ਕੋਰੋਨਾ ਤੋਂ ਬੁਰੀ ਤਰ੍ਹਾਂ ਪ੍ਰਭਾਵਤ ਖ਼ੇਤਰਾਂ ਲਈ RBI ਨੇ 15,000 ਕਰੋੜ ਰੁਪਏ ਦੀ ਨਕਦ ਸਹੂਲਤ ਦਾ ਕੀਤਾ ਐਲਾਨ
Friday, Jun 04, 2021 - 08:15 PM (IST)
ਨਵੀਂ ਦਿੱਲੀ : ਰਿਜ਼ਰਵ ਬੈਂਕ ਨੇ ਸ਼ੁੱਕਰਵਾਰ ਨੂੰ ਕੋਵਿਡ -19 ਨਾਲ ਪ੍ਰਭਾਵਤ ਸੈਕਟਰਾਂ ਦੀ ਸਹਾਇਤਾ ਲਈ 15,000 ਕਰੋੜ ਰੁਪਏ ਦੀ ਤਰਲਤਾ ਵਿੰਡੋ ਸਹੂਲਤ ਸ਼ੁਰੂ ਕਰਨ ਦਾ ਫੈਸਲਾ ਕੀਤਾ ਹੈ। ਇਹ ਸਹੂਲਤ ਹੋਟਲ ਅਤੇ ਰੈਸਟੋਰੈਂਟਾਂ, ਸੈਰ ਸਪਾਟਾ ਅਤੇ ਹਵਾਬਾਜ਼ੀ ਸਹਾਇਕ ਸੇਵਾਵਾਂ ਲਈ ਅਰੰਭ ਕੀਤੀ ਗਈ ਹੈ। ਇਹ ਸਹੂਲਤ 31 ਮਾਰਚ 2022 ਤੱਕ ਰੈਪੋ ਰੇਟ 'ਤੇ ਉਪਲਬਧ 50,000 ਕਰੋੜ ਰੁਪਏ ਦੀ ਨਕਦ ਸਹੂਲਤ ਤੋਂ ਇਲਾਵਾ ਹੈ। ਇਸ ਦੇ ਤਹਿਤ ਲੋਨ ਤਿੰਨ ਸਾਲਾਂ ਲਈ ਉਪਲਬਧ ਹੋਵੇਗਾ। ਇਸ ਦਾ ਐਲਾਨ ਪੰਜ ਮਈ ਨੂੰ ਕੋਵਿਡ ਨਾਲ ਜੁੜੇ ਸਿਹਤ ਖੇਤਰਾਂ ਨੂੰ ਜ਼ਰੂਰੀ ਮਦਦ ਲਈ ਕੀਤਾ ਗਿਆ ਹੈ।
ਦੋ-ਮਹੀਨਾਵਾਰ ਮੁਦਰਾ ਨੀਤੀ ਦੀ ਸਮੀਖਿਆ ਦਾ ਐਲਾਨ ਕਰਦਿਆਂ ਰਿਜ਼ਰਵ ਬੈਂਕ ਦੇ ਗਵਰਨਰ ਸ਼ਕਤੀਕਾਂਤ ਦਾਸ ਨੇ ਕਿਹਾ, 'ਸੰਪਰਕ-ਖੇਤਰ ਦੇ ਸੈਕਟਰਾਂ 'ਤੇ ਦੂਜੀ ਲਹਿਰ ਦੇ ਮਾੜੇ ਪ੍ਰਭਾਵ ਨੂੰ ਦੂਰ ਕਰਨ ਲਈ 31 ਮਾਰਚ, 2022 ਤੱਕ 15,000 ਕਰੋੜ ਰੁਪਏ ਦੀ ਵੱਖਰੀ ਤਰਲਤਾ ਵਿੰਡੋ ਪੇਸ਼ ਕੀਤੀ ਜਾਏਗੀ। ਇਹ ਰੈਪੋ ਰੇਟ 'ਤੇ ਇਸ ਦੀ ਮਿਆਜ ਤਿੰਨ ਸਾਲਾਂ ਲਈ ਹੋਵੇਗੀ।' ਗਵਰਨਰ ਨੇ ਕਿਹਾ ਕਿ ਇਸ ਯੋਜਨਾ ਤਹਿਤ ਹੋਟਲ, ਰੈਸਟੋਰੈਂਟ, ਸੈਰ-ਸਪਾਟਾ ਏਜੰਟ, ਟੂਰ ਆਪਰੇਟਰ ਅਤੇ ਐਡਵੇਂਚਰ / ਵਿਰਾਸਤੀ ਸਹੂਲਤਾਂ, ਹਵਾਬਾਜ਼ੀ ਸਹਾਇਕ ਸੇਵਾਵਾਂ, ਜ਼ਮੀਨੀ ਹੈਂਡਲਿੰਗ ਅਤੇ ਸਪਲਾਈ ਚੇਨ ਅਤੇ ਹੋਰ ਸੇਵਾਵਾਂ ਜਿਵੇਂ ਕਿ ਪ੍ਰਾਈਵੇਟ ਬੱਸ ਓਪਰੇਟਰ, ਕਾਰ ਮੁਰੰਮਤ ਸੇਵਾਵਾਂ, ਕਿਰਾਏ 'ਤੇ ਕਾਰ, ਸਪਾ ਕਲੀਨਿਕ ਅਤੇ ਬਿਊਟੀ ਪਾਰਲਰ ਆਦਿ ਲਈ ਬੈਂਕ ਨਵਾਂ ਲੋਨ ਉਪਲੱਬਧ ਕਰਵਾ ਸਕਦੇ ਹਨ।
ਇਸ ਹਫਤੇ ਦੇ ਸ਼ੁਰੂ ਵਿਚ ਵਿੱਤ ਮੰਤਰਾਲਾ 3 ਲੱਖ ਕਰੋੜ ਰੁਪਏ ਦੀ ਐਮਰਜੈਂਸੀ ਕਰੈਡਿਟ ਸਹੂਲਤ ਗਰੰਟੀ ਯੋਜਨਾ (ਈਸੀਐਲਜੀਐਸ) ਦੇ ਦਾਇਰੇ ਦਾ ਵਿਸਤਾਰ ਕਰਦੇ ਹੋਏ, ਹਸਪਤਾਲਾਂ ਵਿਚ ਆਕਸੀਜਨ ਪਲਾਂਟ ਲਗਾਉਣ ਦੀ ਯੋਜਨਾ ਤਹਿਤ ਰਿਆਇਤੀ ਕਰਜ਼ੇ ਵੀ ਪ੍ਰਦਾਨ ਕਰੇਗਾ। ਇਸ ਦੇ ਨਾਲ ਹੀ ਇਸ ਸਕੀਮ ਦੀ ਵੈਧਤਾ 30 ਸਤੰਬਰ ਤੱਕ ਜਾਂ 3 ਲੱਖ ਕਰੋੜ ਰੁਪਏ ਦੇ ਕਰਜ਼ਿਆਂ ਦੀ ਗਰੰਟੀ ਜਾਰੀ ਹੋਣ ਤੱਕ ਤਿੰਨ ਮਹੀਨਿਆਂ ਤੱਕ ਵਧਾ ਦਿੱਤੀ ਗਈ ਹੈ।
ਸਰਕਾਰ ਨੇ ਇਸ ਸਹੂਲਤ(ਈਸੀਐਲਜੀਐਸ 3.0) ਤਹਿਤ ਯੋਗਤਾ ਲਈ 500 ਕਰੋੜ ਰੁਪਏ ਦੀ ਬਕਾਇਆ ਕਰਜ਼ਾ ਸੀਮਾ ਨੂੰ ਵੀ ਹਟਾ ਦਿੱਤਾ ਹੈ । ਇਸ ਵਿਚ ਹਰ ਇੱਕ ਕਰਜ਼ਾ ਲੈਣ ਵਾਲੇ ਨੂੰ ਈ.ਸੀ.ਐਲ.ਜੀ.ਐਸ. ਸਹਾਇਤਾ ਹੁਣ ਵੱਧ ਤੋਂ ਵੱਧ 40 ਪ੍ਰਤੀਸ਼ਤ ਜਾਂ 200 ਕਰੋੜ ਰੁਪਏ ਰੱਖੀ ਜਾਵੇਗੀ, ਜੋ ਵੀ ਘੱਟ ਹੋਵੇ। ਇਸ ਦੇ ਤਹਿਤ ਸਿਵਲ ਹਵਾਬਾਜ਼ੀ ਖੇਤਰ ਲਈ ਕਰਜ਼ੇ ਵੀ ਯੋਗ ਬਣਾਏ ਗਏ ਹਨ। ਪਹਿਲਾਂ ਪਰਾਹੁਣਚਾਰੀ, ਯਾਤਰਾ ਅਤੇ ਸੈਰ-ਸਪਾਟਾ, ਮਨੋਰੰਜਨ ਅਤੇ ਖੇਡਾਂ ਦੇ ਕਾਰੋਬਾਰਾਂ ਨੂੰ ਯੋਗ ਬਣਾਇਆ ਜਾਂਦਾ ਸੀ। ਇਸ ਵਿਚ ਜਿਹੜੇ ਕਾਰੋਬਾਰ ਦਾ ਬਕਾਇਆ 29 ਫਰਵਰੀ 2020 ਤੱਕ 500 ਕਰੋੜ ਰੁਪਏ ਤੋਂ ਵੱਧ ਨਹੀਂ ਸੀ। ਜੇ ਕੋਈ ਬਕਾਇਆ ਭੁਗਤਾਨ ਸੀ ਉਹ ਵੀ 60 ਦਿਨ ਜਾਂ ਉਸ ਤੋਂ ਘੱਟ ਹੋਣਾ ਚਾਹੀਦਾ ਹੈ।
