Nokia Solutions ਨੇ ਇਸ ਕੰਪਨੀ ਨੂੰ 786 ਕਰੋੜ ''ਚ ਵੇਚੀ ਆਪਣੀ ਹਿੱਸੇਦਾਰੀ

ਨਵੀਂ ਦਿੱਲੀ: ਨੋਕੀਆ ਸਲਿਊਸ਼ਨਜ਼ ਐਂਡ ਨੈੱਟਵਰਕਸ ਇੰਡੀਆ ਨੇ ਕਰਜ਼ੇ ਵਿੱਚ ਡੁੱਬੀ ਦੂਰਸੰਚਾਰ ਕੰਪਨੀ ਵੋਡਾਫੋਨ ਆਈਡੀਆ ਲਿਮਟਿਡ (VIL) 'ਚ ਲਗਭਗ ਇੱਕ ਫੀਸਦੀ ਹਿੱਸੇਦਾਰੀ 786 ਕਰੋੜ ਰੁਪਏ ਵਿੱਚ ਖੁੱਲ੍ਹੇ ਬਾਜ਼ਾਰ ਵਿੱਚ ਵੇਚ ਦਿੱਤੀ। NSE 'ਤੇ ਥੋਕ ਸੌਦਿਆਂ ਬਾਰੇ ਉਪਲਬਧ ਅੰਕੜਿਆਂ ਦੇ ਅਨੁਸਾਰ ਨੋਕੀਆ ਸਲਿਊਸ਼ਨਜ਼ ਐਂਡ ਨੈੱਟਵਰਕਸ ਇੰਡੀਆ ਨੇ 102.70 ਕਰੋੜ ਸ਼ੇਅਰ ਵੇਚੇ, ਜੋ ਕਿ ਵੋਡਾਫੋਨ ਆਈਡੀਆ ਵਿੱਚ 0.95 ਪ੍ਰਤੀਸ਼ਤ ਹਿੱਸੇਦਾਰੀ ਦੇ ਬਰਾਬਰ ਹੈ। ਇਹ ਸ਼ੇਅਰ ਔਸਤਨ 7.65 ਰੁਪਏ ਪ੍ਰਤੀ ਸ਼ੇਅਰ ਦੀ ਕੀਮਤ 'ਤੇ ਵੇਚੇ ਗਏ, ਜਿਸ ਨਾਲ ਕੁੱਲ ਸੌਦਾ ਮੁੱਲ 785.67 ਕਰੋੜ ਰੁਪਏ ਹੋ ਗਿਆ।
ਇਸ ਦੌਰਾਨ ਗਲੋਬਲ ਇਨਵੈਸਟਮੈਂਟ ਕੰਪਨੀ ਗੋਲਡਮੈਨ ਸੈਕਸ ਨੇ ਵੋਡਾਫੋਨ ਆਈਡੀਆ 'ਚ 59.86 ਕਰੋੜ ਸ਼ੇਅਰ ਜਾਂ 0.55 ਪ੍ਰਤੀਸ਼ਤ ਹਿੱਸੇਦਾਰੀ ਖਰੀਦੀ ਹੈ। ਵੋਡਾਫੋਨ ਆਈਡੀਆ ਦੇ ਸ਼ੇਅਰਾਂ ਦੇ ਹੋਰ ਖਰੀਦਦਾਰਾਂ ਦੇ ਵੇਰਵੇ ਪਤਾ ਨਹੀਂ ਲੱਗ ਸਕੇ। ਪਿਛਲੇ ਸਾਲ ਜੂਨ ਵਿੱਚ ਵੋਡਾਫੋਨ ਆਈਡੀਆ ਨੇ ਐਲਾਨ ਕੀਤਾ ਸੀ ਕਿ ਉਹ ਨੋਕੀਆ ਇੰਡੀਆ ਅਤੇ ਐਰਿਕਸਨ ਇੰਡੀਆ ਨੂੰ ਉਨ੍ਹਾਂ ਦੇ ਅੰਸ਼ਕ ਬਕਾਏ ਦਾ ਭੁਗਤਾਨ ਕਰਨ ਲਈ 2,458 ਕਰੋੜ ਰੁਪਏ ਦੇ ਸ਼ੇਅਰ ਅਲਾਟ ਕਰੇਗੀ।