ਸ਼ਰਾਬ ਸਮੱਗਲਰਾਂ ਦਾ ਧੰਦਾ ਜ਼ੋਰਾਂ ''ਤੇ, ਮਿਲਾਵਟ ਹੋਣ ਕਰਕੇ ਹੋਣ ਲੱਗੀਆਂ ਮੌਤਾਂ

ਜਲੰਧਰ (ਸ਼ੋਰੀ)— ਉਂਝ ਤਾਂ ਪੁਲਸ ਕਮਿਸ਼ਨਰੇਟ ਦੀ ਟੀਮ ਮਹਾਨਗਰ 'ਚ ਕ੍ਰਾਈਮ ਕੰਟਰੋਲ ਕਰਨ 'ਚ ਲੱਗੀ ਹੋਈ ਹੈ ਪਰ ਸ਼ਾਇਦ ਪੁਲਸ ਸੀਨੀਅਰ ਅਧਿਕਾਰੀਆਂ ਦਾ ਧਿਆਨ ਵੈਸਟ ਹਲਕੇ ਵੱਲ ਘੱਟ ਹੈ ਅਤੇ ਇਸ ਗੱਲ ਦਾ ਫਾਇਦਾ ਚੁੱਕਦੇ ਹੋਏ ਸ਼ਰਾਬ ਸਮੱਗਲਰ ਮਿਲਾਵਟੀ ਅਤੇ ਘਟੀਆ ਕਿਸਮ ਦੀ ਸ਼ਰਾਬ ਦੀ ਸਪਲਾਈ ਲੋਕਾਂ ਨੂੰ ਕਰ ਰਹੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਕਰੀਬ 2 ਮਹੀਨੇ 'ਚ 2 ਲੋਕਾਂ ਦੀ ਘਟੀਆ ਸ਼ਰਾਬ ਪੀਣ ਕਾਰਨ ਹਾਲਾਤ ਵਿਗੜ ਗਈ ਅਤੇ ਉਨ੍ਹਾਂ ਦੀ ਮੌਤ ਹੋ ਗਈ ਸੀ।
ਇਲਾਕੇ ਦੇ ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਮੰਗੂ ਬਸਤੀ ਅਤੇ ਭਾਰਗੋ ਕੈਂਪ ਥਾਣੇ ਦੇ ਕੋਲ ਹੀ ਸ਼ਰਾਬ ਸ਼ਰੇਆਮ ਸ਼ਰਾਬ ਵੇਚਣ ਵਾਲਿਆਂ ਨੂੰ ਇਲਾਕੇ ਦਾ ਬੱਚਾ-ਬੱਚਾ ਤਕ ਜਾਣਦਾ ਹੈ ਕਿ ਉਹ ਸ਼ਰੇਆਮ ਸ਼ਾਮ ਹੁੰਦੇ ਹੀ ਸ਼ਰਾਬ ਵੇਚਦੇ ਹਨ। ਜ਼ਿਆਦਾਤਰ ਪ੍ਰਵਾਸੀ ਮਜ਼ਦੂਰ ਸਸਤੀ ਹੋਣ ਦੇ ਚੱਕਰ 'ਚ ਠੇਕੇ ਦੇ ਬਜਾਏ ਇਨ੍ਹਾਂ ਤੋਂ ਸ਼ਰਾਬ ਖਰੀਦਦੇ ਹਨ। ਥਾਣਾ ਭਾਰਗੋ ਕੈਂਪ, ਥਾਣਾ ਨੰ. 5 ਅਤੇ ਬਸਤੀ ਬਾਵਾ ਖੇਲ ਤਿੰਨੋਂ ਇਲਾਕਿਆਂ 'ਚ ਸ਼ਰਾਬ ਦੀ ਸਪਲਾਈ ਬਾਰੇ ਕਈ ਵਾਰ ਇਲਾਕੇ ਦੇ ਪਤਵੰਤੇ ਲੋਕ ਪੁਲਸ ਸੀਨੀਅਰ ਅਧਿਕਾਰੀਆਂ ਨੂੰ ਦਫਤਰਾਂ 'ਚ ਮਿਲੇ ਪਰ ਸ਼ਰਾਬ ਦੀ ਵਿਕਰੀ ਬੰਦ ਹੋਣ ਦੀ ਬਜਾਏ ਵਧਣੀ ਸ਼ੁਰੂ ਹੋ ਗਈ ਹੈ।

ਪੁਲਸ ਦੀਆਂ ਕੁਝ ਕਾਲੀਆਂ ਭੇਡਾਂ ਵੀ ਹਨ ਸ਼ਾਮਲ
ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਇਸ ਮਾਮਲੇ 'ਚ ਦਰਅਸਲ ਵਧੀਆ ਫਾਰਮੂਲਾ ਥਾਣੇ 'ਚ ਕਾਫੀ ਦੇਰ ਤੋਂ ਤਾਇਨਾਤ ਪੁਲਸ ਨੌਜਵਾਨ ਅਪਣਾ ਰਹੇ ਹਨ, ਕੰਮ ਤਾਂ ਉਹ ਪੰਜਾਬ ਪੁਲਸ ਲਈ ਕਰਦੇ ਹਨ ਅਤੇ ਪੈਸੇ ਸ਼ਰਾਬ ਸਮੱਗਲਰਾਂ ਤੋਂ ਲੈਂਦੇ ਹਨ। ਪੁਲਸ ਦੀਆਂ ਇਨ੍ਹਾਂ ਕਾਲੀਆਂ ਭੇਡਾਂ ਕਾਰਣ ਸ਼ਰਾਬ ਸਮੱਗਲਰਾਂ ਨੂੰ ਥਾਣੇ 'ਚ ਬੈਠਣ ਲਈ ਕੁਰਸੀਆਂ ਮਿਲਦੀਆਂ ਹਨ। ਐਕਸਾਈਜ਼ ਵਿਭਾਗ ਵੱਲੋਂ ਜੇਕਰ ਸ਼ਰਾਬ ਸਮੱਗਲਰਾਂ ਨੂੰ ਫੜਿਆ ਜਾਂਦਾ ਹੈ ਤਾਂ ਉਨ੍ਹਾਂ ਨੂੰ ਥਾਣੇ 'ਚੋਂ ਜ਼ਮਾਨਤ 'ਤੇ ਰਿਹਾਅ ਕਰ ਦਿੱਤਾ ਜਾਂਦਾ ਹੈ, ਜਿਸ ਦਾ ਫਾਇਦਾ ਚੁੱਕ ਕੇ ਉਹ ਜ਼ਮਾਨਤ ਹੋਣ ਤੋਂ ਬਾਅਦ ਦੋਬਾਰਾ ਸ਼ਰਾਬ ਵੇਚਣ ਦਾ ਧੰਦਾ ਕਰਦੇ ਹਨ।

ਨਸ਼ੇ ਵਾਲੀਆਂ ਗੋਲੀਆਂ ਪਾ ਕੇ ਬਣਾਉਂਦੇ ਹਨ ਮਿਲਾਵਟੀ ਸ਼ਰਾਬ
ਸ਼ਰਾਬ ਸਮੱਗਲਿੰਗ ਕਰਨ ਵਾਲੇ ਲੋਕਾਂ ਨੂੰ ਸ਼ਰਾਬ ਨਹੀਂ ਸਗੋਂ ਜ਼ਹਿਰ ਵੇਚਣ ਦਾ ਕੰਮ ਕਰ ਰਹੇ ਹਨ। ਠੇਕੇ ਤੋਂ ਸ਼ਰਾਬ ਲੈਣ ਦੇ ਸਥਾਨ 'ਤੇ ਸਸਤੀ ਸ਼ਰਾਬ ਦੀ ਬੋਤਲ ਮਿਲਣ ਕਾਰਨ ਲੋਕ ਸਮੱਗਲਰਾਂ ਤੋਂ ਸ਼ਰਾਬ ਪੀਂਦੇ ਹਨ ਅਤੇ 2 ਪੈੱਗ ਲਾਉਂਦੇ ਹੀ ਉਨ੍ਹਾਂ ਨੂੰ ਅੱਧੀ ਬੋਤਲ ਦਾ ਨਸ਼ਾ ਹੋ ਜਾਂਦਾ ਹੈ ਕਿਉਂਕਿ ਸਮੱਗਲਰ ਸ਼ਰਾਬ ਠੇਕੇ ਤੋਂ ਲਿਆ ਕੇ ਇਕੱਲੀ-ਇਕੱਲੀ ਬੋਤਲ ਖੋਲ੍ਹ ਕੇ ਬੋਤਲ ਅੱਧੀ ਕਰ ਕੇ ਨਸ਼ੇ ਵਾਲੀਆਂ ਗੋਲੀਆਂ ਅਤੇ ਕੈਮੀਕਲ ਪਾਣੀ ਆਦਿ ਪਾ ਦਿੰਦੇ ਹਨ। ਜੋ ਵੀ ਇਸ ਸ਼ਰਾਬ ਦਾ ਸੇਵਨ ਕਰਦਾ ਹੈ ਤਾਂ ਕੁਝ ਮਹੀਨੇ 'ਚ ਹੀ ਇਸ ਦੇ ਨਤੀਜੇ ਸਾਹਮਣੇ ਆ ਜਾਂਦੇ ਹਨ, ਵਿਅਕਤੀ ਬੀਮਾਰ ਹੋ ਜਾਂਦਾ ਹੈ।

ਸੀ. ਆਈ. ਏ., ਸੀ. ਆਈ. ਡੀ. ਅਤੇ ਖੁਫੀਆ ਵਿਭਾਗ ਚੌਕਸ
ਉਂਝ ਤਾਂ ਪੰਜਾਬ 'ਚ ਕਾਂਗਰਸ ਸਰਕਾਰ ਨਸ਼ਾ ਖਤਮ ਕਰਨ ਦਾ ਮੁੱਦਾ ਲੈ ਕੇ ਚੋਣਾਂ ਜਿੱਤੀ ਸੀ ਅਤੇ ਵਾਅਦਾ ਕੀਤਾ ਸੀ ਕਿ ਨਸ਼ਾ ਬੰਦ ਹੋਵੇਗਾ। ਪੁਲਸ ਕਮਿਸ਼ਨਰ ਨੂੰ ਚਾਹੀਦਾ ਹੈ ਕਿ ਬਸਤੀਆਂ ਇਲਾਕੇ 'ਚ ਸੀ. ਆਈ. ਏ., ਸੀ. ਆਈ. ਡੀ. ਅਤੇ ਹੋਰ ਖੁਫੀਆ ਵਿਭਾਗ ਦੇ ਪੁਲਸ ਨੌਜਵਾਨਾਂ ਨੂੰ ਬਿਨਾਂ ਵਰਦੀ ਦੇ ਭੇਜ ਕੇ ਚੈੱਕ ਕਰਵਾਉਣਾ ਚਾਹੀਦਾ ਹੈ ਕਿ ਕਿਸ ਤਰ੍ਹਾਂ ਸ਼ਾਮ ਹੁੰਦੇ ਹੀ ਨਸ਼ੇ ਦਾ ਕੰਮ ਜ਼ੋਰਾਂ 'ਤੇ ਹੁੰਦਾ ਹੈ। ਇਲਾਕੇ ਦੇ ਲੋਕਾਂ ਦੀ ਮੰਗ ਹੈ ਕਿ ਉਨ੍ਹਾਂ ਨੂੰ ਨਸ਼ਾ ਸਮੱਗਲਰਾਂ ਤੋਂ ਬਚਾਇਆ ਜਾਵੇ।

ਸ਼ਰਾਬ ਸਮੱਗਲਰਾਂ ਦੀ ਹੋਵੇਗੀ ਸੂਚੀ ਤਿਆਰ, ਕਰਨਗੇ ਕਾਰਵਾਈ : ਡੀ. ਸੀ. ਪੀ.
ਉਥੇ ਹੀ ਸੁਭਾਅ ਤੋਂ ਸਖਤ ਜਾਣੇ ਜਾਂਦੇ ਡੀ. ਸੀ. ਪੀ. ਲਾਅ ਐਂਡ ਆਰਡਰ ਬਲਕਾਰ ਸਿੰਘ ਦਾ ਕਹਿਣਾ ਹੈ ਕਿ ਡੀ. ਜੀ. ਪੀ. ਅਤੇ ਪੁਲਸ ਕਮਿਸ਼ਨਰ ਦੇ ਹੁਕਮਾਂ ਮੁਤਾਬਕ ਮਹਾਨਗਰ ਨੂੰ ਕ੍ਰਾਈਮ ਫ੍ਰੀ ਕਰਨ ਦਾ ਟੀਚਾ ਉਨ੍ਹਾਂ ਨੇ ਉਠਾਇਆ ਹੈ। ਉਹ ਬਸਤੀਆਂ ਇਲਾਕੇ ਨੂੰ ਕ੍ਰਾਈਮ ਫ੍ਰੀ ਕਰਨਗੇ। ਇਸ ਲਈ ਉਹ ਵਿਸ਼ੇਸ਼ ਪੁਲਸ ਦੀਆਂ ਟੀਮਾਂ ਬਣਾ ਕੇ ਸੂਚੀ ਤਿਆਰ ਕਰਵਾਉਣਗੇ ਕਿ ਕੌਣ-ਕੌਣ ਸ਼ਰਾਬ ਸਮੱਗਲਿੰਗ ਕਰਦਾ ਹੈ ਅਤੇ ਉਨ੍ਹਾਂ ਦੇ ਲਿੰਕ ਕਿਨ੍ਹਾਂ ਲੋਕਾਂ ਨਾਲ ਹਨ। ਜੇਕਰ ਸਮੱਗਲਰਾਂ ਦੇ ਨਾਲ ਪੁਲਸ ਨੌਜਵਾਨਾਂ ਦੀ ਸੈਟਿੰਗ ਦੀ ਗੱਲ ਸਾਹਮਣੇ ਆਉਂਦੀ ਹੈ ਤਾਂ ਉਨ੍ਹਾਂ ਖਿਲਾਫ ਵੀ ਕਾਰਵਾਈ ਹੋਵੇਗੀ।