ਹਰ ਕੋਈ 60 ਸਾਲਾਂ ਤੱਕ ਲੋਕਾਂ ਦੇ ਦਿਲਾਂ ''ਤੇ ਰਾਜ ਨਹੀਂ ਕਰ ਸਕਦਾ; ਧਰਮਿੰਦਰ ਨੂੰ ਯਾਦ ਕਰ ਬੋਲੇ ਨਸੀਰੂਦੀਨ ਸ਼ਾਹ

ਮੁੰਬਈ (ਏਜੰਸੀ)- ਅਦਾਕਾਰ ਨਸੀਰੂਦੀਨ ਸ਼ਾਹ ਨੇ ਮਰਹੂਮ ਧਰਮਿੰਦਰ ਨੂੰ ਯਾਦ ਕਰਦੇ ਹੋਏ ਮੰਗਲਵਾਰ ਨੂੰ ਕਿਹਾ ਕਿ ਹਰ ਕੋਈ 60 ਸਾਲਾਂ ਤੱਕ ਲੋਕਾਂ ਦੇ ਦਿਲਾਂ 'ਤੇ ਰਾਜ ਨਹੀਂ ਕਰ ਸਕਦਾ। ਸ਼ਾਹ ਨੇ ਧਰਮਿੰਦਰ ਨਾਲ 'ਗੁਲਾਮੀ' ਅਤੇ 2 ਹੋਰ ਫਿਲਮਾਂ ਵਿੱਚ ਸਹਿ-ਕਲਾਕਾਰ ਵਜੋਂ ਕੰਮ ਕੀਤਾ ਸੀ। ਧਰਮਿੰਦਰ ਦਾ ਸੋਮਵਾਰ ਨੂੰ 89 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ।

ਜੇਪੀ ਦੱਤਾ ਦੀ 1985 ਦੀ ਫਿਲਮ 'ਗੁਲਾਮੀ' ਦਾ ਪੋਸਟਰ ਇੰਸਟਾਗ੍ਰਾਮ 'ਤੇ ਸਾਂਝਾ ਕਰਦੇ ਹੋਏ ਸ਼ਾਹ ਨੇ ਲਿਖਿਆ, "ਇਹ ਪਹਿਲੀ ਵਾਰ ਸੀ ਜਦੋਂ ਮੈਂ ਉਸ ਮਹਾਨ ਵਿਅਕਤੀ (ਧਰਮਿੰਦਰ) ਨੂੰ ਮਿਲਿਆ ਸੀ। ਮੈਨੂੰ ਇਸ ਫਿਲਮ ਅਤੇ 2 ਹੋਰ ਫਿਲਮਾਂ ਵਿੱਚ ਉਨ੍ਹਾਂ ਨਾਲ ਕੰਮ ਕਰਨ ਦਾ ਮੌਕਾ ਮਿਲਿਆ। ਧਰਮਿੰਦਰ ਦੇ ਦੇਹਾਂਤ ਨਾਲ ਖਾਲ੍ਹੀ ਹੋਈ ਜਗ੍ਹਾ ਨੂੰ ਭਰਨਾ ਅਸੰਭਵ ਹੈ। ਮੈਂ ਉਨ੍ਹਾਂ ਤੋਂ ਮਿਲੇ ਪਿਆਰ ਦੀ ਕਦਰ ਕਰਦਾ ਹਾਂ। ਹਰ ਕੋਈ 60 ਸਾਲਾਂ ਤੱਕ ਲੋਕਾਂ ਦੇ ਦਿਲਾਂ 'ਤੇ ਰਾਜ ਨਹੀਂ ਕਰ ਸਕਦਾ। ਉਨ੍ਹਾਂ ਦੀ ਆਤਮਾ ਨੂੰ ਸ਼ਾਂਤੀ ਮਿਲੇ। ਆਮੀਨ।" ਸ਼ਾਹ ਅਤੇ ਧਰਮਿੰਦਰ ਨੇ 1992 ਦੀ ਫਿਲਮ 'ਤਹਿਲਕਾ' ਅਤੇ 2023 ਦੀ ਵੈੱਬ ਸੀਰੀਜ਼ 'ਤਾਜ: ਡਿਵਾਈਡਡ ਬਾਏ ਬਲੱਡ' ਵਿੱਚ ਵੀ ਇਕੱਠੇ ਕੰਮ ਕੀਤਾ ਸੀ।