''ਬਿੰਦੀਆ ਕੇ ਬਾਹੁਬਲੀ'' ਸੀਜ਼ਨ 2 ਦਾ ਧਮਾਕਾ; ਸਿਆਸਤ ਤੋਂ ਸ਼ੁਰੂ ਹੋਈ ਜੰਗ ਹੁਣ ਬਣੀ ਜਾਨਲੇਵਾ

ਮੁੰਬਈ- 'ਬਿੰਦੀਆ ਕੇ ਬਾਹੁਬਲੀ' ਦੀ ਦਮਦਾਰ ਦੁਨੀਆ ਇੱਕ ਵਾਰ ਫਿਰ ਵਾਪਸੀ ਲਈ ਤਿਆਰ ਹੈ। ਰਾਜ ਅਮਿਤ ਕੁਮਾਰ ਦੁਆਰਾ ਲਿਖੀ ਅਤੇ ਨਿਰਦੇਸ਼ਿਤ ਇਸ ਸੀਰੀਜ਼ ਦਾ ਦੂਜਾ ਸੀਜ਼ਨ 21 ਜਨਵਰੀ ਤੋਂ ਅਮੇਜ਼ਨ ਪ੍ਰਾਈਮ ਵੀਡੀਓ ਅਤੇ ਅਮੇਜ਼ਨ ਐਮਐਕਸ ਪਲੇਅਰ 'ਤੇ ਸਟ੍ਰੀਮ ਹੋਣ ਜਾ ਰਿਹਾ ਹੈ। ਇਸ ਵਾਰ ਦੀ ਕਹਾਣੀ ਸਿਰਫ਼ ਸਿਆਸਤ ਤੱਕ ਸੀਮਿਤ ਨਹੀਂ ਹੈ, ਸਗੋਂ ਇਹ ਪਹਿਲਾਂ ਨਾਲੋਂ ਕਿਤੇ ਵੱਧ ਨਿੱਜੀ ਅਤੇ ਖ਼ਤਰਨਾਕ ਹੋ ਚੁੱਕੀ ਹੈ।
ਪਿਤਾ-ਪੁੱਤਰ ਦੀ ਜੰਗ ਵਿੱਚ ਬਦਲੀ ਸਿਆਸਤ
ਸਰੋਤਾਂ ਅਨੁਸਾਰ ਇਸ ਸੀਜ਼ਨ ਵਿੱਚ ਪਿਤਾ ਅਤੇ ਪੁੱਤਰ ਵਿਚਕਾਰ ਸੱਤਾ ਦੇ ਸੰਘਰਸ਼ ਨੂੰ ਡੂੰਘਾਈ ਨਾਲ ਦਿਖਾਇਆ ਗਿਆ ਹੈ। ਕਹਾਣੀ ਵਿੱਚ ਮਾਫੀਆ ਡਾਨ 'ਬੜੇ ਦਵਨ' ਦੀ ਗ੍ਰਿਫਤਾਰੀ ਤੋਂ ਬਾਅਦ ਸੱਤਾ ਦਾ ਸੰਤੁਲਨ ਵਿਗੜ ਜਾਂਦਾ ਹੈ, ਜਿਸਦਾ ਫਾਇਦਾ ਉਠਾਉਂਦੇ ਹੋਏ ਉਸਦਾ ਲਾਲਚੀ ਪੁੱਤਰ 'ਛੋਟੇ ਦਵਨ' ਆਪਣੇ ਹੀ ਪਰਿਵਾਰ ਦੇ ਖਿਲਾਫ ਹੋ ਕੇ ਸੱਤਾ ਹਥਿਆਉਣ ਦੀ ਕੋਸ਼ਿਸ਼ ਕਰਦਾ ਹੈ। ਇਹ ਰਿਸ਼ਤਿਆਂ ਦਾ ਟਕਰਾਅ ਹੁਣ ਇੱਕ ਭਿਆਨਕ ਸੱਤਾ ਸੰਘਰਸ਼ ਦਾ ਰੂਪ ਲੈ ਚੁੱਕਾ ਹੈ।
'ਪਹਿਲਾ ਸੀਜ਼ਨ ਨਮਕ ਸੀ, ਤਾਂ ਦੂਜਾ ਟਕੀਲਾ ਸ਼ਾਟ'
ਨਿਰਦੇਸ਼ਕ ਰਾਜ ਅਮਿਤ ਕੁਮਾਰ ਨੇ ਸੀਜ਼ਨ 2 ਬਾਰੇ ਦਿਲਚਸਪ ਖੁਲਾਸਾ ਕਰਦਿਆਂ ਕਿਹਾ, "ਜੇਕਰ ਪਹਿਲਾ ਸੀਜ਼ਨ ਸੈੱਟ-ਅੱਪ ਸੀ, ਤਾਂ ਇਹ ਉਸਦਾ ਪੇ-ਆਫ ਹੈ। ਜੇਕਰ ਸੀਜ਼ਨ 1 ਨਮਕ ਸੀ, ਤਾਂ ਸੀਜ਼ਨ 2 ਟਕੀਲਾ ਸ਼ਾਟ ਹੈ"। ਉਨ੍ਹਾਂ ਅਨੁਸਾਰ, ਪਿਛਲੇ ਸੀਜ਼ਨ ਵਿੱਚ ਕਾਮੇਡੀ ਦਾ ਅੰਸ਼ ਸੀ, ਪਰ ਇਸ ਵਾਰ ਕਾਮੇਡੀ ਤ੍ਰਾਸਦੀ ਵਿੱਚ ਬਦਲ ਗਈ ਹੈ ਅਤੇ ਸੰਘਰਸ਼ ਭਾਵਨਾਤਮਕ ਤੇ ਨੈਤਿਕ ਤੌਰ 'ਤੇ ਬਹੁਤ ਖ਼ਤਰਨਾਕ ਹੋ ਗਿਆ ਹੈ।
ਦਿੱਗਜ ਸਿਤਾਰਿਆਂ ਨਾਲ ਸਜੀ ਹੈ ਸੀਰੀਜ਼
ਇਸ ਸੀਰੀਜ਼ ਵਿੱਚ ਬਾਲੀਵੁੱਡ ਦੇ ਕਈ ਮੰਨੇ-ਪ੍ਰਮੰਨੇ ਚਿਹਰੇ ਆਪਣੀ ਅਦਾਕਾਰੀ ਦਾ ਜੌਹਰ ਦਿਖਾਉਂਦੇ ਨਜ਼ਰ ਆਉਣਗੇ:
• ਰਣਵੀਰ ਸ਼ੌਰੀ ਅਤੇ ਸੌਰਭ ਸ਼ੁਕਲਾ ਮੁੱਖ ਭੂਮਿਕਾਵਾਂ ਵਿੱਚ ਹਨ।
• ਇਸ ਤੋਂ ਇਲਾਵਾ ਸੀਮਾ ਬਿਸਵਾਸ, ਸਈ ਤਾਮ੍ਹਣਕਰ, ਤਨਿਸ਼ਠਾ ਚੈਟਰਜੀ, ਕ੍ਰਾਂਤੀ ਪ੍ਰਕਾਸ਼ ਝਾਅ, ਦਿਬਯੇਂਦੂ ਭੱਟਾਚਾਰੀਆ ਅਤੇ ਸ਼ੀਬਾ ਚੱਢਾ ਵੀ ਅਹਿਮ ਕਿਰਦਾਰਾਂ ਵਿੱਚ ਦਿਖਾਈ ਦੇਣਗੇ।