ਫੈਂਟੇਸੀ ਉਦੋਂ ਕੰਮ ਕਰਦੀ ਹੈ, ਜਦੋਂ ਉਹ ਭਾਵਨਾਤਮਕ ਤੌਰ ''ਤੇ ਅਸਲੀ ਲੱਗੇ : ਸੂਰਜ ਸਿੰਘ

ਮੁੰਬਈ- ਭਾਰਤੀ ਸਿਨੇਮਾ ਵਿੱਚ ਆਪਣੀ ਵੱਖਰੀ ਪਛਾਣ ਬਣਾ ਰਹੇ ਬੀ-ਲਾਈਵ ਪ੍ਰੋਡਕਸ਼ਨ ਦੇ ਨਿਰਮਾਤਾ ਸੂਰਜ ਸਿੰਘ ਆਪਣੀ ਅਗਲੀ ਫਿਲਮ ‘ਰਾਹੁ ਕੇਤੂ’ ਨੂੰ ਲੈ ਕੇ ਕਾਫੀ ਉਤਸ਼ਾਹਿਤ ਹਨ। ਫਿਲਮ ਦੀ ਰਿਲੀਜ਼ ਤੋਂ ਪਹਿਲਾਂ ਉਨ੍ਹਾਂ ਨੇ ਹਾਈ-ਕੰਸੈਪਟ ਸਿਨੇਮਾ ਅਤੇ ਫੈਂਟੇਸੀ ਫਿਲਮਾਂ ਨੂੰ ਲੈ ਕੇ ਆਪਣੇ ਵਿਚਾਰ ਸਾਂਝੇ ਕੀਤੇ ਹਨ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਕੋਈ ਵੀ ਕਾਲਪਨਿਕ ਕਹਾਣੀ ਉਦੋਂ ਹੀ ਸਫਲ ਹੁੰਦੀ ਹੈ, ਜਦੋਂ ਉਹ ਦਰਸ਼ਕਾਂ ਨਾਲ ਭਾਵਨਾਤਮਕ ਤੌਰ 'ਤੇ ਜੁੜਦੀ ਹੈ।
ਫੈਂਟੇਸੀ ਲਈ ਜਜ਼ਬਾਤਾਂ ਦਾ ਹੋਣਾ ਜ਼ਰੂਰੀ
ਸੂਰਜ ਸਿੰਘ ਅਨੁਸਾਰ ਫੈਂਟੇਸੀ ਫਿਲਮਾਂ ਉਦੋਂ ਕੰਮ ਕਰਦੀਆਂ ਹਨ ਜਦੋਂ ਉਹ ਭਾਵਨਾਤਮਕ ਤੌਰ 'ਤੇ ਸੱਚੀਆਂ ਲੱਗਣ। ਉਨ੍ਹਾਂ ਕਿਹਾ ਕਿ ਭਾਵੇਂ ਫਿਲਮ ਦੀ ਦੁਨੀਆ ਅਸਲੀ ਨਾ ਹੋਵੇ, ਪਰ ਉਸ ਵਿੱਚ ਦਿਖਾਈਆਂ ਜਾਣ ਵਾਲੀਆਂ ਭਾਵਨਾਵਾਂ ਜਿਵੇਂ ਡਰ, ਪਿਆਰ, ਉਮੀਦ ਜਾਂ ਸੰਘਰਸ਼ ਦਰਸ਼ਕਾਂ ਲਈ ਜਾਣੀਆਂ-ਪਛਾਣੀਆਂ ਹੋਣੀਆਂ ਚਾਹੀਦੀਆਂ ਹਨ। ਉਨ੍ਹਾਂ ਮੁਤਾਬਕ ਦਰਸ਼ਕ ਸਿਨੇਮਾਘਰਾਂ ਵਿੱਚ ਵਿਜ਼ੂਅਲ ਚਮਕ-ਧਮਕ ਦੇਖਣ ਆਉਂਦੇ ਹਨ, ਪਰ ਫਿਲਮ ਨਾਲ ਉਦੋਂ ਹੀ ਜੁੜੇ ਰਹਿੰਦੇ ਹਨ ਜੇਕਰ ਉਸ ਵਿੱਚ ਡੂੰਘੇ ਜਜ਼ਬਾਤ ਹੋਣ।
‘ਫੁਕਰੇ’ ਦੇ ਨਿਰਮਾਤਾ ਨੇ ਕੀਤਾ ਹੈ ਨਿਰਦੇਸ਼ਨ
ਫਿਲਮ ‘ਰਾਹੁ ਕੇਤੂ’ ਦਾ ਨਿਰਦੇਸ਼ਨ ‘ਫੁਕਰੇ’ ਫੇਮ ਵਿਪੁਲ ਵਿਗ ਨੇ ਕੀਤਾ ਹੈ। ਇਸ ਫਿਲਮ ਵਿੱਚ ਬਾਲੀਵੁੱਡ ਦੇ ਕਈ ਦਿੱਗਜ ਕਲਾਕਾਰ ਆਪਣੀ ਅਦਾਕਾਰੀ ਦਾ ਜਲਵਾ ਦਿਖਾਉਣਗੇ, ਜਿਨ੍ਹਾਂ ਵਿੱਚ ਪੁਲਕਿਤ ਸਮਰਾਟ, ਵਰੁਣ ਸ਼ਰਮਾ, ਚੰਕੀ ਪਾਂਡੇ, ਸ਼ਾਲਿਨੀ ਪਾਂਡੇ, ਅਮਿਤ ਸਿਆਲ ਅਤੇ ਪਿਊਸ਼ ਮਿਸ਼ਰਾ ਸ਼ਾਮਲ ਹਨ। ਇਹ ਫਿਲਮ 16 ਜਨਵਰੀ ਨੂੰ ਸਿਨੇਮਾਘਰਾਂ ਵਿੱਚ ਦਸਤਕ ਦੇਣ ਜਾ ਰਹੀ ਹੈ।
ਬੀ-ਲਾਈਵ ਪ੍ਰੋਡਕਸ਼ਨ ਦਾ ਸਫ਼ਰ
ਸੂਰਜ ਸਿੰਘ ਬੀ-ਲਾਈਵ ਪ੍ਰੋਡਕਸ਼ਨ ਦੀ ਮੁੱਖ ਤਾਕਤ ਹਨ ਅਤੇ ਉਹ ਬਾਲਾਜੀ ਟੈਲੀਫਿਲਮਜ਼ ਵਿੱਚ ਵੀ ਅਹਿਮ ਜ਼ਿੰਮੇਵਾਰੀ ਨਿਭਾ ਰਹੇ ਹਨ। ਉਨ੍ਹਾਂ ਦੇ ਬੈਨਰ ਹੇਠ ਪਹਿਲਾਂ ਕਾਜੋਲ ਅਤੇ ਆਮਿਰ ਖਾਨ ਦੀ ਫਿਲਮ ‘ਸਲਾਮ ਵੈਂਕੀ’ ਬਣ ਚੁੱਕੀ ਹੈ, ਜਿਸ ਦੀ ਕਾਫੀ ਸ਼ਲਾਘਾ ਹੋਈ ਸੀ। ‘ਰਾਹੁ ਕੇਤੂ’ ਤੋਂ ਇਲਾਵਾ ਉਨ੍ਹਾਂ ਦੀ ਅਗਲੀ ਫਿਲਮ ‘ਅਜੇ’ ਵੀ ਪਾਈਪਲਾਈਨ ਵਿੱਚ ਹੈ, ਜਿਸ ਵਿੱਚ ਪਰੇਸ਼ ਰਾਵਲ ਅਤੇ ਅਨੰਤ ਜੋਸ਼ੀ ਮੁੱਖ ਭੂਮਿਕਾਵਾਂ ਵਿੱਚ ਨਜ਼ਰ ਆਉਣਗੇ।