ਨੇਪਾਲ ਦੀ "ਐਲੀਫੈਂਟਸ ਇਨ ਦਿ ਫੋਗ" ਨੇ ਕਾਨਸ ਫਿਲਮ ਫੈਸਟੀਵਲ ''ਚ ਪੁਰਸਕਾਰ ਜਿੱਤ ਕੇ ਰਚਿਆ ਇਤਿਹਾਸ

ਕਾਨਸ (ਏਜੰਸੀ) - ਨੇਪਾਲ ਦੀ ਫਿਲਮ "ਐਲੀਫੈਂਟਸ ਇਨ ਦਿ ਫੋਗ" ਨੇ 79ਵੇਂ ਕਾਨਸ ਫਿਲਮ ਫੈਸਟੀਵਲ ਵਿੱਚ "ਅਨਸਰਟੇਨ ਰਿਗਾਰਡ ਜਿਊਰੀ" ਪੁਰਸਕਾਰ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਇਹ ਦੁਨੀਆ ਦੇ ਸਭ ਤੋਂ ਵੱਕਾਰੀ ਫਿਲਮ ਫੈਸਟੀਵਲ ਵਿੱਚ ਵੱਕਾਰੀ ਪੁਰਸਕਾਰ ਜਿੱਤਣ ਵਾਲੀ ਪਹਿਲੀ ਨੇਪਾਲੀ ਫਿਲਮ ਹੈ। ਅਵਿਨਾਸ਼ ਬਿਕਰਮ ਸ਼ਾਹ ਦੁਆਰਾ ਲਿਖੀ ਅਤੇ ਨਿਰਦੇਸ਼ਿਤ, ਉਨ੍ਹਾਂ ਦੀ ਪਹਿਲੀ ਫੀਚਰ ਫਿਲਮ "ਐਲੀਫੈਂਟਸ ਇਨ ਦਿ ਫੋਗ" ਇਸ ਸ਼੍ਰੇਣੀ ਵਿੱਚ ਚੁਣੀ ਜਾਣ ਵਾਲੀ ਪਹਿਲੀ ਨੇਪਾਲੀ ਫਿਲਮ ਵੀ ਹੈ। ਇਹ ਸ਼੍ਰੇਣੀ ਉੱਭਰ ਰਹੇ ਫਿਲਮ ਨਿਰਮਾਤਾਵਾਂ ਅਤੇ ਵਿਲੱਖਣ ਕਹਾਣੀਆਂ ਨੂੰ ਉਜਾਗਰ ਕਰਦੀ ਹੈ। ਇਹ ਸ਼੍ਰੇਣੀ ਮੁੱਖ ਮੁਕਾਬਲੇ, "ਪਾਲਮੇ ਡੀ'ਓਰ" ਦੇ ਸਮਾਨਾਂਤਰ ਚੱਲਦੀ ਹੈ।

ਨੇਪਾਲ ਦੇ ਦੱਖਣੀ ਤਰਾਈ ਮੈਦਾਨਾਂ ਵਿੱਚ ਸਥਿਤ ਜੰਗਲਾਂ ਵਿਚ ਘਿਰੇ ਥੋਰੀ ਪਿੰਡ ਵਿੱਚ ਫਿਲਮਾਈ ਗਈ, ਇਹ ਫਿਲਮ ਉਨ੍ਹਾਂ ਟ੍ਰਾਂਸਜੈਂਡਰ ਔਰਤਾਂ ਦੇ ਜੀਵਨ ਦੇ ਆਧਾਰਿਤ ਹੈ,  ਜੋ ਆਪਣੇ ਭਾਈਚਾਰੇ ਦੇ ਹਾਸ਼ੀਏ 'ਤੇ ਰਹਿ ਕੇ ਜੀਵਨ ਬਤੀਤ ਕਰ ਰਹੀਆਂ ਹਨ। ਫਿਲਮ ਦੇ ਅਧਿਕਾਰਤ ਵਰਣਨ ਦੇ ਅਨੁਸਾਰ, ਇਹ ਫਿਲਮ ਮੁੱਖ ਤੌਰ 'ਤੇ ਇੱਕ ਟਰਾਂਸਜੈਂਡਰ ਭਾਈਚਾਰੇ ਦੀ ਮੁਖੀਆ 'ਪਿਰਾਤੀ' ਦੇ ਆਲੇ-ਦੁਆਲੇ ਘੁੰਮਦੀ ਹੈ, ਜੋ ਆਪਣੇ ਪ੍ਰੇਮੀ ਨਾਲ ਇੱਕ ਨਵੀਂ ਜ਼ਿੰਦਗੀ ਸ਼ੁਰੂ ਕਰਨ ਦਾ ਸੁਪਨਾ ਦੇਖਦੀ ਹੈ ਪਰ ਜਦੋਂ ਉਸਦੀ ਇੱਕ ਧੀ ਲਾਪਤਾ ਹੋ ਜਾਂਦੀ ਹੈ, ਤਾਂ ਉਸਨੂੰ ਮਾਮਲੇ ਦੀ ਜਾਂਚ ਕਰਨ ਅਤੇ ਆਜ਼ਾਦੀ ਦੀ ਆਪਣੀ ਇੱਛਾ ਅਤੇ ਆਪਣੇ ਭਾਈਚਾਰੇ ਪ੍ਰਤੀ ਆਪਣੀਆਂ ਜ਼ਿੰਮੇਵਾਰੀਆਂ ਵਿੱਚੋਂ ਇੱਕ ਦੀ ਚੋਣ ਕਰਨ ਲਈ ਮਜਬੂਰ ਕੀਤਾ ਜਾਂਦਾ ਹੈ। ਸ਼ਾਹ ਨੇ ਇਹ ਪੁਰਸਕਾਰ ਆਪਣੀ ਪੂਰੀ ਟੀਮ ਨੂੰ ਸਮਰਪਿਤ ਕੀਤਾ।