ਸਲਮਾਨ ਦਾ ਸ਼ੋਹਰਤ ਪ੍ਰਤੀ ਬੇਫਿਕਰ ਰਵੱਈਆ ਉਨ੍ਹਾਂ ਨੂੰ ਦੂਜਿਆਂ ਤੋਂ ਵੱਖਰਾ ਬਣਾਉਂਦਾ ਹੈ: ਸੋਨਾਕਸ਼ੀ ਸਿਨਹਾ

ਮੁੰਬਈ (ਏਜੰਸੀ)- ਬਾਲੀਵੁੱਡ ਅਦਾਕਾਰਾ ਸੋਨਾਕਸ਼ੀ ਸਿਨਹਾ ਦਾ ਕਹਿਣਾ ਹੈ ਕਿ ਸਲਮਾਨ ਖਾਨ ਦਾ ਸ਼ੋਹਰਤ ਪ੍ਰਤੀ ਬੇਫਿਕਰ ਰਵੱਈਆ ਉਨ੍ਹਾਂ ਨੂੰ ਦੂਜਿਆਂ ਤੋਂ ਵੱਖਰਾ ਬਣਾਉਂਦਾ ਹੈ। ਸੋਨਾਕਸ਼ੀ ਸਿਨਹਾ ਨੇ ਆਪਣੇ ਫਿਲਮੀ ਕਰੀਅਰ ਦੀ ਸ਼ੁਰੂਆਤ 2010 ਵਿੱਚ ਰਿਲੀਜ਼ ਹੋਈ ਸੁਪਰਹਿੱਟ ਫਿਲਮ ਦਬੰਗ ਨਾਲ ਕੀਤੀ ਸੀ। ਸੋਨਾਕਸ਼ੀ ਨੇ ਇਸ ਫਿਲਮ ਵਿੱਚ ਸਲਮਾਨ ਨਾਲ ਕੰਮ ਕੀਤਾ ਸੀ। ਇਸ ਤੋਂ ਬਾਅਦ ਸੋਨਾਕਸ਼ੀ ਨੇ ਦਬੰਗ 2 ਅਤੇ ਦਬੰਗ 3 ਵਿੱਚ ਵੀ ਸਲਮਾਨ ਖਾਨ ਨਾਲ ਕੰਮ ਕੀਤਾ ਸੀ। ਹਾਲ ਹੀ ਵਿੱਚ ਹੋਈ ਇੱਕ ਗੱਲਬਾਤ ਵਿੱਚ, ਸੋਨਾਕਸ਼ੀ ਸਿਨਹਾ ਨੇ ਦੱਸਿਆ ਕਿ ਆਖਰ ਉਹ ਕੀ ਹੈ ਜੋ ਸੁਪਰਸਟਾਰ ਸਲਮਾਨ ਖਾਨ ਨੂੰ ਇਸ ਗਲੈਮਰਸ ਇੰਡਸਟਰੀ ਵਿੱਚ ਵੱਖਰਾ ਅਤੇ ਇੱਕ ਵਿਸ਼ਾਲ ਸ਼ਖਸੀਅਤ ਬਣਾਉਂਦਾ ਹੈ। ਸੋਨਾਕਸ਼ੀ ਸਿਨਹਾ ਪਹਿਲਾਂ ਵੀ ਸਲਮਾਨ ਦੀ ਪ੍ਰਸ਼ੰਸਾ ਕਰ ਚੁੱਕੀ ਹੈ, ਪਰ ਇਸ ਵਾਰ ਉਨ੍ਹਾਂ ਦੇ ਸ਼ਬਦਾਂ ਨੇ ਦਿਲ ਨੂੰ ਛੂਹ ਲਿਆ।

ਉਨ੍ਹਾਂ ਨੇ ਸਲਮਾਨ ਦੀ ਇੱਕ ਅਜਿਹੀ ਵਿਸ਼ੇਸ਼ਤਾ 'ਤੇ ਚਾਨਣਾ ਪਾਇਆ ਜੋ ਬਹੁਤ ਘੱਟ ਦੇਖਣ ਨੂੰ ਮਿਲਦੀ ਹੈ ਅਤੇ ਉਹ ਹੈ ਸ਼ੋਹਰਤ ਪ੍ਰਤੀ ਉਨ੍ਹਾਂ ਦਾ ਬੇਫਿਕਰ ਰਵੱਈਆ। ਸੋਨਾਕਸ਼ੀ ਸਿਨਹਾ ਨੇ ਸੋਚਦੇ ਹੋਏ ਕਿਹਾ, "ਸਲਮਾਨ ਦੂਜਿਆਂ ਤੋਂ ਵੱਖਰਾ ਕੀ ਬਣਾਉਂਦਾ ਹੈ, ਪਤਾ ਹੈ? ਉਨ੍ਹਾਂ ਦਾ ਸ਼ੋਹਰਤ ਪ੍ਰਤੀ ਬੇਫਿਕਰ ਰਵੱਈਆ। ਜਿਵੇਂ ਉਨ੍ਹਾਂ ਨੂੰ ਕੋਈ ਪਰਵਾਹ ਨਹੀਂ ਕਿ ਉਹ ਕਿੰਨੇ ਵੱਡੇ ਸਟਾਰ ਹਨ। ਬਹੁਤ ਆਮ, ਬਹੁਤ ਹੀ ਨੋਰਮਲ। ਅਜਿਹਾ ਲੱਗਦਾ ਹੈ ਕਿ ਉਨ੍ਹਾਂ ਨੇ ਸਟਾਰਡਮ ਨੂੰ ਇੰਨੇ ਸਾਧਾਰਨ ਢੰਗ ਨਾਲ ਲਿਆ ਹੈ ਕਿ ਸ਼ਾਇਦ ਉਨ੍ਹਾਂ ਨੂੰ ਖੁਦ ਵੀ ਨਹੀਂ ਪਤਾ ਕਿ ਉਹ ਕਿੰਨੇ ਵੱਡੇ ਸੁਪਰਸਟਾਰ ਹਨ। ਉਹ ਆਪਣੀ ਦੁਨੀਆ ਵਿੱਚ ਰਹਿੰਦੇ ਹਨ, ਆਪਣੀ ਜ਼ਿੰਦਗੀ ਆਪਣੇ ਤਰੀਕੇ ਨਾਲ ਜੀਉਂਦੇ ਹਨ ਅਤੇ ਇਹੀ ਮੈਨੂੰ ਸ਼ਾਨਦਾਰ ਲੱਗਦਾ ਹੈ।" ਸੋਨਾਕਸ਼ੀ ਦੀ ਇਹ ਤਾਰੀਫ ਉਨ੍ਹਾਂ ਕਈ ਲੋਕਾਂ ਦੀਆਂ ਭਾਵਨਾਵਾਂ ਨਾਲ ਮੇਲ ਖਾਂਦੀ ਹੈ, ਜਿਨ੍ਹਾਂ ਨੇ ਸਲਮਾਨ ਖਾਨ ਨਾਲ ਕੰਮ ਕੀਤਾ ਹੈ। ਦਹਾਕਿਆਂ ਤੱਕ ਬਾਕਸ ਆਫਿਸ 'ਤੇ ਰਾਜ ਕਰਨ ਦੇ ਬਾਵਜੂਦ, ਸਲਮਾਨ ਨੂੰ ਹਮੇਸ਼ਾ ਜ਼ਮੀਨ ਨਾਲ ਜੁੜਿਆ ਵਿਅਕਤੀ ਮੰਨਿਆ ਗਿਆ ਹੈ।