ਤੱਕ ਰੈੱਡਮੀ ਨੋਟ-10 ਸੀਰੀਜ਼ ਦੇ ਮਾਡਲਾਂ ਦੀ ਕੀਮਤ ਵਿਚ ਕਈ ਵਾਰ ਵਾਧਾ ਚੁੱਕਾ ਹੈ। ਅਪ੍ਰੈਲ ਵਿਚ ਕੰਪਨੀ ਨੇ ਰੈਡਮੀ ਨੋਟ-10 ਦੇ ਬੇਸ ਮਾਡਲ, ਜੂਨ ਵਿਚ ਰੈੱਡਮੀ ਨੋਟ-10 ਦੇ 6ਜੀਬੀ ਰੈਮ ਮਾਡਲ ਦੀ ਕੀਮਤ 500 ਰੁਪਏ ਵਧਾਈ ਸੀ।

ਇਸ ਤੋਂ ਇਲਾਵਾ ਰੈੱਡਮੀ ਨੋਟ-10 ਦੇ 4ਜੀਬੀ ਰੈਮ ਮਾਡਲ ਦੀ ਕੀਮਤ ਵੀ ਜੂਨ ਵਿਚ ਵਧਾਈ ਗਈ ਸੀ। ਹੁਣ ਇਕ ਵਾਰ ਰੈੱਡਮੀ ਨੋਟ-10 ਦੀ ਕੀਮਤ ਚੌਥੀ ਵਾਰ ਵਧਾ ਦਿੱਤੀ ਗਈ ਹੈ।

ਰਿਪੋਰਟਾਂ ਮੁਤਾਬਕ, ਸ਼ਓਮੀ ਨੇ ਰੈੱਡਮੀ ਨੋਟ-10 ਦੀ ਕੀਮਤ ਇਕ ਵਾਰ ਫਿਰ 500 ਰੁਪਏ ਵਧਾਈ ਦਿੱਤੀ ਹੈ। ਰੈਡਮੀ ਨੋਟ-10 ਦੀ ਕੀਮਤ ਵਿਚ ਵਾਧੇ ਤੋਂ ਇਲਾਵਾ ਰੈੱਡਮੀ ਨੋਟ-10ਟੀ 5ਜੀ ਦੀ ਕੀਮਤ ਵੀ ਇੰਨੀ ਹੀ ਵਧਾਈ ਗਈ ਹੈ। ਹੁਣ ਤੱਕ ਰੈੱਡਮੀ ਨੋਟ ਦਾ 4 ਜੀਬੀ ਰੈਮ ਮਾਡਲ 12,999 ਰੁਪਏ ਵਿਚ ਅਤੇ 6 ਜੀਬੀ ਰੈਮ ਵਾਲਾ 14,999 ਰੁਪਏ ਵਿਚ ਖਰੀਦਣ ਲਈ ਉਪਲਬਧ ਸੀ ਪਰ ਹੁਣ ਕੀਮਤ ਵਿਚ ਵਾਧੇ ਤੋਂ ਬਾਅਦ, ਇਸ ਦੇ 4 ਜੀਬੀ ਰੈਮ ਅਤੇ 64 ਜੀਬੀ ਸਟੋਰੇਜ ਵਾਲੇ ਫੋਨ ਦੀ ਕੀਮਤ 13,499 ਰੁਪਏ ਹੋ ਗਈ ਹੈ, ਜਦੋਂ ਕਿ 6 ਜੀਬੀ ਰੈਮ ਅਤੇ 128 ਜੀਬੀ ਸਟੋਰੇਜ ਦੀ ਕੀਮਤ 15,499 ਰੁਪਏ ਹੋ ਗਈ ਹੈ। ਫੋਨ ਨੂੰ ਨਵੀਂ ਕੀਮਤ ਦਨਾਲ ਸ਼ੀਓਮੀ ਦੀ ਵੈੱਬਸਾਈਟ ਅਤੇ ਐਮਾਜ਼ਾਨ ਇੰਡੀਆ 'ਤੇ ਲਿਸਟ ਕੀਤਾ ਗਿਆ ਹੈ।