ਜਾਪਾਨੀ ਸੈਮੀਕੰਡਕਟਰ ਕੰਪਨੀਆਂ ਭਾਰਤ ’ਚ ਯੂਨਿਟ ਲਗਾਉਣ ਦੀਆਂ ਚਾਹਵਾਨ : ਡੇਲਾਇਟ

ਨਵੀਂ ਦਿੱਲੀ (ਭਾਸ਼ਾ) – ਜਾਪਾਨ ਦੀਆਂ ਕੰਪਨੀਆਂ ਭਾਰਤ ’ਚ ਸੈਮੀਕੰਡਕਟਰ ਯੂਨਿਟ ਲਗਾਉਣ ਦੀਆਂ ਚਾਹਵਾਨ ਹਨ। ਉਨ੍ਹਾਂ ਕੋਲ ਘਰੇਲੂ ਕੰਪਨੀਆਂ ਨਾਲ ਸਾਂਝੇਦਾਰੀ ਕਰਨ ਲਈ ਹਰ ਤਰ੍ਹਾਂ ਦੀ ਮੁਹਾਰਤ ਵੀ ਹੈ। ਵਿੱਤੀ ਸਲਾਹ ਅਤੇ ਲੇਖਾ ਪ੍ਰੀਖਿਆ ਸੇਵਾ ਪ੍ਰਦਾਤਾ ਡੇਲਾਇਟ ਨੇ ਕਿਹਾ ਕਿ ਭਾਰਤ ’ਚ ਸੈਮੀਕੰਡਕਟਰ ਸੈਕਟਰ ਦੀ ਗ੍ਰੋਥ ਨੂੰ ਬੜਾਵਾ ਦੇਣ ਲਈ ਕੁਸ਼ਲ ਕਾਰਜਬਲ, ਧਨ ਅਤੇ ਸਮਰਥਨ ਦੇਣ ਵਾਲੇ ਉਪਾਵਾਂ ਦੀ ਨਿਰੰਤਰਤਾ ਮਹੱਤਵਪੂਰਨ ਹੈ। ਡੇਲਾਇਟ ਜਾਪਾਨ ਦੇ ਸ਼ਿੰਗੋ ਕਾਮਯਾ ਨੇ ਕਿਹਾ ਕਿ ਜਾਪਾਨ ਦੀਆਂ ਕੰਪਨੀਆਂ ਭਾਰਤ ਨੂੰ ਲੈ ਕੇ ਕਾਫੀ ਉਤਸ਼ਾਹਿਤ ਹੈ।

ਅਮਰੀਕਾ ਤੋਂ ਬਾਅਦ ਦੂਜਾ ਕਵਾਡ ਪਾਰਟਨਰ

ਭਾਰਤ ਅਨੁਸਾਰ ਜਾਪਾਨ ਸੈਮੀਕੰਡਕਟਰ ਮਾਹੌਲ ਦੇ ਸਾਂਝੇ ਵਿਕਾਸ ਅਤੇ ਆਪਣੀ ਗਲੋਬਲ ਸਪਲਾਈ ਚੇਨ ਦੀ ਮਜ਼ਬੂਤੀ ਨੂੰ ਬਣਾਏ ਰੱਖਣ ਲਈ ਭਾਰਤ ਨਾਲ ਇਕ ਸਮਝੌਤੇ ’ਤੇ ਹਸਤਾਖਰ ਕਰਨ ਵਾਲਾ ਅਮਰੀਕਾ ਤੋਂ ਬਾਅਦ ਦੂਜਾ ਕਵਾਡ ਪਾਰਟਨਰ ਹੈ। ਜਾਪਾਨ ਨੇ ਇਸ ਸਮਝੌਤੇ ’ਤੇ ਜੁਲਾਈ ’ਚ ਦਸਤਖਤ ਕੀਤੇ ਸਨ। ਕਵਾਡ ਭਾਰਤ, ਆਸਟ੍ਰੇਲੀਆ, ਜਾਪਾਨ ਅਤੇ ਅਮਰੀਕਾ ਦਾ ਇਕ ਗਰੁੱਪ ਹੈ ਜੋ ਪ੍ਰਸ਼ਾਂਤ ਖੇਤਰ ਲਈ ਮਹੱਤਵਪੂਰਨ ਪਲੇਟਫਾਰਮ ਹੈ। ਡੇਲਾਇਟ ਇੰਡੀਆ ਦੇ ਮੁਖੀ (ਰਣਨੀਤੀ, ਜੋਖਿਮ ਅਤੇ ਲੈਣ-ਦੇਣ) ਰੋਹਿਤ ਬੇਰੀ ਨੇ ਕਿਹਾ ਕਿ ਟੈਕਨੋਲੋਜੀ ਅਤੇ ਐਕਸਪਰਟੀਜ਼ ਨੂੰ ਦੇਖਦੇ ਹੋਏ ਸੈਮੀਕੰਡਕਟਰ ਦੇ ਅਜਿਹੇ ਮਹੱਤਵਪੂਰਨ ਮਾਹੌਲ ਨੂੰ ਵਿਕਸਤ ਕਰਨ ਲਈ ਜਾਪਾਨ ਤੋਂ ਬਿਹਤਰ ਕੋਈ ਸਾਂਝੇਦਾਰ ਨਹੀਂ ਹੈ।

10 ਲੱਖ ਨੌਕਰੀਆਂ ਪੈਦਾ ਹੋਣ ਦੀ ਹੈ ਗੁੰਜਾਇੰਸ਼

ਭਾਰਤ ਸੈਮੀਕੰਡਕਟਰ ਵਿਨਿਰਮਾਣ ਕੇਂਦਰ ਬਣਨ ਵੱਲ ਵਧ ਰਿਹਾ ਹੈ। ਇਕ ਰਿਪੋਰਟ ’ਚ ਕਿਹਾ ਗਿਆ ਹੈ ਕਿ ਸੈਮੀਕੰਡਕਟਰ ਖੇਤਰ ’ਚ ਤੇਜ਼ੀ ਨਾਲ ਅੱਗੇ ਵਧਦਾ ਭਾਰਤ 2026 ਤੱਕ ਇਸ ਦੇ ਵੱਖ-ਵੱਖ ਖੇਤਰਾਂ ’ਚ 10 ਲੱਖ ਨੌਕਰੀਆਂ ਪੈਦਾ ਕਰ ਸਕਦਾ ਹੈ। ਪ੍ਰਤਿਭਾ ਹੱਲ ਕੰਪਨੀ ਐੱਨ. ਐੱਲ. ਬੀ. ਸਰਵਿਸਿਜ਼ ਦੀ ਇਕ ਰਿਪੋਰਟ ’ਚ ਕਿਹਾ ਗਿਆ ਹੈ ਕਿ ਇਹ ਮੰਗ ਵੱਖ-ਵੱਖ ਸ਼੍ਰੇਣੀਆਂ ’ਚ ਦਿਸਣ ਦੀ ਉਮੀਦ ਹੈ।

ਇਨ੍ਹਾਂ ’ਚ ਚਿਪ ਸੈਮੀਕੰਡਕਟਰ ਵਿਨਿਰਮਾਣ ’ਚ ਲੱਗਭਗ 3 ਲੱਖ ਨੌਕਰੀਆਂ, ਏ. ਟੀ. ਐੱਮ. ਪੀ. (ਅਸੈਂਬਲੀ, ਪ੍ਰੀਖਣ, ਮਾਰਕਿੰਗ ਅਤੇ ਪੈਕੇਜਿੰਗ) ’ਚ ਲੱਗਭਗ 2 ਲੱਖ ਨੌਕਰੀਆਂ ਅਤੇ ਚਿਪ ਡਿਜ਼ਾਈਨ, ਸਾਫਟਵੇਅਰ ਵਿਕਾਸ, ਸਿਸਟਮ ਸਰਕਟ ਅਤੇ ਵਿਨਿਰਮਾਣ ਸਪਲਾਈ ਲੜੀ ਪ੍ਰਬੰਧਨ ’ਚ ਵਾਧੂ ਅਹੁਦੇ ਸ਼ਾਮਲ ਹਨ।