ਵਿਦੇਸ਼ੀ ਕਰੰਸੀ ਭੰਡਾਰ 3.82 ਅਰਬ ਡਾਲਰ ਵਧ ਕੇ ਫਿਰ 700 ਅਰਬ ਡਾਲਰ ਤੋਂ ਪਾਰ

ਮੁੰਬਈ, (ਭਾਸ਼ਾ)- ਦੇਸ਼ ਦਾ ਵਿਦੇਸ਼ੀ ਕਰੰਸੀ ਭੰਡਾਰ 10 ਅਪ੍ਰੈਲ ਨੂੰ ਖਤਮ ਹਫਤੇ ਦੌਰਾਨ 3.82 ਅਰਬ ਡਾਲਰ ਵਧ ਕੇ 700 ਅਰਬ ਡਾਲਰ ਤੋਂ ਪਾਰ ਭਾਵ 700.94 ਅਰਬ ਡਾਲਰ ਰਿਹਾ। ਭਾਰਤੀ ਰਿਜ਼ਰਵ ਬੈਂਕ ਨੇ ਇਹ ਜਾਣਕਾਰੀ ਦਿੱਤੀ। ਇਸ ਤੋਂ ਪਹਿਲਾਂ 3 ਅਪ੍ਰੈਲ ਨੂੰ ਖਤਮ ਹਫਤੇ ’ਚ ਕੁੱਲ ਭੰਡਾਰ 9.06 ਅਰਬ ਡਾਲਰ ਵਧ ਕੇ 697.12 ਅਰਬ ਡਾਲਰ ਰਿਹਾ ਸੀ।

ਪੱਛਮੀ ਏਸ਼ੀਆ ਸੰਘਰਸ਼ ਦੀ ਸ਼ੁਰੂਆਤ ਤੋਂ ਪਹਿਲਾਂ ਇਸ ਸਾਲ 27 ਫਰਵਰੀ ਨੂੰ ਖਤਮ ਹਫਤੇ ਦੌਰਾਨ ਵਿਦੇਸ਼ੀ ਕਰੰਸੀ ਭੰਡਾਰ 728.49 ਅਰਬ ਡਾਲਰ ਦੇ ਸਭ ਤੋਂ ਉੱਚੇ ਪੱਧਰ ’ਤੇ ਪਹੁੰਚ ਗਿਆ ਸੀ। ਹਾਲਾਂਕਿ ਸੰਘਰਸ਼ ਕਾਰਨ ਰੁਪਏ ’ਤੇ ਦਬਾਅ ਵਧਿਆ ਅਤੇ ਆਰ. ਬੀ. ਆਈ. ਨੂੰ ਵਿਦੇਸ਼ੀ ਕਰੰਸੀ ਬਾਜ਼ਾਰ ’ਚ ਡਾਲਰ ਦੀ ਵਿਕਰੀ ਰਾਹੀਂ ਦਖਲ ਦੇਣਾ ਪਿਆ, ਜਿਸ ਕਾਰਨ ਲਗਾਤਾਰ ਕਈ ਹਫਤਿਆਂ ਤੱਕ ਭੰਡਾਰ ’ਚ ਗਿਰਾਵਟ ਦੇਖੀ ਗਈ ਸੀ।

ਐੱਫ. ਸੀ. ਏ., ਸੋਨਾ ਅਤੇ ਐੱਸ. ਡੀ. ਆਰ. ’ਚ ਮਜ਼ਬੂਤੀ

ਕੇਂਦਰੀ ਬੈਂਕ ਦੇ ਅੰਕੜਿਆਂ ਅਨੁਸਾਰ 10 ਅਪ੍ਰੈਲ ਨੂੰ ਖਤਮ ਹਫਤੇ ਲਈ, ਵਿਦੇਸ਼ੀ ਕਰੰਸੀ ਭੰਡਾਰ ਦਾ ਇਕ ਪ੍ਰਮੁੱਖ ਹਿੱਸਾ ਵਿਦੇਸ਼ੀ ਕਰੰਸੀ ਸੰਪਤੀ (ਐੱਫ. ਸੀ. ਏ.) 3.12 ਅਰਬ ਡਾਲਰ ਵਧ ਕੇ 555.98 ਅਰਬ ਡਾਲਰ ’ਤੇ ਰਹੀ। ਆਰ. ਬੀ. ਆਈ. ਨੇ ਕਿਹਾ ਕਿ ਸਮੀਖਿਆ ਅਧੀਨ ਹਫਤੇ ਦੌਰਾਨ ਸੋਨੇ ਦੇ ਭੰਡਾਰ ਦਾ ਮੁੱਲ 60.1 ਕਰੋੜ ਡਾਲਰ ਵਧ ਕੇ 121.34 ਅਰਬ ਡਾਲਰ ਹੋ ਗਿਆ। ਵਿਸ਼ੇਸ਼ ਡਰਾਇੰਗ ਰਾਈਟਸ (ਐੱਸ. ਡੀ. ਆਰ.) 5.6 ਕਰੋੜ ਡਾਲਰ ਵਧ ਕੇ 18.76 ਅਰਬ ਡਾਲਰ ਰਿਹਾ।

ਅੰਕੜਿਆਂ ਮੁਤਾਬਕ ਸਮੀਖਿਆ ਅਧੀਨ ਹਫਤੇ ਦੇ ਆਖਿਰ ’ਚ ਅੰਤਰਰਾਸ਼ਟਰੀ ਕਰੰਸੀ ਫੰਡ (ਆਈ. ਐੱਮ. ਐੱਫ.) ਕੋਲ ਭਾਰਤ ਦੀ ਰਾਖਵੀਂ ਸਥਿਤੀ 4.1 ਕਰੋੜ ਡਾਲਰ ਵਧ ਕੇ 4.85 ਅਰਬ ਡਾਲਰ ਰਹੀ।