ਮੌਤ ਤੋਂ ਬਾਅਦ ਮੂਸੇਵਾਲਾ ਦੇ ਗਾਣੇ ਟਾਪ ’ਤੇ, ‘ਬਿਲਬੋਰਡ ਗਲੋਬਲ 200’ ’ਚ ਸ਼ਾਮਲ ਹੋਇਆ ਗਾਣਾ ‘295’
06/19/2022 11:59:29 AM
ਜਲੰਧਰ : ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਕੋਲੋਂ ਸਿੱਧੂ ਮੂਸੇਵਾਲਾ ਦੀ ਹੱਤਿਆ ਸਬੰਧੀ ਪੁੱਛਗਿੱਛ ਵਿਚਕਾਰ ਸਵਰਗੀ ਸਿੰਗਰ-ਰੈਪਰ ਦੇ ਗਾਣੇ ‘295’ ਨੇ ‘ਬਿਲਬੋਰਡ ਗਲੋਬਲ 200’ ਚਾਰਟ ਵਿਚ ਜਗ੍ਹਾ ਬਣਾਈ ਹੈ। ਮੂਸੇਵਾਲਾ ਨੂੰ ਭਾਰਤ ’ਚ ‘ਸੋ ਹਾਈ’, ‘ਸੇਮ ਬੀਫ’, ‘ਦਿ ਲਾਸਟ ਰਾਈਡ’ ਤੇ ‘ਜਸਟ ਲਿਸਨ’ ਵਰਗੇ ਗਾਣਿਆਂ ਲਈ ਜਾਣਿਆ ਜਾਂਦਾ ਹੈ। ਬਿਲਬੋਰਡ ਗਲੋਬਲ 200 ਚਾਰਟ ’ਤੇ ਸਿੱਧੂ ਦੇ ‘295’ ਨੂੰ ਇਸ ਹਫਤੇ ਐਂਟਰੀ ਮਿਲੀ ਅਤੇ ਸ਼ੁੱਕਰਵਾਰ ਤੱਕ ਇਹ 154ਵੇਂ ਸਥਾਨ ’ਤੇ ਸੂਚੀਬੱਧ ਸੀ। ਦੱਸ ਦੇਈਏ ਕਿ ਮੂਸੇਵਾਲਾ ਪਹਿਲੇ ਅਜਿਹੇ ਪੰਜਾਬੀ ਕਲਾਕਾਰ ਹਨ, ਜਿਨ੍ਹਾਂ ਦੇ ਗਾਣੇ ਨੇ ਇਸ ਸੂਚੀ ਵਿਚ ਜਗ੍ਹਾ ਬਣਾਈ ਹੈ।
ਯੂ-ਟਿਊਬ ’ਤੇ 20 ਕਰੋੜ ਤੋਂ ਵੱਧ ਦਰਸ਼ਕ
ਯੂ-ਟਿਊਬ ’ਤੇ ‘295’ ਦੇ ਦਰਸ਼ਕਾਂ ਦੀ ਗਿਣਤੀ 200 ਮਿਲੀਅਨ (20 ਕਰੋੜ) ਦੇ ਨੇੜੇ ਪਹੁੰਚ ਗਈ ਹੈ ਅਤੇ ਟ੍ਰੈਕ ਆਪਣੇ ਚੋਟੀ ਦੇ 100 ਮਿਊਜ਼ਿਕ ਵੀਡੀਓ ਗਲੋਬਲ ਚਾਰਟ ’ਤੇ ਤੀਜੇ ਸਥਾਨ ’ਤੇ ਸੂਚੀਬੱਧ ਹੈ। ਯੂ-ਟਿਊਬ ਮਿਊਜ਼ਿਕ ’ਤੇ ‘295’ ਗਲੋਬਲ ਚਾਰਟ ’ਤੇ ਚੌਥੇ ਸਥਾਨ ’ਤੇ ਹੈ, ਜਦੋਂਕਿ ਉਹ ਮੰਚ ਦੀ ਚੋਟੀ ਦੀ ਕਲਾਕਾਰ ਸੂਚੀ ਵਿਚ ਦੂਜੇ ਨੰਬਰ ’ਤੇ ਹੈ। ਮੂਸੇਵਾਲਾ ਦਾ ਇਕ ਹੋਰ ਟ੍ਰੈਕ ‘ਦਿ ਲਾਸਟ ਰਾਈਡ’ ਚਾਰਟ ’ਤੇ ਉੱਪਰ ਵੱਲ ਵਧਿਆ ਹੈ। ਇਹ ਹੁਣ 6ਵੇਂ ਨੰਬਰ ’ਤੇ ਸੂਚੀਬੱਧ ਹੈ। ਇਸ ਵੀਡੀਓ ਨੂੰ ਯੂ-ਟਿਊਬ ’ਤੇ 73 ਮਿਲੀਅਨ ਤੋਂ ਵੱਧ ਵਾਰ ਵੇਖਿਆ ਜਾ ਚੁੱਕਾ ਹੈ।
29 ਮਈ ਨੂੰ ਹੋਈ ਸੀ ਹੱਤਿਆ
ਸੂਬਾ ਵਿਧਾਨ ਸਭਾ ਚੋਣਾਂ ਤੋਂ ਕੁਝ ਮਹੀਨੇ ਪਹਿਲਾਂ ਕਾਂਗਰਸ ਵਿਚ ਸ਼ਾਮਲ ਹੋਏ ਸਿੱਧੂ ਮੂਸੇਵਾਲਾ ਦੀ 29 ਮਈ ਨੂੰ ਮਾਨਸਾ ਜ਼ਿਲੇ ’ਚ ਅਣਪਛਾਤੇ ਹਮਲਾਵਰਾਂ ਨੇ ਗੋਲੀਆਂ ਮਾਰ ਕੇ ਹੱਤਿਆ ਕਰ ਦਿੱਤੀ ਸੀ।
ਉਨ੍ਹਾਂ ਦੀ ਹੱਤਿਆ ਨੇ ਭਾਰਤੀ ਫਿਲਮ ਤੇ ਸੰਗੀਤ ਭਾਈਚਾਰੇ ਨੂੰ ਝੰਜੋੜ ਕੇ ਰੱਖ ਦਿੱਤਾ ਸੀ ਅਤੇ ਕਈ ਭਾਰਤੀ ਕਲਾਕਾਰਾਂ ਨੇ ਸੋਸ਼ਲ ਮੀਡੀਆ ’ਤੇ ਮੂਸੇਵਾਲਾ ਨੂੰ ਸ਼ਰਧਾਂਜਲੀ ਦਿੱਤੀ ਸੀ। ਗਲੋਬਲ ਸੰਗੀਤ ਭਾਈਚਾਰੇ ’ਚੋਂ ਕੈਨੇਡਿਆਈ ਰੈਪਰ ਡ੍ਰੇਕ ਨੇ ਵੀ ਉਨ੍ਹਾਂ ਦੀ ਮੌਤ ’ਤੇ ਸੋਗ ਪ੍ਰਗਟ ਕੀਤਾ ਸੀ।
ਕਿਹੜੇ ਗਾਣੇ ਪਾ ਰਹੇ ਹਨ ਧੁੰਮਾਂ
ਇਸ ਸੂਚੀ ਵਿਚ ਸਿੰਗਰ ਕੇਟ ਬੁਸ਼ ਦੀ ‘ਰਨਿੰਗ ਅਪ ਦਿ ਹਿੱਲ (ਏ ਡੀਲ ਵਿਦ ਗੌਡ) ਟਾਪ ’ਤੇ ਹੈ। ਇਸ ਵਿਚ ਗਾਇਕਾਂ ਹੈਰੀ ਸਟਾਈਲਸ, ਬੈਡ ਬਨੀ, ਲਿਜ਼ੋ, ਕੈਮਿਲਾ ਕੈਬੇਲੋ, ਐਡ ਸ਼ੀਰਨ ਤੇ ਜਸਟਿਨ ਬੀਬਰ ਦੇ ਟ੍ਰੈਕ ਵੀ ਹਨ। ‘295’ ਅਤੇ ਇਸ ਦਾ ਅਧਿਕਾਰਤ ਵੀਡੀਓ, ਜਿਸ ਨੂੰ ਮੂਸੇਵਾਲਾ ਨੇ ਜੁਲਾਈ 2021 ’ਚ ਰਿਲੀਜ਼ ਕੀਤਾ ਸੀ, ਯੂ-ਟਿਊਬ ਅਤੇ ਇਸ ਦੇ ਮਿਊਜ਼ਿਕ ਸਟ੍ਰੀਮਿੰਗ ਯੂ-ਟਿਊਬ ਮਿਊਜ਼ਿਕ ’ਤੇ ਵੀ ਧੁੰਮਾਂ ਪਾ ਰਿਹਾ ਹੈ।
