ਸਲਮਾਨ ਤੋਂ ਲੈ ਕੇ ਨਵਾਜ਼ੂਦੀਨ ਤਕ, ਇਨ੍ਹਾਂ ਸਿਤਾਰਿਆਂ ’ਤੇ ਵੀ ਲੱਗੇ ਪਤਨੀ ਤੇ ਗਰਲਫੈਂਡ ਦੀ ਕੁੱਟਮਾਰ ਦੇ ਦੋਸ਼

ਮੁੰਬਈ (ਬਿਊਰੋ)– ਅਦਾਕਾਰ ਕਰਨ ਮਹਿਰਾ ਦੀ ਅਦਾਕਾਰਾ ਪਤਨੀ ਨਿਸ਼ਾ ਰਾਵਲ ਨੇ ਉਨ੍ਹਾਂ ’ਤੇ ਘਰੇਲੂ ਹਿੰਸਾ ਤੇ ਐਕਸਟ੍ਰਾ ਮੈਰੀਟਲ ਅਫੇਅਰ ਸਮੇਤ ਕਈ ਗੰਭੀਰ ਦੋਸ਼ ਲਗਾਏ ਹਨ। ਇਸ ਤੋਂ ਬਾਅਦ ਫ਼ਿਲਮੀ ਸਿਤਾਰਿਆਂ ਵਿਚਾਲੇ ਘਰੇਲੂ ਹਿੰਸਾ ਦਾ ਮੁੱਦਾ ਇਕ ਵਾਰ ਮੁੜ ਅੱਗ ਵਾਂਗ ਫੈਲ ਰਿਹਾ ਹੈ। ਅਜਿਹੇ ’ਚ ਅਸੀਂ ਤੁਹਾਨੂੰ ਉਨ੍ਹਾਂ ਸਿਤਾਰਿਆਂ ਬਾਰੇ ਦੱਸਣ ਜਾ ਰਹੇ ਹਾਂ, ਜਿਨ੍ਹਾਂ ’ਤੇ ਉਨ੍ਹਾਂ ਦੀ ਪਤਨੀ ਜਾਂ ਗਰਲਫਰੈਂਡ ਨੇ ਘਰੇਲੂ ਹਿੰਸਾ ਦੇ ਗੰਭੀਰ ਦੋਸ਼ ਲਗਾਏ ਹਨ।

ਸਲਮਾਨ ਖ਼ਾਨ
ਲਿਸਟ ’ਚ ਪਹਿਲਾ ਨਾਂ ਸੁਪਰਸਟਾਰ ਸਲਮਾਨ ਖ਼ਾਨ ਦਾ ਹੈ। ਸਲਮਾਨ ਖ਼ਾਨ ਤੇ ਐਸ਼ਵਰਿਆ ਰਾਏ ਤੋਂ ਜ਼ਿਆਦਾ ਸ਼ਾਇਦ ਹੀ ਕਿਸੇ ਦੂਜੇ ਸਿਤਾਰੇ ਦੇ ਇਸ਼ਕ ਦੇ ਚਰਚੇ ਤੁਸੀਂ ਸੁਣੇ ਹੋਣਗੇ। ਅਜਿਹੇ ’ਚ ਖੁਦ ਇਕ ਇੰਟਰਵਿਊ ਦੌਰਾਨ ਐਸ਼ਵਰਿਆ ਰਾਏ ਨੇ ਦੱਸਿਆ ਸੀ ਕਿ ਸਲਮਾਨ ਕਿਸ ਤਰ੍ਹਾਂ ਉਸ ’ਤੇ ਹੱਥ ਚੁੱਕਦੇ ਸਨ। ਐਸ਼ਵਰਿਆ ਦੇ ਨਾਲ-ਨਾਲ ਸੰਗੀਤਾ ਬਿਜਲਾਨੀ ਤੇ ਸੋਮੀ ਅਲੀ ਵੀ ਸਲਮਾਨ ਖ਼ਾਨ ਦੇ ਗੁੱਸੇ ਦੇ ਕਿੱਸੇ ਸਭ ਨੂੰ ਦੱਸ ਚੁੱਕੀਆਂ ਹਨ।

ਨਵਾਜ਼ੂਦੀਨ ਸਿੱਦੀਕੀ
ਨਵਾਜ਼ੂਦੀਨ ਸਿੱਦੀਕੀ ਦੀ ਪਤਨੀ ਆਲੀਆ ਨੇ ਵੀ ਉਨ੍ਹਾਂ ’ਤੇ ਪਿਛਲੇ ਸਾਲ ਘਰੇਲੂ ਹਿੰਸਾ ਦੇ ਦੋਸ਼ ਲਗਾਏ ਸਨ। ਗੰਭੀਰ ਦੋਸ਼ ਲਗਾਉਂਦਿਆਂ ਆਲੀਆ ਸਿੱਦੀਕੀ ਨੇ ਨਵਾਜ਼ੂਦੀਨ ਨੂੰ ਤਲਾਕ ਦਾ ਨੋਟਿਸ ਜਾਰੀ ਕੀਤਾ ਸੀ। ਹਾਲਾਂਕਿ ਕੁਝ ਸਮਾਂ ਪਹਿਲਾਂ ਖ਼ਬਰਾਂ ਸਾਹਮਣੇ ਆਈਆਂ ਸਨ ਕਿ ਆਲੀਆ ਨੇ ਇਸ ਰਿਸ਼ਤੇ ਨੂੰ ਇਕ ਹੋਰ ਮੌਕਾ ਦੇਣ ਦਾ ਮਨ ਬਣਾਇਆ ਹੈ।

ਆਦਿਤਿਆ ਪੰਚੋਲੀ
ਆਪਣੇ ਕਰੀਅਰ ਦੇ ਸ਼ੁਰੂਆਤੀ ਦੌਰ ’ਚ ਕੰਗਨਾ ਰਣੌਤ ਦਾ ਸਭ ਤੋਂ ਪਹਿਲਾ ਅਫੇਅਰ ਬਾਲੀਵੁੱਡ ਅਦਾਕਾਰ ਆਦਿਤਿਆ ਪੰਚੋਲੀ ਨਾਲ ਹੋਇਆ ਸੀ। ਆਦਿਤਿਆ ਕੰਗਨਾ ਤੋਂ ਉਮਰ ’ਚ 20 ਸਾਲ ਵੱਡੇ ਸਨ। ਦੋਵੇਂ ਕਈ ਸਾਲਾਂ ਤਕ ਲਿਵ ਇਨ ’ਚ ਵੀ ਰਹੇ ਸਨ। ਆਦਿਤਿਆ ਪਹਿਲਾਂ ਤੋਂ ਵਿਆਹੁਤਾ ਸਨ। ਉਨ੍ਹਾਂ ਦੀ ਪਤਨੀ ਅਦਾਕਾਰਾ ਜ਼ਰੀਨਾ ਵਹਾਬ ਹੈ। ਇਸ ਦੇ ਨਾਲ ਹੀ ਉਹ ਦੋ ਬੱਿਆਂ ਦੇ ਪਿਤਾ ਹਨ ਪਰ ਇਸ ਦੇ ਬਾਵਜੂਦ ਆਦਿਤਿਆ ਨੇ ਕੰਗਨਾ ਨਾਲ ਨਜ਼ਦੀਕੀ ਵਧਾਈ ਤੇ ਉਸ ਨਾਲ ਰਿਲੇਸ਼ਨਸ਼ਿਪ ’ਚ ਰਹੇ। ਕੰਗਨਾ ਨੇ ਆਦਿਤਿਆ ਪੰਚੋਲੀ ’ਤੇ ਕਈ ਗੰਭੀਰ ਦੋਸ਼ ਲਗਾਏ ਹਨ ਤੇ ਇਨ੍ਹਾਂ ਦਾ ਮਾਮਲਾ ਅਦਾਲਤ ਤਕ ਵੀ ਪਹੁੰਚਿਆ ਸੀ।

ਸੰਜੇ ਖ਼ਾਨ
70 ਤੇ 80 ਦੇ ਦਹਾਕੇ ਦੀ ਮਸ਼ਹੂਰ ਅਦਾਕਾਰਾ ਜ਼ੀਨਤ ਅਮਾਨ ਤੇ ਸੰਜੇ ਦਾ ਅਫੇਅਰ ਜਿਸ ਸਮੇਂ ਚੱਲ ਰਿਹਾ ਸੀ, ਉਸ ਸਮੇਂ ਸੰਜੇ ਦੇ ਤਿੰਨ ਬੱਚੇ ਸਨ। ਦੋਵਾਂ ਨੇ ਸਾਲ 1978 ’ਚ ਜੈਸਲਮੇਰ ’ਚ ਵਿਆਹ ਕਰਵਾ ਲਿਆ ਸੀ, ਜੋ ਇਕ ਸਾਲ ਵੀ ਨਹੀਂ ਚੱਲਿਆ। ਅਦਾਕਾਰਾ ਨੇ ਸੰਜੇ ’ਤੇ ਦੋਸ਼ ਲਗਾਇਆ ਸੀ ਕਿ ਉਸ ਨੇ ਆਪਣੀ ਪਹਿਲੀ ਪਤਨੀ ਦੇ ਸਾਹਮਣੇ ਉਸ ’ਤੇ ਹੱਥ ਚੁੱਕਿਆ ਪਰ ਜ਼ੀਨਤ ਦੇ ਦੋਸ਼ਾਂ ਨੂੰ ਅਦਾਕਾਰ ਨੇ ਗਲਤ ਦੱਸਿਆ ਸੀ।

ਓਮਪੁਰੀ
ਸਵਰਗੀ ਅਦਾਕਾਰ ਓਮਪੁਰੀ ’ਤੇ ਵੀ ਉਸ ਦੀ ਦੂਜੀ ਪਤਨੀ ਨੰਦਿਤਾ ਪੁਰੀ ਨੇ ਘਰੇਲੂ ਹਿੰਸਾ ਦੇ ਦੋਸ਼ ਲਗਾਏ ਸਨ। ਓਮਪੁਰੀ ਨੇ ਦੋ ਵਿਆਹ ਕੀਤੇ ਸਨ। 1991 ’ਚ ਉਨ੍ਹਾਂ ਨੇ ਅਨੂੰ ਕਪੂਰ ਦੀ ਭੈਣ ਸੀਮਾ ਕਪੂਰ ਨਾਲ ਵਿਆਹ ਕਰਵਾਇਆ ਪਰ ਇਹ ਵਿਆਹ 8 ਮਹੀਨੇ ਵੀ ਨਹੀਂ ਟਿਕਿਆ। 1993 ’ਚ ਓਮਪੁਰੀ ਨੇ ਜਰਨਲਿਸਟ ਨੰਦਿਤਾ ਪੁਰੀ ਨਾਲ ਵਿਆਹ ਕਰਵਾਇਆ। ਨੰਦਿਤਾ ਪੁਰੀ ਨਾਲ ਉਸ ਦਾ ਇਕ ਬੇਟਾ ਵੀ ਹੈ ਇਸ਼ਾਨ ਪੁਰੀ। ਲਗਭਗ 20 ਸਾਲਾਂ ਤਕ ਦੋਵਾਂ ਦਾ ਵਿਆਹ ਸਹੀ ਚੱਲਿਆ ਪਰ 2013 ’ਚ ਨੰਦਿਤਾ ਪੁਰੀ ਤੋਂ ਵੀ ਉਹ ਅਲੱਗ ਹੋ ਗਏ। ਉਸ ਦੀ ਪਤਨੀ ਨੰਦਿਤਾ ਨੇ ਓਮਪੁਰੀ ’ਤੇ ਇਕ ਕਿਤਾਬ ਲਿਖੀ ਸੀ, ਜਿਸ ’ਚ ਉਸ ਨੇ ਉਸ ਦੀ ਜ਼ਿੰਦਗੀ ਨੂੰ ਲੈ ਕੇ ਕਈ ਖੁਲਾਸੇ ਕੀਤੇ ਸਨ। ਉਸ ਦੌਰਾਨ ਨੰਦਿਤਾ ਨੇ ਓਮਪੁਰੀ ’ਤੇ ਘਰੇਲੂ ਹਿੰਸਾ ਦੇ ਦੋਸ਼ ਵੀ ਲਗਾਏ ਸਨ। ਇਹ ਮਾਮਲਾ ਪੁਲਸ ਤਕ ਪਹੁੰਚਿਆ ਸੀ।

ਸ਼ਾਲੀਨ ਭਨੋਟ
ਅਦਾਕਾਰ ਸ਼ਾਲੀਨ ਭਨੋਟ ’ਤੇ ਉਸ ਦੀ ਅਦਾਕਾਰਾ ਪਤਨੀ ਦਲਜੀਤ ਕੌਰ ਨੇ ਘਰੇਲੂ ਹਿੰਸਾ ਦੇ ਦੋਸ਼ ਲਗਾਏ ਸਨ। 2015 ’ਚ ਇਹ ਕੱਪਲ ਅਲੱਗ ਹੋ ਗਿਆ ਸੀ। ਫਿਲਹਾਲ ਦਿਲਜੀਤ ਸਿੰਗਲ ਮਦਰ ਦੇ ਰੂਪ ’ਚ ਆਪਣੀ ਜ਼ਿੰਦਗੀ ਦਾ ਆਨੰਦ ਮਾਣ ਰਹੀ ਹੈ। ਦਲਜੀਤ ਬਿੱਗ ਬੌਸ ’ਚ ਵੀ ਦਿਖਾਈ ਦੇ ਚੁੱਕੀ ਹੈ।

ਸੂਰਜ ਪੰਚੋਲੀ
3 ਜੂਨ 2013 ਨੂੰ ਜੁਹੂ ਸਥਿਤ ਆਪਣੇ ਹੀ ਘਰ ’ਚ ਪੱਖੇ ਨਾਲ ਲਟਕ ਕੇ ਜਿਆ ਖ਼ਾਨ ਨੇ ਜਾਨ ਦੇ ਦਿੱਤੀ ਸੀ। ਜਿਆ ਦੀ ਮੌਤ ਦੇ ਪਿੱਛੇ ਆਦਿਤਿਆ ਪੰਚੋਲੀ ਦੇ ਬੇਟੇ ਸੂਰਜ ਪੰਚੋਲੀ ਦਾ ਨਾਂ ਸਾਹਮਣੇ ਆਇਆ ਸੀ। ਜਿਆ ਨੇ ਵੀ ਆਪਣੇ ਸੁਸਾਈਡ ਨੋਟ ’ਚ ਸੂਰਜ ਪੰਚੋਲੀ ਨੂੰ ਲੈ ਕੇ ਕਈ ਸਾਰੇ ਖੁਲਾਸੇ ਕੀਤੇ ਸਨ। ਉਸ ਦੇ ਪਰਿਵਾਰ ਵਾਲਿਆਂ ਨੇ ਵੀ ਸੂਰਜ ਪੰਚੋਲੀ ’ਤੇ ਜਿਆ ਨੂੰ ਖੁਦਕੁਸ਼ੀ ਲਈ ਮਜਬੂਰ ਕਰਨ ਤੇ ਕੁੱਟਮਾਰ ਕਰਨ ਦਾ ਦੋਸ਼ ਲਗਾਇਆ ਸੀ।

ਨੋਟ– ਇਸ ਖ਼ਬਰ ’ਤੇ ਤੁਹਾਡੀ ਕੀ ਪ੍ਰਤੀਕਿਰਿਆ ਹੈ? ਕੁਮੈਂਟ ਕਰਕੇ ਜ਼ਰੂਰ ਦੱਸੋ।