ਪਿਤਾ ਖ਼ਿਲਾਫ਼ ਜਾ ਕੇ ਕਾਜੋਲ ਨੇ ਅਜੇ ਦੇਵਗਨ ਨਾਲ ਕਰਵਾਇਆ ਸੀ ਵਿਆਹ

ਮੁੰਬਈ (ਬਿਊਰੋ) - ਬਾਲੀਵੁੱਡ ਅਦਾਕਾਰ ਅਜੇ ਦੇਵਗਨ ਅਤੇ ਕਾਜੋਲ ਦੀ ਜੋੜੀ ਬਾਲੀਵੁੱਡ ਦੇ ਸਭ ਤੋਂ ਸ਼ਾਨਦਾਰ ਜੋੜੀਆਂ 'ਚੋਂ ਇੱਕ ਹੈ। ਇਹ ਜੋੜੀ ਆਨਸਕ੍ਰੀਨ ਜਿੰਨੀ ਚੰਗੀ ਲੱਗਦੀ ਹੈ, ਉਨੀ ਹੀ ਉਨ੍ਹਾਂ ਦੀ ਬਾਂਡਿੰਗ ਆਫ਼ਸਕ੍ਰੀਨ ਵਧੇਰੇ ਮਜ਼ਬੂਤ ਹੈ। ਇਸ ਸਾਲ ਦੋਵਾਂ ਦੇ ਵਿਆਹ ਨੂੰ 22 ਸਾਲ ਪੂਰੇ ਹੋ ਗਏ ਹਨ।

ਅਜਿਹੇ 'ਚ ਇਹ ਕਹਿਣਾ ਗਲ਼ਤ ਨਹੀਂ ਹੋਵੇਗਾ ਕਿ ਸਮੇਂ ਨਾਲ ਉਨ੍ਹਾਂ ਦਾ ਰਿਸ਼ਤਾ ਬਹੁਤ ਮਜ਼ਬੂਤ​ਹੋ ਗਿਆ ਹੈ ਪਰ ਕੀ ਤੁਹਾਨੂੰ ਪਤਾ ਹੈ ਕਿ ਜਦੋਂ ਕਾਜੋਲ ਨੇ ਸਾਲ 1999 'ਚ ਅਜੇ ਦੇਵਗਨ ਨਾਲ ਵਿਆਹ ਕਰਨ ਦਾ ਫ਼ੈਸਲਾ ਕੀਤਾ ਸੀ ਤਾਂ ਉਸ ਦੇ ਪਿਤਾ ਸ਼ੋਮੂ ਮੁਖਰਜੀ ਇਸ ਤੋਂ ਖੁਸ਼ ਨਹੀਂ ਸੀ। ਹਾਂ, ਕਾਜੋਲ ਦੇ ਪਿਤਾ ਨਹੀਂ ਚਾਹੁੰਦੇ ਸੀ ਕਿ ਕਾਜੋਲ ਉਸ ਵਕਤ ਅਜੇ ਦੇਵਗਨ ਨਾਲ ਵਿਆਹ ਕਰਵਾ ਕੇ ਸੈਟਲ ਹੋ ਜਾਵੇ।

ਕਾਜੋਲ ਨੇ ਖ਼ੁਦ ਇਕ ਇੰਟਰਵਿਊ 'ਚ ਇਸ ਦਾ ਕਾਰਨ ਦੱਸਿਆ ਸੀ। ਕਾਜੋਲ ਨੇ ਕਿਹਾ ਸੀ ਕਿ ਉਸ ਦੇ ਪਿਤਾ ਨਹੀਂ ਚਾਹੁੰਦੇ ਸੀ ਕਿ ਉਹ 24 ਸਾਲ ਦੀ ਉਮਰ 'ਚ ਆਪਣੇ ਵਿਆਹ ਦਾ ਫ਼ੈਸਲਾ ਕਰੇ ਅਤੇ ਆਪਣੇ ਫ਼ਿਲਮੀ ਕਰੀਅਰ ਨੂੰ ਦਾਅ 'ਤੇ ਲਗਾਵੇ।

ਦੱਸ ਦੇਈਏ ਕਿ ਜਦੋਂ ਕਾਜੋਲ ਨੇ ਵਿਆਹ ਕਰਵਾਇਆ ਸੀ, ਉਹ ਆਪਣੇ ਕਰੀਅਰ ਦੇ ਸਿਖਰ 'ਤੇ ਸੀ ਪਰ ਕਾਜੋਲ ਨੇ ਆਪਣੇ ਪਿਤਾ ਦੀ ਸਲਾਹ ਨਹੀਂ ਮੰਨੀ ਅਤੇ ਅਜੇ ਨਾਲ ਵਿਆਹ ਕਰਵਾ ਲਿਆ। ਹਾਲਾਂਕਿ ਪਿਤਾ ਕਾਜੋਲ ਦੇ ਵਿਆਹ ਦੇ ਵਿਰੁੱਧ ਸੀ ਪਰ ਉਸ ਦੀ ਮਾਂ ਤਨੁਜਾ ਨੇ ਵਿਆਹ ਦੌਰਾਨ ਉਸ ਦਾ ਬਹੁਤ ਸਮਰਥਨ ਕੀਤਾ।

ਕਾਜੋਲ ਦਾ ਅਜੇ ਨਾਲ ਵਿਆਹ ਕਰਨ ਦਾ ਫ਼ੈਸਲਾ ਸਹੀ ਸਾਬਤ ਹੋਇਆ। ਉਹ ਫ਼ਿਲਮਾਂ 'ਚ ਵੀ ਐਕਟਿਵ ਰਹੀ ਅਤੇ ਉਸ ਦੇ ਕਰੀਅਰ 'ਚ ਕੋਈ ਢਲਾਨ ਨਹੀਂ ਵੇਖਣ ਨੂੰ ਮਿਲੀ। ਕਾਜੋਲ ਹੁਣ ਦੋ ਬੱਚਿਆਂ ਦੀ ਮਾਂ ਬਣ ਗਈ ਹੈ।