ਪਤੀ ਰਾਜ ਕੁੰਦਰਾ ਦੇ ਜੇਲ੍ਹ ਤੋਂ ਰਿਹਾਅ ਹੋਣ ਤੋਂ ਬਾਅਦ ਸ਼ਿਲਪਾ ਨੇ ਪੋਸਟ ਸਾਂਝੀ ਕਰ ਆਖੀ ਇਹ ਗੱਲ

ਮੁੰਬਈ- ਬਾਲੀਵੁੱਡ ਅਦਾਕਾਰਾ ਸ਼ਿਲਪਾ ਸ਼ੈੱਟੀ ਦੀ ਜ਼ਿੰਦਗੀ ਦਾ ਤੂਫਾਨ ਉਸ ਸਮੇਂ ਰੁੱਕਿਆ ਜਦੋਂ ਉਸ ਦੇ ਪਤੀ ਰਾਜ ਕੁੰਦਰਾ ਨੂੰ ਬੇਲ ਮਿਲੀ। ਅਸ਼ਲੀਲ ਫਿਲਮਾਂ ਬਣਾਉਣ ਅਤੇ ਉਨ੍ਹਾਂ ਨੂੰ ਅਪਲੋਡ ਕਰਨ ਦੇ ਮਾਮਲੇ 'ਚ ਰਾਜ ਕੁੰਦਰਾ ਪਿਛਲੇ 2 ਮਹੀਨੇ ਤੋਂ ਜੇਲ੍ਹ ਦੀ ਹਵਾ ਖਾ ਰਹੇ ਸਨ। ਉਧਰ 21 ਸਤੰਬਰ ਨੂੰ ਰਾਜ ਕੁੰਦਰਾ ਜੇਲ੍ਹ ਤੋਂ ਰਿਹਾਅ ਹੋ ਕੇ ਪਰਿਵਾਰ ਨਾਲ ਵਾਪਸ ਆਏ ਹਨ। ਪਤੀ ਦੇ ਘਰ ਆਉਣ ਤੋਂ ਬਾਅਦ ਸ਼ਿਲਪਾ ਨੇ ਚੈਨ ਦਾ ਸਾਹ ਲਿਆ ਹੈ। ਚੁਣੌਤੀਆਂ ਦਾ ਸਾਹਮਣਾ ਕਰਨ ਤੋਂ ਬਾਅਦ ਹੁਣ ਹੌਲੀ-ਹੌਲੀ ਸ਼ਿਲਪਾ ਸ਼ੈੱਟੀ ਰਿਕਵਰ ਕਰ ਰਹੀ ਹੈ।

ਰਿਕਵਰੀ ਦੇ ਇਸ ਫੇਜ ਨੂੰ ਲੈ ਕੇ ਸ਼ਿਲਪਾ ਸ਼ੈੱਟੀ ਨੇ ਇੰਸਟਾ ਸਟੋਰੀ 'ਤੇ ਇਕ ਪਾਵਰਫੁੱਲ ਕੋਟ ਸ਼ੇਅਰ ਕੀਤਾ। ਸ਼ਿਲਪਾ ਨੇ ਇਕ ਕਿਤਾਬ ਦਾ ਪੇਜ ਸ਼ੇਅਰ ਕੀਤਾ ਹੈ ਜਿਸ 'ਚ ਲਿਖਿਆ ਹੈ ਕਿ ਅਸੀਂ ਸਾਰਿਆਂ ਨੇ ਸੁਣਿਆ ਹੈ ਕਿ ਪਰੇਸ਼ਾਨੀਆਂ ਸਾਨੂੰ ਮਜ਼ਬੂਤ ਬਣਾਉਂਦੀਆਂ ਹਨ। ਇਹ ਸੱਚ ਹੋ ਸਕਦਾ ਹੈ ਪਰ ਉਸ ਸਰਲ ਤਰੀਕੇ ਨਾਲ ਨਹੀਂ ਜਿਵੇਂ ਅਸੀਂ ਸੋਚਦੇ ਹਾਂ। ਮੁਸ਼ਕਿਲ ਸਮਾਂ ਸਾਨੂੰ ਬਿਹਤਰ ਨਹੀਂ ਬਣਾਉਂਦਾ ਪਰ ਮੁਸ਼ਕਿਲ ਸਮੇਂ ਦਾ ਸਾਹਮਣਾ ਕਰਨਾ ਸਾਨੂੰ ਮਜ਼ਬੂਤ ਬਣਾਉਂਦਾ ਹੈ।

ਸ਼ਿਲਪਾ ਵਲੋਂ ਸਾਂਝੇ ਕੀਤੇ ਪੇਜ 'ਚ ਅੱਗੇ ਲਿਖਿਆ ਕਿ ਪਰੇਸ਼ਾਨੀਆਂ ਸਾਡੀਆਂ ਉਸ ਤਾਕਤ ਨੂੰ ਬਣਾਉਂਦੀਆਂ ਹਨ ਜਿਸ ਦੇ ਬਾਰੇ 'ਚ ਸ਼ਾਇਦ ਸਾਨੂੰ ਪਤਾ ਹੀ ਨਹੀਂ ਸੀ ਕਿ ਉਹ ਸਾਡੇ ਕੋਲ ਹਨ। ਇਨ੍ਹਾਂ ਲੁੱਕੀਆਂ ਹੋਈਆਂ ਸ਼ਕਤੀਆਂ ਦੀ ਖੋਜ ਕਰਨ ਨਾਲ ਸਾਨੂੰ ਮੁਸ਼ਕਿਲ ਸਮੇਂ ਦੇ ਫਿਰ ਤੋਂ ਆਉਣ 'ਤੇ ਉਸ ਦਾ ਸਾਹਮਣਾ ਕਰਨ 'ਚ ਮਦਦ ਮਿਲਦੀ ਹੈ। ਮੈਂ ਬੁਰੇ ਸਮੇਂ ਨਾਲ ਓਨੀ ਹੀ ਨਫਰਤ ਕਰਦੀ ਹਾਂ ਜਿੰਨੀ ਕੋਈ ਹੋਰ ਕਰਦਾ ਹੈ ਪਰ ਮੈਨੂੰ ਪਤਾ ਹੈ ਕਿ ਮੈਂ ਓਨੀ ਮਜ਼ਬੂਤ ਹਾਂ ਕਿ ਉਸ ਸਮੇਂ ਤੋਂ ਬਾਹਰ ਨਿਕਲ ਕੇ ਰਿਕਵਰ ਕਰ ਲਵਾਂਗੀ।

ਦੱਸ ਦੇਈਏ ਕਿ ਜਦੋਂ ਰਾਜ ਕੁੰਦਰਾ ਨੂੰ ਅਸ਼ਲੀਲ ਫਿਲਮ ਬਣਾਉਣ ਦੇ ਮਾਮਲੇ 'ਚ ਗ੍ਰਿਫਤਾਰ ਕੀਤਾ ਗਿਆ ਸੀ ਉਦੋਂ ਤੋਂ ਹੇਟਰਸ ਨੇ ਸ਼ਿਲਪਾ ਸ਼ੈੱਟੀ ਨੂੰ ਵੀ ਨਹੀਂ ਬਕਸ਼ਿਆ ਸੀ। ਰਾਜ ਦੇ ਨਾਲ ਸ਼ਿਲਪਾ ਦੀ ਵੀ ਟਰੋਲਿੰਗ ਕੀਤੀ ਗਈ। ਰਾਜ ਦੀ ਗ੍ਰਿਫਤਾਰੀ ਤੋਂ ਬਾਅਦ ਸ਼ਿਲਪਾ ਨੇ 1 ਮਹੀਨੇ ਤੱਕ ਹਰ ਚੀਜ਼ ਤੋਂ ਦੂਰੀ ਬਣਾ ਲਈ ਸੀ ਪਰ ਫਿਰ ਸ਼ਿਲਪਾ ਨੇ ਮਜ਼ਬੂਤੀ ਨਾਲ ਸਭ ਦਾ ਸਾਹਮਣਾ ਕੀਤਾ। ਉਹ ਸ਼ੂਟਿੰਗ 'ਤੇ ਵੀ ਵਾਪਸ ਪਰਤੀ ਅਤੇ ਪੈਪਰਾਜੀ ਦੇ ਵਿਚਾਲੇ ਵੀ ਨਜ਼ਰ ਆਈ।