20 ਸਾਲ ਵੱਡੇ ਅਦਾਕਾਰ ਨਾਲ ਅਫੇਅਰ ਤੇ ਮਹੇਸ਼ ਭੱਟ ਨੇ ਮਾਰੀ ਚੱਪਲ, ਜਾਣੋ ਕੰਗਨਾ ਦੇ ਵੱਡੇ ਵਿਵਾਦ
12/02/2020 10:49:01 PM
ਜਲੰਧਰ (ਬਿਊਰੋ)– ਬਾਲੀਵੁੱਡ ਅਦਾਕਾਰਾ ਕੰਗਨਾ ਰਣੌਤ ਹਮੇਸ਼ਾ ਕਿਸੇ ਨਾ ਕਿਸੇ ਵਿਵਾਦ ’ਚ ਘਿਰੀ ਰਹਿੰਦੀ ਹੈ। ਕੰਗਨਾ ਨੇ 17 ਸਾਲ ਦੀ ਉਮਰ ’ਚ ਬਾਲੀਵੁੱਡ ’ਚ ਐਂਟਰੀ ਕੀਤੀ ਸੀ ਤੇ ਆਪਣੇ ਸ਼ੁਰੂਆਤੀ ਦਿਨਾਂ ਤੋਂ ਹੀ ਉਹ ਵਿਵਾਦਾਂ ਨਾਲ ਜੁੜੀ ਰਹੀ ਹੈ। ਇਹ ਵਿਵਾਦ ਛੋਟੇ-ਮੋਟੇ ਨਹੀਂ ਹਨ, ਸਗੋਂ ਅਜਿਹੇ ਵੱਡੇ ਵਿਵਾਦ ਹਨ, ਜਿਨ੍ਹਾਂ ਨੇ ਕੰਗਨਾ ਨੂੰ ਕਿਤੇ ਨਾ ਕਿਤੇ ਪ੍ਰਸਿੱਧੀ ਦਿਵਾਉਣ ’ਚ ਮਦਦ ਕੀਤੀ ਹੈ। ਹਾਲ ਹੀ ’ਚ ਕੰਗਨਾ ਪੰਜਾਬ ਦੇ ਕਿਸਾਨ ਧਰਨਿਆਂ ’ਤੇ ਬੋਲਣ ਕਰਕੇ ਵਿਵਾਦਾਂ ’ਚ ਹੈ। ਕੰਗਨਾ ਲਗਾਤਾਰ ਕਿਸਾਨ ਧਰਨਿਆਂ ਦਾ ਵਿਰੋਧ ਕਰਦੀ ਆਈ ਹੈ ਤੇ ਧਰਨਿਆਂ ’ਚ ਸ਼ਾਮਲ ਬਜ਼ੁਰਗ ਬੇਬੇ ’ਤੇ ਟਿੱਪਣੀ ਕਰਨ ’ਤੇ ਉਸ ’ਤੇ ਪੁਲਸ ਕੇਸ ਵੀ ਦਰਜ ਹੋ ਚੁੱਕਾ ਹੈ। ਅੱਜ ਤੁਹਾਨੂੰ ਕੰਗਨਾ ਦੇ ਅਜਿਹੇ ਹੀ ਕੁਝ ਵਿਵਾਦ ਦੱਸਣ ਜਾ ਰਹੇ ਹਾਂ, ਜਿਨ੍ਹਾਂ ਕਰਕੇ ਉਹ ਵਿਵਾਦਾਂ ’ਚ ਘਿਰੀ ਰਹੀ–
ਆਦਿਤਿਆ ਪੰਚੋਲੀ ਨਾਲ ਅਫੇਅਰ ਰੱਖਣਾ ਤੇ ਫਿਰ ਗੰਭੀਰ ਦੋਸ਼ ਲਗਾਉਣੇ
ਕੰਗਨਾ ਰਣੌਤ ਦੇ ਬੁਆਏਫਰੈਂਡਸ ਦੀ ਲਿਸਟ ’ਚ ਆਦਿਤਿਆ ਪੰਚੋਲੀ ਦਾ ਨਾਂ ਸਭ ਤੋਂ ਉੱਪਰ ਆਉਂਦਾ ਹੈ। ਕੰਗਨਾ ਦਾ ਪਹਿਲਾ ਪਿਆਰ ਆਦਿਤਿਆ ਪੰਚੋਲੀ ਸੀ। ਜਦੋਂ ਫ਼ਿਲਮ ’ਚ ਕੰਗਨਾ ਆਪਣਾ ਕਰੀਅਰ ਬਣਾ ਰਹੀ ਸੀ, ਉਸ ਦੌਰਾਨ ਕੰਗਨਾ ਨੂੰ ਆਦਿਤਿਆ ਨਾਲ ਪਿਆਰ ਹੋ ਗਿਆ ਸੀ। ਆਦਿਤਿਆ ਕੰਗਨਾ ਤੋਂ ਉਮਰ ’ਚ 20 ਸਾਲ ਵੱਡਾ ਸੀ। ਦੋਵੇਂ ਇਕੱਠੇ ਲਿਵ-ਇਨ ’ਚ ਰਹਿਣ ਲੱਗੇ ਸਨ। ਕੁਝ ਸਮੇਂ ਬਾਅਦ ਖ਼ਬਰਾਂ ਆਉਣ ਲੱਗੀਆਂ ਕਿ ਆਦਿਤਿਆ ਕੰਗਨਾ ਦੀ ਕੁੱਟਮਾਰ ਕਰਦਾ ਹੈ। ਇਸ ਖ਼ਬਰ ’ਤੇ ਮੋਹਰ ਲਗਾਉਂਦਿਆਂ ਕੰਗਨਾ ਨੇ ਆਦਿਤਿਆ ਪੰਚੋਲੀ ਖ਼ਿਲਾਫ਼ ਸ਼ਿਕਾਇਤ ਦਰਜ ਕਰਵਾਈ ਸੀ।
ਕੰਗਨਾ ਕਰਕੇ ਟੁੱਟਿਆ ਰਿਤਿਕ ਰੌਸ਼ਨ ਦਾ ਵਿਆਹ
ਬਾਲੀਵੁੱਡ ਅਦਾਕਾਰ ਰਿਤਿਕ ਰੌਸ਼ਨ ਨਾਲ ਵੀ ਕੰਗਨਾ ਦਾ ਅਫੇਅਰ ਕਾਫੀ ਮਸ਼ਹੂਰ ਹੋਇਆ ਸੀ। ਅਜਿਹਾ ਕਿਹਾ ਜਾਂਦਾ ਸੀ ਕਿ ਰਿਤਿਕ ਨੇ ਆਪਣੀ ਪਹਿਲੀ ਪਤਨੀ ਸੁਜ਼ੈਨ ਖਾਨ ਨੂੰ ਕੰਗਨਾ ਕਾਰਨ ਛੱਡਿਆ ਸੀ। ਰਿਤਿਕ ਨਾਲ ਰਿਸ਼ਤੇ ਨੂੰ ਕੰਗਨਾ ਨੇ ਖੁਦ ਸਾਰਿਆਂ ਸਾਹਮਣੇ ਲਿਆਂਦਾ ਸੀ। ਬਾਅਦ ’ਚ ਦੋਵੇਂ ਇਕ-ਦੂਜੇ ’ਤੇ ਗੰਭੀਰ ਦੋਸ਼ ਲਗਾਉਣ ਲੱਗੇ ਸਨ। ਅੱਜ ਵੀ ਕੰਗਨਾ ਰਿਤਿਕ ਰੌਸ਼ਨ ’ਤੇ ਕੁਮੈਂਟ ਕਰਨ ’ਚ ਪਿੱਛੇ ਨਹੀਂ ਹੱਟਦੀ। ਕੰਗਨਾ ਤੇ ਰਿਤਿਕ ਨਾਲ ‘ਕ੍ਰਿਸ਼ 3’ ਤੇ ‘ਕਾਈਟਸ’ ’ਚ ਕੰਮ ਕੀਤਾ ਹੈ। ‘ਕ੍ਰਿਸ਼ 3’ ਦੌਰਾਨ ਦੋਵੇਂ ਇਕ-ਦੂਜੇ ਦੇ ਕਾਫ਼ੀ ਨਜ਼ਦੀਕ ਆ ਗਏ ਸਨ।
ਕੰਗਨਾ ਕਰਕੇ ਸੋਨੂੰ ਸੂਦ ਨੇ ਛੱਡੀ ਸੀ ‘ਮਣੀਕਰਣਿਕਾ’ ਫ਼ਿਲਮ
ਸੋਨੂੰ ਸੂਦ ਨੇ ਫ਼ਿਲਮ ‘ਮਣੀਕਰਣਿਕਾ’ ਨੂੰ ਅੱਧ ਵਿਚਾਲੇ ਛੱਡ ਦਿੱਤਾ ਸੀ। ਸੋਨੂੰ ਨੇ ਕਿਹਾ ਸੀ ਕਿ ਫ਼ਿਲਮ ਦੀ ਸ਼ੂਟਿੰਗ ਦੌਰਾਨ ਇਕ ਸਮਾਂ ਅਜਿਹਾ ਸੀ, ਜਦੋਂ ਡਾਇਰੈਕਟਰ ਤੇ ਕੰਗਨਾ ਵਿਚਾਲੇ ਚੀਜ਼ਾਂ ਠੀਕ ਨਹੀਂ ਚੱਲ ਰਹੀਆਂ ਸਨ। ਜਦੋਂ ‘ਮਣੀਕਰਣਿਕਾ’ ਦੀ ਐਡੀਟਿੰਗ ਹੋਈ ਤੇ ਮੈਂ ਫ਼ਿਲਮ ਦੇਖੀ ਤਾਂ ਮੈਨੂੰ ਪਤਾ ਲੱਗਾ ਕਿ ਜੋ ਦ੍ਰਿਸ਼ ਅਸੀਂ ਸ਼ੂਟ ਕੀਤੇ ਸਨ, ਉਹ ਫ਼ਿਲਮ ’ਚੋਂ ਕੱਟ ਦਿੱਤੇ ਗਏ। ਇਸ ਤੋਂ ਬਾਅਦ ਸੋਨੂੰ ਕਾਫ਼ੀ ਪ੍ਰੇਸ਼ਾਨ ਹੋ ਗਏ। ਇਸ ’ਤੇ ਕੰਗਨਾ ਦਾ ਕਹਿਣਾ ਸੀ ਕਿ ਸੋਨੂੰ ਇਕ ਡਾਇਰੈਕਟਰ ਬੀਬੀ ਦੇ ਅਧੀਨ ਕੰਮ ਨਹੀਂ ਕਰਨਾ ਚਾਹੁੰਦੇ, ਇਸ ਲਈ ਉਨ੍ਹਾਂ ਨੇ ਫ਼ਿਲਮ ਛੱਡੀ ਹੈ।
ਗੁੱਸੇ ’ਚ ਮਹੇਸ਼ ਭੱਟ ਨੇ ਮਾਰੀ ਸੀ ਚੱਪਲ
ਕੰਗਨਾ ਦੀ ਭੈਣ ਰੰਗੋਲੀ ਨੇ ਮਹੇਸ਼ ਭੱਟ ’ਤੇ ਇਲਜ਼ਾਮ ਲਗਾਉਂਦਿਆਂ ਇਕ ਟਵੀਟ ਕੀਤਾ ਸੀ, ਜਿਸ ’ਚ ਉਸ ਨੇ ਲਿਖਿਆ ਸੀ, ‘ਕੰਗਨਾ ਰਣੌਤ ਜਦੋਂ ‘ਵੋ ਲਮਹੇ’ ਦਾ ਪ੍ਰਵਿਊ ਦੇਖਣ ਲਈ ਥਿਏਟਰ ਪਹੁੰਚੀ ਤਾਂ ਮਹੇਸ਼ ਨੇ ਕੰਗਨਾ ’ਤੇ ਚੱਪਲ ਸੁੱਟੀ ਸੀ।ਮਹੇਸ਼ ਨੇ ਕੰਗਨਾ ਨੂੰ ਉਸੇ ਦੀ ਹੀ ਫ਼ਿਲਮ ਦੇਖਣ ਤੋਂ ਰੋਕ ਦਿੱਤਾ ਸੀ। ਉਹ ਪੂਰੀ ਰਾਤ ਰੋਂਦੀ ਰਹੀ। ਉਸ ਦੌਰਾਨ ਕੰਗਨਾ ਦੀ ਉਮਰ ਸਿਰਫ 19 ਸਾਲ ਹੀ ਸੀ।’
ਸ਼ਿਵਸੈਨਾ ਨਾਲ ਵਿਵਾਦ ਰਿਹਾ ਚਰਚਾ ’ਚ
ਕੁਝ ਸਮਾਂ ਪਹਿਲਾਂ ਸ਼ਿਵਸੈਨਾ ਨਾਲ ਵਿਵਾਦ ਨੂੰ ਲੈ ਕੇ ਵੀ ਕੰਗਨ ਚਰਚਾ ’ਚ ਰਹੀ ਹੈ। ਇਹ ਵਿਵਾਦ ਇੰਨਾ ਵੱਧ ਗਿਆ ਸੀ ਕਿ ਕੰਗਨਾ ਨੇ ਮੁੰਬਈ ਨੂੰ ‘ਪੀ. ਓ. ਕੇ.’ ਤੇ ‘ਪਾਕਿਸਤਾਨ’ ਤਕ ਆਖ ਦਿੱਤਾ ਸੀ। ਨਾਲ ਹੀ ਕੰਗਨਾ ਨੇ ਸ਼ਿਵਸੈਨਾ ਨੂੰ ਖੁੱਲ੍ਹੀ ਚੁਣੌਤੀ ਦਿੱਤੀ ਸੀ ਕਿ ਜੋ ਲੋਕ ਉਸ ਨੂੰ ਮੁੰਬਈ ਆਉਣ ਤੋਂ ਰੋਕ ਰਹੇ ਹਨ, ਉਨ੍ਹਾਂ ਨੂੰ ਉਹ ਦੱਸਣਾ ਚਾਹੁੰਦੀ ਹੈ ਕਿ ਮੁੰਬਈ ਕਿਸੇ ਦੇ ਬਾਪ ਦੀ ਨਹੀਂ ਹੈ। ਇਸ ’ਤੇ ਸੰਜੇ ਰਾਉਤ ਨੇ ਜਵਾਬ ਦਿੱਤਾ ਸੀ ਕਿ ਮੁੰਬਈ ਮਰਾਠੀ ਮਾਨੁਸ਼ ਦੇ ਬਾਪ ਦੀ ਹੈ।
ਨੋਟ– ਕੰਗਨਾ ਰਣੌਤ ਦੇ ਇਨ੍ਹਾਂ ਵਿਵਾਦਾਂ ’ਤੇ ਆਪਣੀ ਰਾਏ ਸਾਨੂੰ ਕੁਮੈਂਟ ਕਰਕੇ ਜ਼ਰੂਰ ਦੱਸੋ।
