ਇਕ-ਦੂਜੇ ਤੋਂ ਕਾਫੀ ਕੁਝ ਸਿੱਖ ਰਹੇ ਹਨ ''ਦਿ ਫੈਮਿਲੀ ਮੈਨ 3'' ਦੇ ਅਦਾਕਾਰ ਬਾਜਪਾਈ ਤੇ ਅਹਿਲਾਵਤ

ਮੁੰਬਈ- ਲੰਬੇ ਸਮੇਂ ਤੋਂ ਉਡੀਕੀ ਜਾ ਰਹੀ ਵੈੱਬ ਸੀਰੀਜ਼ 'ਦ ਫੈਮਿਲੀ ਮੈਨ 3' ਇਸ ਵਾਰ ਖਾਸ ਚਰਚਾ ਵਿੱਚ ਹੈ, ਕਿਉਂਕਿ ਇਸ ਵਿੱਚ 'ਗੈਂਗਸ ਆਫ਼ ਵਾਸੇਪੁਰ' ਦੇ ਪਿਤਾ-ਪੁੱਤਰ ਦੀ ਜੋੜੀ-ਮਨੋਜ ਬਾਜਪਾਈ (56) ਅਤੇ ਜੈਦੀਪ ਅਹਲਾਵਤ (45)-ਇੱਕ-ਦੂਜੇ ਦੇ ਦੁਸ਼ਮਣ ਦੇ ਰੂਪ ਵਿੱਚ ਨਜ਼ਰ ਆਉਣਗੇ। ਦੋਵੇਂ ਅਦਾਕਾਰ 'ਦ ਫੈਮਿਲੀ ਮੈਨ 3' ਵਿੱਚ ਕੰਮ ਕਰਦੇ ਹੋਏ ਇੱਕ-ਦੂਜੇ ਦੀ ਪ੍ਰਤਿਭਾ ਦੀ ਤਾਰੀਫ਼ ਕਰਦੇ ਨਹੀਂ ਥੱਕ ਰਹੇ। 
'ਪਾਤਾਲ ਲੋਕ' ਤੋਂ ਬਾਅਦ ਜੈਦੀਪ ਦੀ ਪ੍ਰਤਿਭਾ ਦੇ ਕਾਇਲ ਹੋਏ ਬਾਜਪਾਈ
ਮਨੋਜ ਬਾਜਪਾਈ ਜਿਨ੍ਹਾਂ ਨੂੰ ਜੈਦੀਪ ਅਹਲਾਵਤ ਬਹੁਤ ਜ਼ਿਆਦਾ ਸਤਿਕਾਰ ਦਿੰਦੇ ਹਨ, ਨੇ ਕਿਹਾ ਕਿ ਉਹ ਅਹਲਾਵਤ ਦੀ ਪ੍ਰਤਿਭਾ ਤੋਂ ਬਹੁਤ ਪ੍ਰਭਾਵਿਤ ਹਨ। ਬਾਜਪਾਈ ਨੇ ਖਾਸ ਤੌਰ 'ਤੇ ਜੈਦੀਪ ਅਹਲਾਵਤ ਦੀ ਹਿੱਟ ਵੈੱਬ ਸੀਰੀਜ਼ 'ਪਾਤਾਲ ਲੋਕ' ਦਾ ਜ਼ਿਕਰ ਕੀਤਾ। ਮਨੋਜ ਬਾਜਪਾਈ ਨੇ ਕਿਹਾ, "ਮੈਂ 'ਪਾਤਾਲ ਲੋਕ' ਦੇਖੀ ਹੈ ਅਤੇ ਮੈਂ ਇਸਦੇ ਹਰ ਦ੍ਰਿਸ਼ ਬਾਰੇ ਗੱਲ ਕਰ ਸਕਦਾ ਹਾਂ। ਮੈਂ ਜੈਦੀਪ ਨਾਲ ਇਸ 'ਤੇ ਵਿਸਥਾਰ ਵਿੱਚ ਗੱਲ ਕੀਤੀ ਹੈ"। ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਉਨ੍ਹਾਂ ਨੂੰ 'ਪਾਤਾਲ ਲੋਕ' ਵਿੱਚ ਜੈਦੀਪ ਦਾ ਕੰਮ ਬਹੁਤ ਪਸੰਦ ਆਇਆ।
ਇਸ ਦੇ ਜਵਾਬ ਵਿੱਚ ਜੈਦੀਪ ਅਹਲਾਵਤ ਨੇ ਕਿਹਾ ਕਿ ਉਨ੍ਹਾਂ ਨੇ ਮਨੋਜ ਬਾਜਪਾਈ ਦੀਆਂ ਲਗਭਗ ਸਾਰੀਆਂ ਫਿਲਮਾਂ ਦੇਖੀਆਂ ਹਨ। ਅਹਲਾਵਤ ਨੇ ਕਿਹਾ ਕਿ ਮਨੋਜ ਬਾਜਪਾਈ ਦੀ ਹਰ ਪ੍ਰਫਾਰਮੈਂਸ ਕਈ ਅਦਾਕਾਰਾਂ ਲਈ 'ਮਾਸਟਰਕਲਾਸ' ਹੈ।
'ਗੈਂਗਸ ਆਫ਼ ਵਾਸੇਪੁਰ' ਤੋਂ 'ਦ ਫੈਮਿਲੀ ਮੈਨ 3' ਤੱਕ ਦਾ ਸਫ਼ਰ
ਦੋਹਾਂ ਕਲਾਕਾਰਾਂ ਦੀ ਪਹਿਲੀ ਮੁਲਾਕਾਤ "ਚਟਗਾਂਵ" ਦੇ ਸੈੱਟ 'ਤੇ ਹੋਈ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਅਨੁਰਾਗ ਕਸ਼ਯਪ ਦੀ ਦੋ-ਭਾਗਾਂ ਵਾਲੀ ਫਿਲਮ "ਗੈਂਗਸ ਆਫ਼ ਵਾਸੇਪੁਰ" ਵਿੱਚ ਇਕੱਠੇ ਕੰਮ ਕੀਤਾ। ਹੁਣ, 13 ਸਾਲਾਂ ਬਾਅਦ ਉਹ 'ਦ ਫੈਮਿਲੀ ਮੈਨ 3' ਵਿੱਚ ਇੱਕ-ਦੂਜੇ ਦੇ ਖਿਲਾਫ ਭੂਮਿਕਾਵਾਂ ਨਿਭਾਉਂਦੇ ਨਜ਼ਰ ਆਉਣਗੇ। ਇਸ ਸੀਰੀਜ਼ ਵਿੱਚ ਮਨੋਜ ਬਾਜਪਾਈ ਖੁਫੀਆ ਅਧਿਕਾਰੀ ਸ਼੍ਰੀਕਾਂਤ ਤਿਵਾਰੀ ਦੀ ਭੂਮਿਕਾ ਵਿੱਚ ਹਨ। ਜਦਕਿ ਜੈਦੀਪ ਅਹਲਾਵਤ ਰੁਕਮਾ ਨਾਮਕ ਖਲਨਾਇਕ ਦਾ ਕਿਰਦਾਰ ਨਿਭਾਉਣਗੇ।
ਗੁਰੂ-ਚੇਲਾ ਨਹੀਂ, ਇੱਕ-ਦੂਜੇ ਤੋਂ ਸਿੱਖਦੇ ਹਾਂ
ਜਦੋਂ ਦੋਵਾਂ ਤੋਂ ਪੁੱਛਿਆ ਗਿਆ ਕਿ ਕੀ ਉਨ੍ਹਾਂ ਦਾ ਰਿਸ਼ਤਾ ਗੁਰੂ-ਚੇਲੇ ਵਰਗਾ ਹੈ, ਤਾਂ ਬਾਜਪਾਈ ਨੇ ਤੁਰੰਤ ਇਸ ਤੋਂ ਇਨਕਾਰ ਕਰ ਦਿੱਤਾ। ਮਨੋਜ ਬਾਜਪਾਈ ਨੇ ਕਿਹਾ, "ਇਹ (ਰਿਸ਼ਤਾ) ਗੁਰੂ-ਚੇਲੇ ਵਰਗਾ ਨਹੀਂ ਹੈ। ਉਹ ਬਹੁਤ ਵੱਡੀ ਗੱਲ ਹੁੰਦੀ ਹੈ"। ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਅਸੀਂ ਇੱਕ-ਦੂਜੇ ਦੇ ਕੰਮ ਤੋਂ ਬਹੁਤ ਕੁਝ ਸਿੱਖਦੇ ਹਾਂ, ਬਸ ਇੰਨਾ ਹੀ।
ਇਸ ਸੀਰੀਜ਼ ਵਿੱਚ ਨਿਮਰਤ ਕੌਰ, ਸ਼ਾਰਿਬ ਹਾਸ਼ਮੀ, ਪ੍ਰਿਯਾਮਣੀ, ਅਸ਼ਲੇਸ਼ਾ ਠਾਕੁਰ, ਵੇਦਾਂਤ ਸਿਨਹਾ, ਸ਼੍ਰੇਆ ਧਨਵੰਤਰੀ ਅਤੇ ਗੁਲ ਪਨਾਗ ਵੀ ਅਹਿਮ ਭੂਮਿਕਾਵਾਂ ਵਿੱਚ ਨਜ਼ਰ ਆਉਣਗੇ। 'ਦ ਫੈਮਿਲੀ ਮੈਨ 3' 21 ਨਵੰਬਰ ਨੂੰ ਪ੍ਰਾਈਮ ਵੀਡੀਓ 'ਤੇ ਰਿਲੀਜ਼ ਹੋਵੇਗੀ।'