NSE ''ਤੇ ਰਜਿਸਟਰਡ ਨਿਵੇਸ਼ਕਾਂ ਦਾ ਅੰਕੜਾ 8 ਕਰੋੜ ਤੋਂ ਪਾਰ, ਸਿਰਫ਼ 8 ਮਹੀਨਿਆਂ ''ਚ ਜੁੜੇ 1 ਕਰੋੜ ਨਵੇਂ ਨਿਵੇਸ਼ਕ

ਨਵੀਂ ਦਿੱਲੀ - ਦੇਸ਼ 'ਚ ਸ਼ੇਅਰ ਬਾਜ਼ਾਰ 'ਚ ਨਿਵੇਸ਼ ਕਰਨ ਵਾਲਿਆਂ ਦੀ ਗਿਣਤੀ ਲਗਾਤਾਰ ਵਧ ਰਹੀ ਹੈ ਅਤੇ ਇਸ ਨੂੰ ਸਾਬਤ ਕਰਨ ਵਾਲਾ ਇਕ ਹੋਰ ਅੰਕੜਾ ਸਾਹਮਣੇ ਆਇਆ ਹੈ। ਪਿਛਲੇ ਅੱਠ ਮਹੀਨਿਆਂ ਵਿੱਚ ਨੈਸ਼ਨਲ ਸਟਾਕ ਐਕਸਚੇਂਜ (NSE) ਵਿੱਚ ਨਵੇਂ ਨਿਵੇਸ਼ਕਾਂ ਦੀ ਰਜਿਸਟ੍ਰੇਸ਼ਨ ਇੱਕ ਕਰੋੜ ਦੇ ਅੰਕੜੇ ਤੱਕ ਪਹੁੰਚ ਗਈ ਹੈ। ਇਸ ਨਾਲ NSE 'ਤੇ ਨਿਵੇਸ਼ਕਾਂ ਦੀ ਕੁੱਲ ਗਿਣਤੀ ਅੱਠ ਕਰੋੜ ਤੋਂ ਵੱਧ ਹੋ ਗਈ ਹੈ।

ਨੈਸ਼ਨਲ ਸਟਾਕ ਐਕਸਚੇਂਜ ਮੁਤਾਬਕ ਉਸ ਦੇ ਰਜਿਸਟਰਡ ਨਿਵੇਸ਼ਕਾਂ ਦੀ ਗਿਣਤੀ ਵਧਣ ਦਾ ਵੱਡਾ ਕਾਰਨ ਪੂੰਜੀ ਬਾਜ਼ਾਰ 'ਚ ਚੰਗੀ ਰਫ਼ਤਾਰ ਹੋਣਾ ਹੈ। NSE ਨੇ ਕਿਹਾ ਹੈ ਕਿ ਐਕਸਚੇਂਜ ਨਾਲ ਰਜਿਸਟਰਡ ਗਾਹਕ ਕੋਡਾਂ ਦੀ ਕੁੱਲ ਸੰਖਿਆ 14.9 ਕਰੋੜ ਦੇ ਅੰਕੜੇ ਨੂੰ ਛੂਹ ਗਈ ਹੈ, ਅਜਿਹਾ ਇਸ ਲਈ ਹੋਇਆ ਹੈ ਕਿਉਂਕਿ ਗਾਹਕ ਕੋਡ ਇੱਕ ਤੋਂ ਵੱਧ ਵਪਾਰਕ ਮੈਂਬਰਾਂ ਲਈ ਹਨ।

ਸਟਾਕ ਐਕਸਚੇਂਜ ਨੇ ਇੱਕ ਰੀਲੀਜ਼ ਵਿੱਚ ਕਿਹਾ ਕਿ 8 ਕਰੋੜ ਵਿਲੱਖਣ ਪੈਨ ਨਿਵੇਸ਼ਕ ਭਾਰਤ ਵਿੱਚ ਲਗਭਗ 5 ਕਰੋੜ ਵਿਲੱਖਣ ਪਰਿਵਾਰਾਂ ਦੇ ਬਰਾਬਰ ਹਨ। ਇਹ NSE ਦੇ ਦੇਸ਼ ਵਿਆਪੀ ਨੈੱਟਵਰਕ ਰਾਹੀਂ ਭਾਰਤੀ ਸਟਾਕ ਮਾਰਕੀਟ ਵਿੱਚ ਸਿੱਧੇ ਤੌਰ 'ਤੇ ਨਿਵੇਸ਼ ਕਰਨ ਵਾਲੇ ਪਰਿਵਾਰਾਂ ਵਿੱਚੋਂ 17 ਫ਼ੀਸਦੀ ਹਨ। ਇਸ ਤੋਂ ਇਲਾਵਾ ਖ਼ਾਸ ਗੱਲ ਇਹ ਹੈ ਕਿ ਪਿਛਲੇ 8 ਮਹੀਨਿਆਂ ਦੌਰਾਨ NSE ਪਲੇਟਫਾਰਮ 'ਤੇ ਇਕ ਕਰੋੜ ਨਵੇਂ ਨਿਵੇਸ਼ਕ ਰਜਿਸਟਰ ਹੋਏ ਹਨ।

ਬੀਤੇ ਦਿਨ NSE ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਨਵੇਂ ਨਿਵੇਸ਼ਕਾਂ ਦੀ ਰਜਿਸਟ੍ਰੇਸ਼ਨ ਸਿਰਫ਼ ਵੱਡੇ ਸ਼ਹਿਰਾਂ ਤੱਕ ਸੀਮਤ ਨਹੀਂ ਹੈ। ਨਵੇਂ ਰਜਿਸਟਰਡ ਨਿਵੇਸ਼ਕਾਂ ਵਿੱਚ ਟਾਪ 100 ਸ਼ਹਿਰਾਂ ਤੋਂ ਇਲਾਵਾ ਹੋਰ ਖੇਤਰਾਂ ਦੀ ਹਿੱਸੇਦਾਰੀ 45 ਫ਼ੀਸਦੀ ਰਹੀ ਹੈ। ਜੇਕਰ ਅਸੀਂ ਵੱਖ-ਵੱਖ ਖੇਤਰਾਂ ਦੀ ਗੱਲ ਕਰੀਏ ਤਾਂ ਨਵੇਂ ਨਿਵੇਸ਼ਕਾਂ ਦੀ ਰਜਿਸਟ੍ਰੇਸ਼ਨ ਵਿੱਚ ਉੱਤਰੀ ਖੇਤਰ ਦੀ ਹਿੱਸੇਦਾਰੀ 43 ਫ਼ੀਸਦੀ ਰਹੀ ਹੈ। ਇਸ ਤੋਂ ਬਾਅਦ 27 ਫ਼ੀਸਦੀ ਹਿੱਸੇਦਾਰੀ ਪੱਛਮੀ ਖੇਤਰ ਦੀ ਹੈ। ਨਾਲ ਹੀ ਦੱਖਣੀ ਖੇਤਰ ਦਾ ਹਿੱਸਾ 17 ਫ਼ੀਸਦੀ ਅਤੇ ਪੂਰਬੀ ਖੇਤਰ ਦਾ ਹਿੱਸਾ 13 ਫ਼ੀਸਦੀ ਸੀ।