ਨਵੇਂ ਸ਼ੋਅ ''ਸਯੋਨੀ'' ਨਾਲ ਟੀਵੀ ''ਤੇ ਰਸ਼ਮੀ ਦੇਸਾਈ ਦੀ ਧਮਾਕੇਦਾਰ ਵਾਪਸੀ

ਮੁੰਬਈ (ਏਜੰਸੀ)- ਟੈਲੀਵਿਜ਼ਨ ਅਦਾਕਾਰਾ ਰਸ਼ਮੀ ਦੇਸਾਈ ਆਉਣ ਵਾਲੇ ਸੀਰੀਅਲ 'ਸਯੋਨੀ' ਨਾਲ ਛੋਟੇ ਪਰਦੇ 'ਤੇ ਵਾਪਸੀ ਕਰਨ ਲਈ ਤਿਆਰ ਹੈ। ਉਹ ਸ਼ੋਅ ਵਿੱਚ 'ਮਾਇਆ' ਦੀ ਭੂਮਿਕਾ ਨਿਭਾਏਗੀ। ਜਾਨ੍ਹਵੀ ਸੋਨੀ ਅਤੇ ਗੌਤਮ ਸਿੰਘ ਵਿਗ ਵੀ ਮੁੱਖ ਭੂਮਿਕਾਵਾਂ ਵਿੱਚ ਦਿਖਾਈ ਦੇਣਗੇ। ਸ਼ੋਅ ਦੇ ਪ੍ਰਸਾਰਣ ਤੋਂ ਪਹਿਲਾਂ, ਰਸ਼ਮੀ ਨੇ ਨਿਰਮਾਤਾ ਸਰਗੁਣ ਮਹਿਤਾ ਅਤੇ ਰਵੀ ਦੂਬੇ ਨਾਲ ਕੰਮ ਕਰਨ ਦਾ ਆਪਣਾ ਤਜਰਬਾ ਸਾਂਝਾ ਕਰਦੇ ਹੋਏ ਕਿਹਾ ਕਿ ਉਨ੍ਹਾਂ ਨਾਲ ਕੰਮ ਕਰਨਾ ਉਸਨੂੰ ਘਰ ਵਰਗਾ ਮਹਿਸੂਸ ਕਰਾਉਂਦਾ ਹੈ।

ਰਸ਼ਮੀ ਨੇ ਕਿਹਾ, "ਮੈਨੂੰ ਆਪਣੇ ਕੰਮ ਨਾਲ ਪਿਆਰ ਹੈ ਅਤੇ ਸੈੱਟ 'ਤੇ ਰਹਿਣਾ ਬੇਹੱਦ ਪਸੰਦ ਹੈ। ਹੁਣ ਮੈਂ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਅਨੁਸ਼ਾਸਿਤ ਅਤੇ ਆਪਣੇ ਕੰਮ ਨੂੰ ਲੈ ਕੇ ਕੇਂਦ੍ਰਿਤ ਹਾਂ। ਤਜ਼ਰਬੇ ਦੇ ਨਾਲ, ਮੈਨੂੰ ਲੱਗਦਾ ਹੈ ਕਿ ਮੈਂ ਹੁਣ ਪਹਿਲਾਂ ਨਾਲੋਂ ਕਿਤੇ ਬਿਹਤਰ ਕੰਮ ਕਰ ਸਕਦੀ ਹਾਂ। ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਮੈਂ ਕਿਹਨਾਂ ਲੋਕਾਂ ਨਾਲ ਕੰਮ ਕਰ ਰਹੀ ਹਾਂ। ਸਰਗੁਣ ਅਤੇ ਰਵੀ ਸ਼ਾਨਦਾਰ ਹਨ।" ਉਸ ਨੇ ਨਿਰਦੇਸ਼ਕ ਉੱਤਮ ਬੇਲਾਵਤ ਦੀ ਵੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਪਰਦੇ ਪਿੱਛੇ ਕੰਮ ਕਰਨ ਵਾਲੇ ਲੋਕ ਸ਼ੋਅ ਨੂੰ ਸਹੀ ਦਰਸ਼ਕਾਂ ਤੱਕ ਪਹੁੰਚਾਉਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ।

ਉਸਨੇ ਕਿਹਾ ਕਿ ਸਰਗੁਣ, ਰਵੀ ਅਤੇ ਉੱਤਮ ਨਾਲ ਕੰਮ ਕਰਨਾ ਉਸਦੀ ਜ਼ਿੰਦਗੀ ਵਿੱਚ ਇੱਕ ਨਵਾਂ ਮੋੜ ਹੋ ਸਕਦਾ ਹੈ। ਰਸ਼ਮੀ ਨੇ ਕਿਹਾ ਕਿ ਉਹ ਕਦੇ ਵੀ ਜਲਦਬਾਜ਼ੀ ਵਿੱਚ ਫੈਸਲੇ ਨਹੀਂ ਲੈਂਦੀ ਅਤੇ ਉਸਨੂੰ ਲੱਗਦਾ ਹੈ ਕਿ "ਸਯੋਨੀ" ਦਾ ਹਿੱਸਾ ਬਣਨਾ ਉਸਦੇ ਲਈ ਸਹੀ ਫੈਸਲਾ ਰਿਹਾ। "ਸਯੋਨੀ" 23 ਸਤੰਬਰ ਤੋਂ ਸ਼ਾਮ 7:30 ਵਜੇ ਸਟਾਰ ਪਲੱਸ ਅਤੇ ਜੀਓਹੌਟਸਟਾਰ 'ਤੇ ਪ੍ਰਸਾਰਿਤ ਹੋਵੇਗਾ।