ਮਾੜੇ ਦਿਨਾਂ ਨੂੰ ਯਾਦ ਕਰ ਰੋ ਪਏ ਬੌਬੀ ਦਿਓਲ, ਕਿਹਾ– ‘ਸੰਨੀ ਦਿਓਲ ਭਰਾ ਨਹੀਂ, ਪਿਤਾ ਵਾਂਗ’

ਮੁੰਬਈ (ਬਿਊਰੋ)– ਦੋ ਭਰਾਵਾਂ ਵਿਚਕਾਰ ਕਿੰਨਾ ਡੂੰਘਾ ਰਿਸ਼ਤਾ ਤੇ ਅਟੁੱਟ ਪਿਆਰ ਹੋ ਸਕਦਾ ਹੈ, ਇਸ ਦੀ ਸੰਨੀ ਦਿਓਲ ਤੇ ਬੌਬੀ ਦਿਓਲ ਜਿਊਂਦੀ ਜਾਗਦੀ ਮਿਸਾਲ ਹਨ। ਦੋਵੇਂ ਭਰਾ ਇਕੋ ਫ਼ਿਲਮ ਇੰਡਸਟਰੀ ’ਚ ਕੰਮ ਕਰ ਰਹੇ ਹਨ। ਦੋਵਾਂ ਨੇ ਆਪਣੀ ਜ਼ਿੰਦਗੀ ’ਚ ਉਤਾਰ-ਚੜ੍ਹਾਅ ਦੇਖੇ ਪਰ ਇਕ-ਦੂਜੇ ਦੇ ਰਿਸ਼ਤੇ ਨੂੰ ਕਦੇ ਕਮਜ਼ੋਰ ਨਹੀਂ ਹੋਣ ਦਿੱਤਾ। ਔਖੇ ਸਮੇਂ ’ਚ ਸੰਨੀ ਦਿਓਲ ਨੇ ਛੋਟੇ ਭਰਾ ਬੌਬੀ ਦਿਓਲ ਨੂੰ ਪੁੱਤਰ ਵਾਂਗ ਸੰਭਾਲਿਆ। ਹਾਲ ਹੀ ’ਚ ਬੌਬੀ ਦਿਓਲ ਭਰਾ ਸੰਨੀ ਦਿਓਲ ਨਾਲ ਆਪਣੇ ਰਿਸ਼ਤੇ ਤੇ ਮੁਸ਼ਕਿਲ ਦਿਨਾਂ ਨੂੰ ਯਾਦ ਕਰਕੇ ਭਾਵੁਕ ਹੋ ਗਏ ਸਨ। ਉਨ੍ਹਾਂ ਕਿਹਾ ਕਿ ਸੰਨੀ ਦਿਓਲ ਭਰਾ ਵਾਂਗ ਨਹੀਂ, ਪਿਤਾ ਵਾਂਗ ਹੈ।

ਬੌਬੀ ਦਿਓਲ ਇਨ੍ਹੀਂ ਦਿਨੀਂ ਫ਼ਿਲਮ ‘ਐਨੀਮਲ’ ਨੂੰ ਲੈ ਕੇ ਸੁਰਖ਼ੀਆਂ ’ਚ ਹਨ, ਜਿਸ ’ਚ ਉਨ੍ਹਾਂ ਦੇ ਖ਼ਤਰਨਾਕ ਲੁੱਕ ਦੀ ਤਾਰੀਫ਼ ਹੋ ਰਹੀ ਹੈ। ਬੌਬੀ ਦਿਓਲ ਨੇ ਸੰਨੀ ਦਿਓਲ ਨਾਲ ਆਪਣੇ ਰਿਸ਼ਤੇ ਬਾਰੇ ਗੱਲ ਕੀਤੀ। ਬੌਬੀ ਦਿਓਲ ਨੇ ਕਿਹਾ ਕਿ ਸੰਨੀ ਦਿਓਲ ਉਨ੍ਹਾਂ ਤੋਂ 10 ਸਾਲ ਵੱਡੇ ਹਨ, ਇਸ ਲਈ ਉਨ੍ਹਾਂ ਨੇ ਹਰ ਤਰ੍ਹਾਂ ਨਾਲ ਮਹਾਨਤਾ ਦਿਖਾਈ। ਭਾਵੇਂ ਸੰਨੀ ਦਿਓਲ ਖ਼ੁਦ ਪੜ੍ਹਾਈ ’ਚ ਚੰਗੇ ਨਹੀਂ ਸਨ ਪਰ ਉਹ ਬੌਬੀ ਦਿਓਲ ਦੀ ਪੜ੍ਹਾਈ ਨੂੰ ਲੈ ਕੇ ਹਮੇਸ਼ਾ ਚਿੰਤਿਤ ਰਹਿੰਦੇ ਸਨ।

ਬੌਬੀ ਦਿਓਲ ਨੇ ਕਿਹਾ, ‘‘ਮੈਂ ਸੋਚਦਾ ਸੀ ਕਿ ਭਰਾ ਆਪਣੀ ਪੜ੍ਹਾਈ ’ਤੇ ਧਿਆਨ ਕਿਉਂ ਨਹੀਂ ਦੇ ਰਿਹਾ? ਮੈਨੂੰ ਲੱਗਦਾ ਹੈ ਕਿ ਮੇਰੇ ਭਰਾ ਨੇ ਸੋਚਿਆ ਕਿ ਮੈਨੂੰ ਉਨ੍ਹਾਂ ਚੀਜ਼ਾਂ ’ਚ ਉੱਤਮ ਹੋਣਾ ਚਾਹੀਦਾ ਹੈ, ਜਿਨ੍ਹਾਂ ’ਚ ਉਹ ਕਮਜ਼ੋਰ ਸੀ ਪਰ ਉਸ ਸਮੇਂ ਮੈਨੂੰ ਇਹ ਸਭ ਕੁਝ ਸਮਝ ਨਹੀਂ ਆਇਆ। ਮੈਂ ਸੋਚਦਾ ਰਿਹਾ ਕਿ ਉਹ ਹਮੇਸ਼ਾ ਮੈਨੂੰ ਸਲਾਹ ਕਿਉਂ ਦਿੰਦੇ ਰਹਿੰਦੇ ਹਨ? ਆਖਿਰ ਉਹ ਮੇਰੇ ਭਰਾ ਹਨ, ਮੇਰਾ ਪਿਤਾ ਨਹੀਂ ਪਰ ਮੈਂ ਆਪਣੇ ਆਪ ਨੂੰ ਖ਼ੁਸ਼ਕਿਸਮਤ ਸਮਝਦਾ ਹਾਂ ਕਿ ਮੇਰਾ ਇਕ ਭਰਾ ਹੈ, ਜੋ ਮੇਰੇ ਲਈ ਪਿਤਾ ਵਰਗਾ ਰਿਹਾ ਹੈ।’’ ਇਹ ਕਹਿੰਦਿਆਂ ਬੌਬੀ ਦਿਓਲ ਦਾ ਮਨ ਭਰ ਗਿਆ ਤੇ ਉਹ ਰੌਣ ਲੱਗ ਪਏ।

ਇਹ ਖ਼ਬਰ ਵੀ ਪੜ੍ਹੋ : ਕੰਗਨਾ ਰਣੌਤ ਦੀ ‘ਐਮਰਜੈਂਸੀ’ ਫ਼ਿਲਮ ਦੀ ਰਿਲੀਜ਼ ਡੇਟ ਹੋਈ ਮੁਲਤਵੀ, ਜਾਣੋ ਕੀ ਹੈ ਵਜ੍ਹਾ

ਬੌਬੀ ਦਿਓਲ ਨੇ ਅੱਗੇ ਦੱਸਿਆ ਕਿ ਭਰਾ ਸੰਨੀ ਦਿਓਲ ਨੇ ਉਨ੍ਹਾਂ ਨੂੰ ਕੀ ਸਲਾਹ ਦਿੱਤੀ ਸੀ। ਉਨ੍ਹਾਂ ਕਿਹਾ, ‘‘ਮੇਰਾ ਭਰਾ ਵੱਡੇ ਦਿਲ ਦਾ ਵਿਅਕਤੀ ਹੈ, ਜਿਸ ਨੇ ਹਮੇਸ਼ਾ ਮੇਰਾ ਸਾਥ ਦਿੱਤਾ ਹੈ। ਮੈਨੂੰ ਔਖੇ ਸਮੇਂ ’ਚ ਉਨ੍ਹਾਂ ਦੀ ਸਲਾਹ ਯਾਦ ਹੈ। ਉਨ੍ਹਾਂ ਕਿਹਾ ਸੀ ਕਿ ਸਟਾਰਡਮ ਤੇ ਪ੍ਰਸਿੱਧੀ ਹਾਸਲ ਕਰਨ ਤੋਂ ਬਾਅਦ ਸਾਨੂੰ ਇਸ ’ਚ ਨਹੀਂ ਫਸਣਾ ਚਾਹੀਦਾ, ਸਗੋਂ ਇਕ ਨਵੇਂ ਕਲਾਕਾਰ ਦੀ ਤਰ੍ਹਾਂ ਸ਼ੁਰੂਆਤ ਕਰਨੀ ਚਾਹੀਦੀ ਹੈ ਤੇ ਸਖ਼ਤ ਮਿਹਨਤ ਕਰਨੀ ਚਾਹੀਦੀ ਹੈ।’’

ਜਿਥੇ ਸੰਨੀ ਦਿਓਲ ਨੂੰ ਹਾਲ ਹੀ ’ਚ ‘ਗਦਰ 2’ ’ਚ ਦੇਖਿਆ ਗਿਆ ਸੀ, ਉਥੇ ਹੀ ਉਹ ਜਲਦ ਹੀ ਰਾਜਕੁਮਾਰ ਸੰਤੋਸ਼ੀ ਤੇ ਆਮਿਰ ਖ਼ਾਨ ਦੀ ਫ਼ਿਲਮ ‘ਲਾਹੌਰ 1947’ ’ਚ ਨਜ਼ਰ ਆਉਣਗੇ, ਜਦਕਿ ਬੌਬੀ ਦਿਓਲ ਦੀ ‘ਐਨੀਮਲ’ ਫ਼ਿਲਮ 1 ਦਸੰਬਰ ਨੂੰ ਰਿਲੀਜ਼ ਹੋਵੇਗੀ। ਫ਼ਿਲਮ ’ਚ ਰਸ਼ਮਿਕਾ ਮੰਦਾਨਾ, ਰਣਬੀਰ ਕਪੂਰ ਤੇ ਅਨਿਲ ਕਪੂਰ ਨੇ ਕੰਮ ਕੀਤਾ ਹੈ। ਇਸ ਦਾ ਨਿਰਦੇਸ਼ਨ ਸੰਦੀਪ ਰੈੱਡੀ ਵਾਂਗਾ ਨੇ ਕੀਤਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ– ਇਸ ਖ਼ਬਰ ’ਤੇ ਆਪਣੀ ਪ੍ਰਤੀਕਿਰਿਆ ਕੁਮੈਂਟ ਕਰਕੇ ਸਾਂਝੀ ਕਰੋ।