ਸ਼ੇਅਰ ਬਾਜ਼ਾਰ ਦੀ ਸਪਾਟ ਕਲੋਜ਼ਿੰਗ : ਸੈਂਸੈਕਸ 72 ਅੰਕ ਟੁੱਟਿਆ ਤੇ ਨਿਫਟੀ 22,470 ਦੇ ਪੱਧਰ 'ਤੇ ਬੰਦ

ਮੁੰਬਈ - ਅੱਜ ਹਫਤੇ ਦੇ ਤੀਜੇ ਕਾਰੋਬਾਰੀ ਦਿਨ ਯਾਨੀ ਬੁੱਧਵਾਰ (12 ਮਾਰਚ) ਨੂੰ ਸ਼ੇਅਰ ਬਾਜ਼ਾਰ 'ਚ ਹਫੜਾ-ਦਫੜੀ ਦਾ ਮਾਹੌਲ ਰਿਹਾ। ਵਾਧੇ ਨਾਲ ਸ਼ੁਰੂਆਤ ਤੋਂ ਬਾਅਦ ਬਾਜ਼ਾਰ ਵਿਚ ਗਿਰਾਵਟ ਦੇਖਣ ਨੂੰ ਮਿਲੀ। ਸੈਂਸੈਕਸ ਕਰੀਬ 72.56 ਅੰਕ ਭਾਵ 0.10% ਦੀ ਗਿਰਾਵਟ ਨਾਲ 74,029.76 ਦੇ ਪੱਧਰ 'ਤੇ ਬੰਦ ਹੋਇਆ ਹੈ। ਸੈਂਸੈਕਸ ਦੇ 13 ਸਟਾਕ ਵਾਧੇ ਨਾਲ ਅਤੇ 17 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ।

ਦੂਜੇ ਪਾਸੇ ਨਿਫਟੀ ਵੀ ਵਾਧੇ ਤੋਂ ਬਾਅਦ ਗਿਰਾਵਟ ਵੱਲ ਰੁਖ ਕੀਤਾ ਅਤੇ ਇਹ 'ਚ 27.05 ਅੰਕ ਭਾਵ 0.12% ਦੀ ਗਿਰਾਵਟ ਨਾਲ 22,470.85 ਦੇ ਪੱਧਰ 'ਤੇ ਬੰਦ ਹੋਇਆ ਹੈ। ਨਿਫਟੀ ਦੇ 19 ਸਟਾਕ  ਵਾਧੇ ਨਾਲ ਅਤੇ 31 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ। 

ਅੱਜ ਇੰਡਸਇੰਡ ਬੈਂਕ ਦੇ ਸ਼ੇਅਰਾਂ ਵਿਚ ਕੱਲ੍ਹ ਦੀ ਵੱਡੀ ਗਿਰਾਵਟ (27%) ਤੋਂ ਬਾਅਦ 4.42% ਦੀ ਰਿਕਵਰੀ ਦੇਖਣ ਨੂੰ ਮਿਲੀ । ਟਾਟਾ ਮੋਟਰਸ 3.19% ਅਤੇ ਕੋਟਕ ਬੈਂਕ 2.37% ਚੜ੍ਹੇ । ਇਸ ਦੇ ਨਾਲ ਹੀ ਇੰਫੋਸਿਸ 'ਚ 4.18 ਫੀਸਦੀ, ਟੇਕ ਮਹਿੰਦਰਾ 'ਚ 2.80 ਫੀਸਦੀ ਅਤੇ ਨੈਸਲੇ ਇੰਡੀਆ 'ਚ 2.43 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ।

ਐਨਐਸਈ ਦੇ ਆਈਟੀ ਇੰਡੈਕਸ ਵਿੱਚ ਸਭ ਤੋਂ ਵੱਧ 2.91%, ਮੀਡੀਆ ਵਿੱਚ 1.53%, ਰਿਐਲਟੀ ਵਿੱਚ 1.65 ਅਤੇ ਸਰਕਾਰੀ ਬੈਂਕ ਵਿੱਚ 1.08% ਦੀ ਗਿਰਾਵਟ ਆਈ। ਪ੍ਰਾਈਵੇਟ ਬੈਂਕਾਂ ਅਤੇ ਫਾਰਮਾ ਸੈਕਟਰ ਵਿੱਚ ਮਾਮੂਲੀ ਵਾਧਾ ਹੋਇਆ।

ਸਟਾਰਲਿੰਕ ਨਾਲ ਸਮਝੌਤੇ ਤੋਂ ਬਾਅਦ ਏਅਰਟੈੱਲ ਦੇ ਸ਼ੇਅਰ 2.16% ਚੜ੍ਹੇ ਹਨ। 11 ਮਾਰਚ ਨੂੰ ਵਿਦੇਸ਼ੀ ਨਿਵੇਸ਼ਕਾਂ (ਐੱਫ.ਆਈ.ਆਈ.) ਨੇ 2,823.76 ਕਰੋੜ ਰੁਪਏ ਦੇ ਸ਼ੇਅਰ ਵੇਚੇ। ਇਸ ਸਮੇਂ ਦੌਰਾਨ, ਘਰੇਲੂ ਨਿਵੇਸ਼ਕਾਂ (DIIs) ਨੇ 2,001.79 ਕਰੋੜ ਰੁਪਏ ਦੇ ਸ਼ੇਅਰ ਖਰੀਦੇ।

ਗਲੋਬਲ ਬਾਜ਼ਾਰਾਂ ਦਾ ਹਾਲ

ਏਸ਼ੀਆਈ ਬਾਜ਼ਾਰਾਂ 'ਚ ਜਾਪਾਨ ਦਾ ਨਿੱਕੇਈ 0.29 ਫੀਸਦੀ ਦੇ ਵਾਧੇ ਨਾਲ ਅਤੇ ਹਾਂਗਕਾਂਗ ਦਾ ਹੈਂਗ ਸੇਂਗ ਇੰਡੈਕਸ 0.069 ਫੀਸਦੀ ਦੇ ਵਾਧੇ ਨਾਲ ਕਾਰੋਬਾਰ ਕਰ ਰਿਹਾ ਹੈ। ਜਦੋਂ ਕਿ ਚੀਨ ਦਾ ਸ਼ੰਘਾਈ ਕੰਪੋਜ਼ਿਟ 0.053% ਹੇਠਾਂ ਹੈ।
11 ਮਾਰਚ ਨੂੰ, ਯੂਐਸ ਡਾਓ ਜੋਂਸ ਇੰਡਸਟਰੀਅਲ ਔਸਤ 1.14% ਡਿੱਗ ਕੇ 41,433 'ਤੇ, S&P 500 0.76% ਡਿੱਗ ਕੇ 5,572 'ਤੇ ਅਤੇ Nasdaq ਕੰਪੋਜ਼ਿਟ 0.18% ਡਿੱਗ ਕੇ 17,436 'ਤੇ ਆ ਗਿਆ।
ਬੀਤੇ ਦਿਨ ਸ਼ੇਅਰ ਬਾਜ਼ਾਰ ਦਾ ਹਾਲ

ਅਮਰੀਕੀ ਬਾਜ਼ਾਰਾਂ 'ਚ 4 ਫੀਸਦੀ ਤੱਕ ਦੀ ਗਿਰਾਵਟ ਦਾ ਅਸਰ ਕੱਲ ਯਾਨੀ ਮੰਗਲਵਾਰ (11 ਮਾਰਚ) ਨੂੰ ਭਾਰਤੀ ਬਾਜ਼ਾਰਾਂ 'ਤੇ ਨਜ਼ਰ ਨਹੀਂ ਆਇਆ। ਸੈਂਸੈਕਸ 12 ਅੰਕਾਂ ਦੀ ਮਾਮੂਲੀ ਗਿਰਾਵਟ ਨਾਲ 74,102 ਦੇ ਪੱਧਰ 'ਤੇ ਬੰਦ ਹੋਇਆ। ਨਿਫਟੀ 37 ਅੰਕ ਵਧਿਆ ਹੈ। 22,497 'ਤੇ ਬੰਦ ਹੋਇਆ।

ਸਵੇਰੇ ਸੈਂਸੈਕਸ ਲਗਭਗ 400 ਅੰਕ ਡਿੱਗ ਕੇ ਦਿਨ ਦੇ ਹੇਠਲੇ ਪੱਧਰ 73,663 'ਤੇ ਆ ਗਿਆ ਸੀ। ਨਿਫਟੀ ਵੀ 100 ਅੰਕਾਂ ਤੋਂ ਵੱਧ ਫਿਸਲ ਗਿਆ। ਨਿਫਟੀ ਨੇ ਦਿਨ ਦੇ ਹੇਠਲੇ ਪੱਧਰ 22,314 'ਤੇ ਬਣਾਇਆ।

ਸਭ ਤੋਂ ਜ਼ਿਆਦਾ ਵਾਧਾ ਰਿਐਲਟੀ ਸ਼ੇਅਰਾਂ 'ਚ ਦੇਖਣ ਨੂੰ ਮਿਲਿਆ। ਨਿਫਟੀ ਰੀਅਲਟੀ ਇੰਡੈਕਸ 3.63 ਫੀਸਦੀ ਵਧ ਕੇ ਬੰਦ ਹੋਇਆ ਹੈ। ਤੇਲ ਅਤੇ ਗੈਸ ਸੂਚਕ ਅੰਕ 1.21% ਵਧਿਆ ਹੈ। ਮੈਟਲ ਇੰਡੈਕਸ 0.53 ਫੀਸਦੀ ਵਧ ਕੇ ਬੰਦ ਹੋਇਆ ਹੈ। ਪ੍ਰਾਈਵੇਟ ਬੈਂਕਾਂ ਦੇ ਸ਼ੇਅਰ ਸਭ ਤੋਂ ਵੱਧ ਡਿੱਗੇ ਹਨ। ਪ੍ਰਾਈਵੇਟ ਬੈਂਕ ਇੰਡੈਕਸ 1.38% ਡਿੱਗ ਗਿਆ।