ਘਰ ''ਚ ਐਂਟਰੀ ਕਰਦੇ ਹੀ ਸਿਧਾਰਥ ਸ਼ੁਕਲਾ ਦੇ ਲੱਗੀ ਸੱਟ, ਰਾਧੇ ਮਾਂ ਨੇ ਕੀਤਾ ''Signature'' ਡਾਂਸ (ਵੀਡੀਓ)
Monday, Oct 05, 2020 - 12:26 PM (IST)
ਮੁੰਬਈ (ਬਿਊਰੋ) — ਰਿਐਲਿਟੀ ਟੀ. ਵੀ. ਸ਼ੋਅ 'ਬਿੱਗ ਬੌਸ 14' ਦਾ ਪ੍ਰਸਾਰਣ ਸ਼ਨੀਵਾਰ ਤੋਂ ਸ਼ੁਰੂ ਹੋ ਚੁੱਕਾ ਹੈ। ਅਜਿਹੇ 'ਚ ਆਉਣ ਵਾਲੇ ਤਿੰਨ-ਸਾਢੇ ਤਿੰਨ ਮਹੀਨੇ ਤੱਕ ਦਰਸ਼ਕਾਂ ਦਾ ਖ਼ੂਬ ਮਨੋਰੰਜਨ ਹੋਣ ਵਾਲਾ ਹੈ। 'ਬਿੱਗ ਬੌਸ' ਦੇ ਦੂਜੇ ਦਿਨ ਸੀਨੀਅਰ ਮੁਕਾਬਲੇਬਾਜ਼ ਗੌਹਰ ਖਾਨ, ਹਿਨਾ ਖਾਨ ਤੇ ਸਿਧਾਰਥ ਸ਼ੁਕਲਾ ਨੇ ਘਰ ਦੇ ਮੁਕਾਬਲੇਬਾਜ਼ਾਂ ਦੇ ਕੰਮ ਤੈਅ ਕੀਤੇ। ਜਦੋਂ ਕਿ ਸਿਧਾਰਥ ਸ਼ੁਕਲਾ ਨੇ ਇਹ ਦੇਖਿਆ ਕਿ ਸੋਣ ਲਈ ਕਿਸ ਨੂੰ ਕਿਹਾੜਾ ਬੈੱਡ ਦਿੱਤਾ ਜਾਵੇਗਾ। ਗੌਹਰ ਖਾਨ ਦਾ ਕੰਮ ਘਰ 'ਚ ਹੋਰਨਾਂ ਮੈਂਬਰਾਂ ਵਿਚਕਾਰ ਰਸੋਈ (ਕਿਚਨ) ਦੇ ਕੰਮ ਨੂੰ ਵੰਡਣਾ ਸੀ। ਉਦੋਂ ਹੀ ਸਿਧਾਰਥ ਸ਼ੁਕਲਾ ਵੀ ਸਬਜ਼ੀ ਕੱਟਣ ਲੱਗਦੇ ਹਨ। ਇਸ ਦੌਰਾਨ ਉਨ੍ਹਾਂ ਦੇ ਹੱਥ 'ਤੇ ਮਾਮੂਲੀ ਜਿਹੀ ਸੱਟ ਲੱਗ ਜਾਂਦੀ ਹੈ। ਘਰ ਦੇ ਮੈਂਬਰ ਉਨ੍ਹਾਂ ਦੇ ਹੱਥ 'ਤੇ ਮਲੱਮ ਬੱਟੀ ਕਰਨ ਨੂੰ ਆਖਦੇ ਹਨ ਪਰ ਸਿਧਾਰਥ ਨੇ ਮਾਮੂਲੀ ਸੱਟ ਆਖ ਕੇ ਪੱਟੀ ਕਰਨ ਤੋਂ ਇਨਕਾਰ ਕਰ ਦਿੱਤਾ।
ਐਪੀਸੋਡ 'ਚ ਸਭ ਤੋਂ ਖ਼ਾਸ ਗੱਲ ਰਹੀ ਕਿ ਦੂਜੇ ਦਿਨ ਵੀ ਰਾਧੇ ਮਾਂ ਘਰ 'ਚ ਸਾਰਿਆਂ ਨੂੰ ਆਖਦੀ ਹੈ ਕਿ ਜੀਵਨ 'ਚ ਆਪਣੀ ਮਾਂ ਦੀ ਗੱਲ ਹਮੇਸ਼ਾ ਮੰਨਣੀ ਚਾਹੀਦੀ ਹੈ। ਉਨ੍ਹਾਂ ਨੇ ਸਾਰੇ ਮੁਕਾਬਲੇਬਾਜ਼ਾਂ ਨੂੰ ਮਿਲ ਕੇ ਰਹਿਣ ਲਈ ਕਿਹਾ। ਇਸੇ ਦੌਰਾਨ ਸਿਧਾਰਥ ਸ਼ੁਕਲਾ ਰਾਧੇ ਮਾਂ ਦੇ ਪੈਰ ਛੂਹ ਕੇ ਆਸ਼ੀਰਵਾਦ ਲੈਂਦੇ ਹਨ। ਘਰ 'ਚ ਰਾਧੇ ਮਾਂ ਡਾਂਸ ਕਰਦੀ ਹੋਈ ਵੀ ਨਜ਼ਰ ਆਈ। 'ਬਿੱਗ ਬੌਸ' ਦਾ ਸੀਜ਼ਨ ਸ਼ੁਰੂ ਹੁੰਦੇ ਹੀ ਮੁਕਾਬਲੇਬਾਜ਼ਾਂ 'ਚ ਲੜਾਈ ਵੀ ਸ਼ੁਰੂ ਹੋ ਗਈ। ਨਿੱਕੀ ਤੰਬੋਲੀ ਨਾਲ ਜੈਸਮੀਨ ਭਸੀਨ, ਏਜ਼ਾਜ ਖਾਨ ਤੇ ਸ਼ਹਿਜਾਦ ਦਿਓਲ ਦੀ ਲੜਾਈ ਹੁੰਦੀ ਹੈ। ਨਿੱਕੀ ਤੇ ਜੈਸਮੀਨ 'ਚ ਝਗੜਾ ਇੰਨਾ ਵਧ ਜਾਂਦਾ ਹੈ ਕਿ ਜੈਸਮੀਨ ਘਰ ਦੇ ਇੱਕ ਕੌਣੇ 'ਚ ਬੈਠ ਕੇ ਰੋਣ ਲੱਗਦੀ ਹੈ।
