ਸੋਲਰ ਰੇਡੀਏਸ਼ਨ ਕਾਰਨ ਭਾਰਤ ਸਮੇਤ ਪੂਰੀ ਦੁਨੀਆ ’ਚ ਭੜਥੂ

ਨਵੀਂ ਦਿੱਲੀ - ਯੂਰਪ ਦੀ ‘ਏਅਰਬੱਸ’ ਕੰਪਨੀ ਨੇ ਸਾਫਟਵੇਅਰ ਨਾਲ ਸਬੰਧਤ ਕਿਸੇ ਮੁੱਦੇ ਕਾਰਨ ਤੁਰੰਤ ਮੁਰੰਮਤ ਲਈ ਏ-320 ਫੈਮਿਲੀ ਦੇ ਲਗਭਗ 6,000 ਹਵਾਈ ਜਹਾਜ਼ਾਂ ਨੂੰ ਵਾਪਸ ਮੰਗਵਾ ਲਿਆ ਹੈ। ‘ਏਅਰਬੱਸ’ ਨੇ ਕਿਹਾ ਹੈ ਕਿ ਸੋਲਰ ਰੇਡੀਏਸ਼ਨ ਕਾਰਨ ਏ-320 ਸੀਰੀਜ਼ ਦੇ ਕਈ ਜਹਾਜ਼ਾਂ ਦੇ ਫਲਾਈਟ ਕੰਟਰੋਲ ਨਾਲ ਜੁੜੇ ਅਹਿਮ ਡਾਟਾ ਨੂੰ ਨੁਕਸਾਨ ਪਹੁੰਚਣ ਦੀ ਸੰਭਾਵਨਾ ਹੈ। ਸਾਫਟਵੇਅਰ ਦੀ ਤਬਦੀਲੀ ਹੋਣ ਕਾਰਨ ਭਾਰਤ ’ਚ 200 ਤੋਂ 250 ਜਹਾਜ਼ ਕੁਝ ਸਮੇ ਲਈ ਸੇਵਾ ਤੋਂ ਬਾਹਰ ਹੋ ਜਾਣਗੇ।

ਸਿਵਲ ਏਵੀਏਸ਼ਨ ਡਾਇਰੈਕਟੋਰੇਟ ਜਨਰਲ (ਡੀ. ਜੀ. ਸੀ. ਏ.) ਨੇ ਕਿਹਾ ਹੈ ਕਿ ਏਅਰ ਇੰਡੀਆ, ਇੰਡੀਗੋ ਤੇ ਏਅਰ ਇੰਡੀਆ ਐਕਸਪ੍ਰੈਸ ਨਾਲ ਸਬੰਧਤ ਲਗਭਗ 338 ਹਵਾਈ ਜਹਾਜ਼ ਪ੍ਰਭਾਵਿਤ ਹੋਣਗੇ। ਇਸ ’ਚ ਇਹ ਵੀ ਕਿਹਾ ਗਿਆ ਹੈ ਕਿ ਹੁਣ ਤੱਕ ਵੱਡੀ ਗਿਣਤੀ ’ਚ ਜਹਾਜ਼ਾਂ ਦੇ ਸਾਫਟਵੇਅਰ ਨੂੰ ਅੱਪਡੇਟ ਕੀਤਾ ਜਾ ਚੁੱਕਾ ਹੈ। ਬਾਕੀ ਦਾ ਅੱਪਡੇਟ 30 ਨਵੰਬਰ ਦੀ ਸਵੇਰ ਤੱਕ ਪੂਰਾ ਹੋ ਜਾਵੇਗਾ। ਰਿਪੋਰਟਾਂ ਅਨੁਸਾਰ ਅੱਪਡੇਟ ਦੀ ਇਸ ਪ੍ਰਕਿਰਿਆ ਦੌਰਾਨ ਇੰਡੀਗੋ ਨੂੰ ਸਭ ਤੋਂ ਵੱਧ ਨੁਕਸਾਨ ਹੋਣ ਦੀ ਸੰਭਾਵਨਾ ਹੈ।

ਡੀ. ਜੀ. ਸੀ. ਏ. ਦੇ ਹੁਕਮ ਕੀ ਹਨ?

•  ਡੀ. ਜੀ. ਸੀ. ਏ. ਨੇ ਭਾਰਤ ’ਚ ਚੱਲ ਰਹੇ ਜਹਾਜ਼ਾਂ ਲਈ ਵੀ ਇਹ ਤਬਦੀਲੀ ਲਾਗੂ ਕੀਤੀ ਹੈ।
•  ਇਹ ਹੁਕਮ ਏਅਰਬੱਸ ਏ -318, ਏ -319, ਏ- 320 ਤੇ ਏ- 321 ਮਾਡਲਾਂ 'ਤੇ ਲਾਗੂ ਹੁੰਦਾ ਹੈ ਜਿਨ੍ਹਾਂ ’ਚ ਮਾਡਲਾਂ ਦੀ ਇਕ ਵਿਸ਼ਾਲ ਸ਼੍ਰੇਣੀ ਹੈ।
•  ਇਸ ’ਚ ਲਗਭਗ ਸਾਰੇ ਸੀਰੀਅਲ ਨੰਬਰ ਸ਼ਾਮਲ ਹਨ, ਜਿਸ ਨਾਲ ਇਨ੍ਹਾਂ ਜਹਾਜ਼ਾਂ ਦੇ ਮਾਲਕ ਤੇ ਆਪਰੇਟਰਾਂ ਲਈ ਇਹ ਤਬਦੀਲੀ ਲਾਜ਼ਮੀ ਹੋ ਜਾਂਦੀ ਹੈ।
•  ਆਪਰੇਟਰਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਜਦੋਂ ਤੱਕ ਤਬਦੀਲੀ ਮੁਕੰਮਲ ਨਹੀਂ ਹੋ ਜਾਂਦੀ, ਉਦੋਂ ਤੱਕ ਜਹਾਜ਼ ਨਾ ਚਲਾਏ ਜਾਣ।
•  ਆਪਰੇਟਰਾਂ ਨੂੰ ਡੀ. ਜੀ. ਸੀ. ਏ. ਦੇ ਨਿਯਮਾਂ ਅਨੁਸਾਰ ਇਸ ਤਬਦਲੀ ਨੂੰ ਵੀ ਰਜਿਸਟਰ ਕਰਨਾ ਪਵੇਗਾ।