100 ਰੁਪਏ ਤੋਂ ਪਾਰ ਪਹੁੰਚਿਆ ਪੈਟਰੋਲ, ਮਸ਼ੀਨ 'ਚ ਡਿਸਪਲੇ ਨਾਲ ਹੋਣ ਕਾਰਨ ਰੋਕਣੀ ਪਈ ਵਿਕਰੀ

ਨਵੀਂ ਦਿੱਲੀ - ਸਰਕਾਰੀ ਤੇਲ ਕੰਪਨੀਆਂ ਨੇ ਵੀ ਐਤਵਾਰ ਨੂੰ ਲਗਾਤਾਰ ਛੇਵੇਂ ਦਿਨ ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ਵਿਚ ਵਾਧਾ ਕੀਤਾ ਹੈ। ਕੀਮਤ ਵਧਣ ਕਾਰਨ ਮੱਧ ਪ੍ਰਦੇਸ਼ ਦੀ ਰਾਜਧਾਨੀ ਭੋਪਾਲ ਦੇ ਪੁਰਾਣੇ ਪੈਟਰੋਲ ਪੰਪਾਂ 'ਤੇ ਪ੍ਰੀਮੀਅਮ ਪੈਟਰੋਲ ਦੀ ਵਿਕਰੀ ਰੋਕ ਦਿੱਤੀ ਗਈ ਹੈ। ਪ੍ਰੀਮੀਅਮ ਪੈਟਰੋਲ ਦੀ ਕੀਮਤ 100 ਰੁਪਏ ਪ੍ਰਤੀ ਲੀਟਰ ਤੋਂ ਉਪਰ ਪਹੁੰਚ ਗਈ ਹੈ। ਸਥਾਨਕ ਰਿਪੋਰਟਾਂ ਅਨੁਸਾਰ, ਜੇ ਸਾਦੇ ਪੈਟਰੋਲ ਦੀ ਕੀਮਤ ਵੀ 100 ਰੁਪਏ ਪ੍ਰਤੀ ਲੀਟਰ ਤੱਕ ਪਹੁੰਚ ਜਾਂਦੀ ਹੈ, ਤਾਂ ਬਹੁਤ ਸਾਰੇ ਪੈਟਰੋਲ ਪੰਪਾਂ 'ਤੇ ਵਿਕਰੀ ਬੰਦ ਕਰਨੀ ਪਏਗੀ। ਸ਼ਨੀਵਾਰ ਨੂੰ ਭੋਪਾਲ ਵਿਚ ਸਾਦੇ ਪੈਟਰੋਲ ਦੀ ਕੀਮਤ 96.37 ਰੁਪਏ ਸੀ।

ਜ਼ਿਕਰਯੋਗ ਹੈ ਕਿ ਨਵੇਂ ਸਾਲ ਦੇ ਬਾਅਦ ਤੋਂ ਰਾਜਧਾਨੀ ਵਿਚ ਤੇਲ ਦੀ ਕੀਮਤ ਵਿਚ ਲਗਭਗ ਪੰਜ ਰੁਪਏ ਦਾ ਵਾਧਾ ਹੋਇਆ ਹੈ। 1 ਜਨਵਰੀ ਨੂੰ ਭੋਪਾਲ ਵਿਚ ਆਮ ਤੇਲ ਦੀ ਕੀਮਤ 91.46 ਰੁਪਏ ਪ੍ਰਤੀ ਲੀਟਰ ਸੀ। ਅੰਕੜਿਆਂ 'ਤੇ ਨਜ਼ਰ ਮਾਰੀਏ ਤਾਂ ਇਕ ਸਾਲ ਤੋਂ ਵੀ ਘੱਟ ਸਮੇਂ ਵਿਚ ਪੈਟਰੋਲ ਦੀ ਕੀਮਤ ਵਿਚ ਲਗਭਗ 19 ਰੁਪਏ ਪ੍ਰਤੀ ਲੀਟਰ ਦਾ ਵਾਧਾ ਹੋਇਆ ਹੈ। 1 ਜੂਨ 2020 ਨੂੰ ਭੋਪਾਲ ਵਿਚ ਪੈਟਰੋਲ 77.56 ਰੁਪਏ ਪ੍ਰਤੀ ਲੀਟਰ ਸੀ, ਜੋ 13 ਫਰਵਰੀ ਤੱਕ 18.81 ਰੁਪਏ ਵਧ ਕੇ 96.37 ਰੁਪਏ ਦੇ ਰਿਕਾਰਡ ਪੱਧਰ ਤੱਕ ਪਹੁੰਚ ਗਿਆ। ਇਸੇ ਤਰ੍ਹਾਂ 1 ਜੂਨ, 2020 ਨੂੰ ਡੀਜ਼ਲ ਦੀ ਕੀਮਤ 68.27 ਰੁਪਏ ਸੀ ਜੋ ਕਿ 13 ਫਰਵਰੀ ਤੱਕ 18.54 ਰੁਪਏ ਵਧ ਕੇ 86.84 ਪ੍ਰਤੀ ਲੀਟਰ ਹੋ ਗਈ ਹੈ।

ਇਹ ਵੀ ਪੜ੍ਹੋ : FD 'ਚ ਨਿਵੇਸ਼ ਕਰਨ ਵਾਲਿਆਂ ਲਈ ਖ਼ੁਸ਼ਖ਼ਬਰੀ, ਹੁਣ ਇਨ੍ਹਾਂ ਬੈਂਕਾਂ ਨੇ ਕੀਤੀ ਵਿਆਜ ਦਰਾਂ ਵਿਚ ਤਬਦੀਲੀ

ਦੇਸ਼ ਦੇ ਪ੍ਰਮੁੱਖ ਸ਼ਹਿਰਾਂ ਵਿਚ ਪੈਟਰੋਲ ਦੀਆਂ ਕੀਮਤਾਂ

ਕੀਮਤਾਂ ਵਿਚ ਵਾਧੇ ਕਾਰਨ ਮੁੰਬਈ ਵਿਚ ਪੈਟਰੋਲ 95 ਰੁਪਏ ਪ੍ਰਤੀ ਲੀਟਰ ਤੋਂ ਉਪਰ ਪਹੁੰਚ ਗਿਆ ਹੈ। ਹੁਣ ਦਿੱਲੀ ਵਿਚ ਪੈਟਰੋਲ 88.73 ਰੁਪਏ / ਲੀਟਰ ਅਤੇ ਡੀਜ਼ਲ 79.06 / ਰੁਪਏ ਲੀਟਰ ਹੋ ਗਿਆ ਹੈ। ਮੁੰਬਈ 'ਚ ਪੈਟਰੋਲ ਦੀਆਂ ਕੀਮਤਾਂ 95.21 ਰੁਪਏ ਪ੍ਰਤੀ ਲੀਟਰ ਅਤੇ ਡੀਜ਼ਲ 86.04 ਰੁਪਏ ਪ੍ਰਤੀ ਲੀਟਰ ਦੇ ਰਿਕਾਰਡ ਪੱਧਰ' ਤੇ ਪਹੁੰਚ ਗਈਆਂ ਹਨ। ਚੇਨਈ ਵਿਚ ਹੁਣ ਪੈਟਰੋਲ ਦੀ ਕੀਮਤ ਹੁਣ 90.96 ਰੁਪਏ ਪ੍ਰਤੀ ਲੀਟਰ ਅਤੇ ਡੀਜ਼ਲ ਦੀ ਕੀਮਤ 84.16 ਰੁਪਏ ਪ੍ਰਤੀ ਲੀਟਰ ਹੈ। ਕੋਲਕਾਤਾ ਵਿਚ ਪੈਟਰੋਲ 90.01 ਰੁਪਏ ਪ੍ਰਤੀ ਲੀਟਰ ਅਤੇ ਡੀਜ਼ਲ ਨੂੰ 82.65 ਰੁਪਏ ਪ੍ਰਤੀ ਲੀਟਰ ਕਰ ਦਿੱਤਾ ਗਿਆ ਹੈ।

ਇਹ ਵੀ ਪੜ੍ਹੋ : ਮਹਿੰਦਰਾ ਨੇ ਲਾਂਚ ਕੀਤਾ ਸਕਾਰਪੀਓ ਦਾ ਹੁਣ ਤੱਕ ਦਾ ਸਭ ਤੋਂ ਸਸਤਾ ਮਾਡਲ

ਪੈਟਰੋਲ ਦੀਆਂ ਕੀਮਤਾਂ ਤਿੰਨ ਅੰਕਾਂ 'ਤੇ ਪਹੁੰਚਣ ਤੋਂ ਪਹਿਲਾਂ ਮਸ਼ੀਨਾਂ ਅਪਡੇਟ ਕਰਨ ਦੀ ਹੋ ਰਹੀ ਤਿਆਰੀ

ਜੇ ਦਿੱਲੀ ਵਿਚ ਪੈਟਰੋਲ ਦੀਆਂ ਕੀਮਤਾਂ 100 ਰੁਪਏ ਜਾਂ ਇਸ ਤੋਂ ਵੱਧ ਹੋ ਜਾਂਦੀਆਂ ਹਨ, ਤਾਂ ਕੀ ਲੋਕਾਂ ਨੂੰ ਪੈਟਰੋਲ ਲੈਣ ਵਿਚ ਕੋਈ ਦਿੱਕਤ ਆਵੇਗੀ? ਕੀ ਪੈਟਰੋਲ ਪੰਪਾਂ ਤੇ ਮੌਜੂਦ ਮਸ਼ੀਨਾਂ ਵਿਚ ਅਜਿਹੀ ਕੋਈ ਸਹੂਲਤ ਹੈ ਕਿ ਉਹ ਤਿੰਨ ਅੰਕਾਂ ਦੇ ਰੇਟ ਵੀ ਪ੍ਰਦਰਸ਼ਤ ਕਰ ਸਕਦੀਆਂ ਹਨ? ਕੀ ਲੋਕਾਂ ਨਾਲ ਕੋਈ ਧੋਖਾਧੜੀ ਹੋਵੇਗੀ? ਅਜਿਹੀਆਂ ਸਾਰੀਆਂ ਮੁਸ਼ਕਲਾਂ ਤੋਂ ਬਚਾਅ ਲਈ, ਦਿੱਲੀ ਦੇ ਪੈਟਰੋਲ ਪੰਪ ਮਾਲਕਾਂ ਨੇ ਤਿਆਰੀ ਆਰੰਭ ਕਰ ਦਿੱਤੀ ਹੈ, ਕਿ ਜੇ ਦਿੱਲੀ ਵਿਚ ਪੈਟਰੋਲ ਦੀਆਂ ਕੀਮਤਾਂ 100 ਰੁਪਏ ਪ੍ਰਤੀ ਲੀਟਰ ਤੱਕ ਪਹੁੰਚ ਜਾਂਦੀਆਂ ਹਨ ਤਾਂ ਲੋਕਾਂ ਨੂੰ ਪੈਟਰੋਲ ਪੰਪ ਤੋਂ ਤੇਲ ਪ੍ਰਾਪਤ ਕਰਨ ਵਿਚ ਕਿਸੇ ਪ੍ਰੇਸ਼ਾਨੀ ਦਾ ਸਾਹਮਣਾ ਨਹੀਂ ਕਰਨਾ ਪਏਗਾ।

ਇਹ ਵੀ ਪੜ੍ਹੋ : 15 ਫਰਵਰੀ ਤੋਂ ਸਾਰੇ ਵਾਹਨਾਂ 'ਚ ਫਾਸਟੈਗ ਹੋਵੇਗਾ ਲਾਜ਼ਮੀ, ਜਾਣਕਾਰੀ ਨਾ ਹੋਣ ਤੇ ਭਰਨਾ ਪੈ ਸਕਦਾ ਹੈ ਦੁੱਗਣਾ ਜੁਰਮਾਨਾ

ਦਿੱਲੀ ਵਿਚ ਕੁਝ ਮਸ਼ੀਨਾਂ ਅਜੇ ਵੀ ਪੁਰਾਣੀਆਂ, ਹੋ ਸਕਦੀ ਹੈ ਸਮੱਸਿਆ

ਇਸ ਮਾਮਲੇ ਵਿਚ ਆਲ ਇੰਡੀਆ ਪੈਟਰੋਲੀਅਮ ਡੀਲਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ ਅਜੇ ਬਾਂਸਲ ਦਾ ਕਹਿਣਾ ਹੈ ਕਿ ਤਿੰਨੋਂ ਕੰਪਨੀਆਂ ਦੇ ਦਿੱਲੀ ਵਿਚ 398 ਪੈਟਰੋਲ ਪੰਪ ਹਨ। ਵੈਸੇ ਤਾਂ ਬਹੁਤ ਸਾਰੀਆਂ ਨਵੀਆਂ ਮਸ਼ੀਨਾਂ ਸਥਾਪਤ ਕੀਤੀਆਂ ਹੋਈਆਂ ਹਨ ਪਰ ਕੁਝ ਪੰਪਾਂ 'ਤੇ ਪੈਟਰੋਲ ਦੀਆਂ ਕੀਮਤਾਂ ਤਿੰਨ ਅੰਕਾਂ ਤੱਕ ਪਹੁੰਚਣ ਸਮੇਂ ਦਿੱਕਤ ਆ ਸਕਦੀ ਹੈ। ਇਨ੍ਹਾਂ ਵਿਚ ਸਭ ਤੋਂ ਵੱਡੀ ਸਮੱਸਿਆ ਹੋਵੇਗੀ ਤੇਲ ਦੀਆਂ ਕੀਮਤਾਂ ਦਾ ਮਸ਼ੀਨ ਵਿਚ ਠੀਕ ਢੰਗ ਨਾਲ ਡਿਸਪਲੇ ਨਾ ਹੋਣਾ। ਹਾਲਾਂਕਿ ਜਿਹੜੇ ਪੈਟਰੋਲ ਪੰਪਾਂ ਵਿਚ ਨਵੇਂ ਡਿਜੀਟਲ ਡਿਸਪੈਂਸਰ ਸਥਾਪਤ ਕੀਤੇ ਗਏ ਹਨ ਉਥੇ ਇਹ ਸਮੱਸਿਆ ਨਹੀਂ ਹੋਵੇਗੀ। ਦੂਜੇ ਪਾਸੇ ਜਿਹੜੇ ਪੈਟਰੋਲ ਪੰਪਾਂ 'ਤੇ ਪੁਰਾਣੀਆਂ ਮਸ਼ੀਨਾਂ ਲੱਗੀਆਂ ਹੋਈਆਂ ਉਥੇ ਤੇਲ ਦੀਆਂ ਕੀਮਤਾਂ ਤਿੰਨ ਅੰਕਾਂ ਤੱਕ ਪਹੁੰਚ ਜਾਣ 'ਤੇ ਕੁਝ ਸਮੱਸਿਆ ਹੋ ਸਕਦੀ ਹੈ। ਇਸ ਦਾ ਕਾਰਨ ਹੈ ਕਿ ਪੁਰਾਣੀਆਂ ਮਸ਼ੀਨਾਂ ਵਿਚ ਕੀਮਤਾਂ ਲਈ ਚਾਰ ਬਲਾਕ ਦਿੱਤੇ ਜਾਂਦੇ ਹਨ ਇਨ੍ਹਾਂ ਵਿਚ ਪਹਿਲੇ ਦੋ ਬਲਾਕਾਂ ਵਿਚ ਰੁਪਿਆ ਪ੍ਰਦਰਸ਼ਤ ਹੁੰਦਾ ਹੈ ਅਤੇ ਬਾਅਦ ਵਿਚ ਦੋ ਬਲਾਕਾਂ ਵਿਚ ਪੈਸੇ। ਹੁਣ ਜੇ ਕੀਮਤਾਂ ਤਿੰਨ ਅੰਕਾਂ 'ਤੇ ਪਹੁੰਚ ਜਾਂਦੀਆਂ ਹਨ, ਤਾਂ ਪਹਿਲੇ ਤਿੰਨ ਬਲਾਕਾਂ 'ਤੇ ਸਾਨੂੰ ਰੁਪਿਆ ਰਾਖਵਾਂ ਰੱਖਣਾ ਹੋਵੇਗਾ ਅਤੇ ਆਖਰੀ ਚੌਥਾ ਬਲਾਕ ਪੈਸੇ ਦਾ ਹੋਵੇਗਾ। ਅਜਿਹੀ ਸਥਿਤੀ ਵਿਚ ਕੁਝ ਸਮੱਸਿਆ ਹੋ ਸਕਦੀ ਹੈ। ਪਰ ਕੀਮਤਾਂ ਕਾਰਨ ਡਿਸਪੈਂਸਰ ਕੰਮ ਕਰਨਾ ਬੰਦ ਕਰ ਦੇਣਗੇ, ਅਜਿਹਾ ਨਹੀਂ ਹੋਵੇਗਾ।

ਇਹ ਵੀ ਪੜ੍ਹੋ : ‘ਟਿਕਟਾਕ ਇੰਡੀਆ ਨੂੰ ਖਰੀਦ ਸਕਦਾ ਹੈ ਇਨਮੋਬੀ’

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।