Vodafone ਲਿਆਈ ਹੈ ਨਵਾਂ ''ਫਲੈਕਸ'' ਪਲਾਨ, ਰਿਚਾਰਜਾਂ ਤੋਂ ਮਿਲੇਗੀ ਮੁਕਤੀ

 

ਇਸ ਰੀਚਾਰਜ ਤਹਿਤ ਕੰਪਨੀ ਪੈਸਾ ਲੈ ਕੇ ਗਾਹਕਾਂ ਨੂੰ ਨਿਸ਼ਚਿਤ ਗਿਣਤੀ ''ਚ ਪੁਆਇੰਟ (ਫਲੈਕਸ) ਵੰਡੇਗੀ। ਇਸ ਤੋਂ ਬਾਅਦ ਕਿਸੇ ਗਾਹਕ ਵੱਲੋਂ ਕੀਤੇ ਜਾਣ ਵਾਲੇ ਕਾਲ, ਡਾਟਾ ਦੀ ਵਰਤੋਂ, ਐੱਸ. ਐੱਮ. ਐੱਸ., ਰੋਮਿੰਗ ਆਦਿ ਦਾ ਭੁਗਤਾਨ ਇਨ੍ਹਾਂ ਪੁਆਇੰਟ ਰਾਹੀਂ ਹੋਵੇਗਾ। ਇਸ ਰੀਚਾਰਜ ਦੀ ਵੈਧਤਾ 28 ਦਿਨ ਦੀ ਹੋਵੇਗੀ, ਜਿਸ ''ਚ ਥੋੜ੍ਹੀ ਫੀਸ ਚੁਕਾ ਕੇ ਵਾਧੂ ਪੁਆਇੰਟ ਜਾਂ ਇਸ ਦੀ  ਵੈਧਤਾ ਨੂੰ ਅੱਗੇ ਵਧਾਉਣ ਦੀ ਸੁਵਿਧਾ ਉਪਲੱਬਧ ਹੋਵੇਗੀ। 

 

ਵੋਡਾਫੋਨ ਨੇ ਇਸ ਸਕੀਮ ਦੀ ਸ਼ੁਰੂਆਤੀ ਕੀਮਤ 117 ਰੁਪਏ ਰੱਖੀ ਹੈ, ਜਿਸ ''ਚ ਉਹ 325 ਫਲੈਕਸ ਦੇ ਰਹੀ ਹੈ। ਇਸ ਤਹਿਤ ਇਕ ਮੈਗਾਬਾਈਟ ਇੰਟਰਨੈੱਟ (2ਜੀ, 3ਜੀ ਅਤੇ 4ਜੀ ''ਤੇ ਇਕੋ-ਜਿਹੀ ਦਰ) ਦੀ ਵਰਤੋਂ ਕਰਨ ''ਤੇ ਗਾਹਕ ਦੇ ਕੁੱਲ ਪੁਆਇੰਟ ''ਚੋਂ ਇਕ ਪੁਆਇੰਟ ਕੱਟ ਜਾਵੇਗਾ। ਇਹ ਦਰ ਇਕ ਐੱਸ. ਐੱਮ. ਐੱਸ. ਅਤੇ ਇਕ ਮਿੰਟ ਰੋਮਿੰਗ ''ਤੇ ਵੀ ਇਕੋ-ਜਿਹੀ ਰਹੇਗੀ। ਇਸੇ ਤਰ੍ਹਾਂ ਇਕ ਮਿੰਟ ਦੀ ਕੀਤੀ ਜਾਣ ਵਾਲੀ ਕਾਲ ਲਈ ਕੰਪਨੀ 2 ਫਲੈਕਸ ਪੁਆਇੰਟ ਕੱਟੇਗੀ, ਜੋ ਕਿ ਰੋਮਿੰਗ ''ਤੇ ਇਕ ਮਿੰਟ ਦੀ ਕਾਲ ਲਈ ਵੀ ਬਰਾਬਰ ਹੋਵੇਗੀ। ਕੰਪਨੀ ਨੇ 117 ਰੁਪਏ ਤੋਂ ਲੈ ਕੇ 395 ਰੁਪਏ ਤਕ ਦੇ ਰੀਚਾਰਜ ਬਦਲ ਪੇਸ਼ ਕੀਤੇ ਹਨ, ਜੋ ਕਿ ਖੇਤਰ ਦੇ ਹਿਸਾਬ ਨਾਲ ਥੋੜ੍ਹੇ ਹੋਰ ਹੋ ਸਕਦੇ ਹਨ। 

 

ਵੋਡਾਫੋਨ ਦੇ ਵਪਾਰਕ ਨਿਰਦੇਸ਼ਕ ਸੰਦੀਪ ਕਟਾਰੀਆ ਨੇ ਕਿਹਾ, ''ਸਾਡੇ ਜ਼ਿਆਦਾਤਰ ਗਾਹਕ ਪ੍ਰੀਪੇਡ ਸੇਵਾਵਾਂ ਦੀ ਵਰਤੋਂ ਕਰਦੇ ਹਨ ਅਤੇ ਉਨ੍ਹਾਂ ਨੂੰ ਵੱਖ-ਵੱਖ ਸੇਵਾਵਾਂ ਦਾ ਲਾਭ ਲੈਣ ਲਈ ਵੱਖ-ਵੱਖ ਰੀਚਾਰਜ ਕਰਵਾਉਣੇ ਹੁੰਦੇ ਹਨ। ਇਸ ਨੂੰ ਧਿਆਨ ''ਚ ਰੱਖਦੇ ਹੋਏ ਅਸੀਂ ਇਕ ਨਵਾਂ ਉਤਪਾਦ ''ਵੋਡਾਫੋਨ ਫਲੈਕਸ'' ਪੇਸ਼ ਕੀਤਾ ਹੈ, ਜਿਸ ''ਚ ਗਾਹਕਾਂ ਨੂੰ ਸਿਰਫ ਇਕ ਰੀਚਾਰਜ ਕਰਵਾਉਣਾ ਹੋਵੇਗਾ ਅਤੇ ਉਹ ਇੰਟਰਨੈੱਟ, ਕਾਲ, ਐੱਸ. ਐੱਮ. ਐੱਸ. ਅਤੇ ਰੋਮਿੰਗ ਆਦਿ ਸਾਰੀਆਂ ਸੇਵਾਵਾਂ ਦੀ ਵਰਤੋਂ ਕਰ ਸਕਣਗੇ। ਇਸ ਸਕੀਮ ਨਾਲ ਉਨ੍ਹਾਂ ਨੂੰ ਵੱਖ-ਵੱਖ ਰੀਚਾਰਜ ਕਰਵਾਉਣ ਤੋਂ ਮੁਕਤੀ ਮਿਲ ਜਾਵੇਗੀ ਅਤੇ ਇਹ 2ਜੀ, 3ਜੀ ਅਤੇ 4ਜੀ ਸਾਰੇ ਨੈੱਟਵਰਕਾਂ ''ਤੇ ਇਕ ਤੌਰ ''ਤੇ ਕੰਮ ਕਰੇਗਾ।''