ਨਿੱਜੀ ਨੌਕਰੀਪੇਸ਼ਾਂ ਲਈ ਖ਼ੁਸ਼ਖ਼ਬਰੀ, 31 ਦਸੰਬਰ ਤੱਕ ਮਿਲੇਗਾ ਇਹ ਤੋਹਫ਼ਾ
12/14/2020 9:21:48 PM
ਨਵੀਂ ਦਿੱਲੀ— ਰਿਟਾਇਰਮੈਂਟ ਫੰਡ ਸੰਸਥਾ ਈ. ਪੀ. ਐੱਫ. ਓ. ਦੇ ਦਸੰਬਰ ਦੇ ਅੰਤ ਤੱਕ ਇਕ ਵਾਰ 'ਚ ਤਕਰੀਬਨ ਛੇ ਕਰੋੜ ਗਾਹਕਾਂ ਦੇ ਕਰਮਚਾਰੀ ਭਵਿੱਖ ਫੰਡ (ਈ. ਪੀ. ਐੱਫ.) ਖਾਤਿਆਂ 'ਚ 2019-20 ਲਈ 8.5 ਫ਼ੀਸਦੀ ਦੀ ਦਰ ਨਾਲ ਵਿਆਜ ਪਾ ਸਕਦੀ ਹੈ।
ਇਸ ਸਾਲ ਸਤੰਬਰ 'ਚ ਕਰਮਚਾਰੀ ਭਵਿੱਖ ਫੰਡ ਸੰਗਠਨ ਨੇ ਕਿਰਤ ਮੰਤਰੀ ਸੰਤੋਸ਼ ਗੰਗਵਾਰ ਦੀ ਪ੍ਰਧਾਨਗੀ 'ਚ ਹੋਈ ਆਪਣੇ ਟਰੱਸਟੀਆਂ ਦੀ ਮੀਟਿੰਗ 'ਚ 8.5 ਫ਼ੀਸਦੀ ਵਿਆਜ ਨੂੰ 8.15 ਫ਼ੀਸਦੀ ਅਤੇ 0.35 ਫ਼ੀਸਦੀ ਦੀਆਂ ਦੋ ਕਿਸ਼ਤਾਂ 'ਚ ਵੰਡਣ ਦਾ ਫੈਸਲਾ ਕੀਤਾ ਸੀ।
ਇਕ ਉੱਚ ਸੂਤਰ ਨੇ ਜਾਣਕਾਰੀ ਦਿੱਤੀ ਹੈ ਕਿ ਕਿਰਤ ਮੰਤਰਾਲਾ ਨੇ ਵਿੱਤੀ ਮੰਤਰਾਲਾ ਨੇ ਇਸ ਮਹੀਨੇ ਦੇ ਸ਼ੁਰੂ 'ਚ ਪੱਤਰ ਲਿਖ ਕੇ ਈ. ਪੀ. ਐੱਫ. 'ਤੇ 2019-20 ਲਈ 8.5 ਫ਼ੀਸਦੀ ਵਿਆਜ ਇਕ ਵਾਰ 'ਚ ਦੇਣ ਦੀ ਸਹਿਮਤੀ ਮੰਗੀ ਹੈ। ਉਨ੍ਹਾਂ ਕਿਹਾ, ''ਵਿੱਤ ਮੰਤਰਾਲਾ ਵੱਲੋਂ ਪ੍ਰਵਾਨਗੀ ਕੁਝ ਦਿਨਾਂ 'ਚ ਹੀ ਦਿੱਤੀ ਜਾ ਸਕਦੀ ਹੈ ਅਤੇ ਇਸ ਮਹੀਨੇ 'ਚ ਹੀ ਵਿਆਜ ਖਾਤਿਆਂ 'ਚ ਆਉਣ ਦੀ ਸੰਭਾਵਨਾ ਹੈ।''
ਸੂਤਰ ਨੇ ਕਿਹਾ ਅੱਗੇ ਕਿਹਾ ਕਿ ਇਸ ਤੋਂ ਪਹਿਲਾਂ ਵਿੱਤ ਮੰਤਰਾਲਾ ਨੇ ਪਿਛਲੇ ਵਿੱਤੀ ਸਾਲ ਦੀ ਵਿਆਜ ਦਰ ਬਾਰੇ ਕੁਝ ਸਪੱਸ਼ਟੀਕਰਨ ਮੰਗੇ ਸਨ, ਜੋ ਦੇ ਦਿੱਤੇ ਗਏ ਹਨ। ਇਸ ਸਾਲ ਮਾਰਚ 'ਚ ਈ. ਪੀ. ਐੱਫ. ਓ. ਦੀ ਸਰਵਉੱਚ ਫੈਸਲੇ ਲੈਣ ਵਾਲੀ ਸੰਸਥਾ, ਕਿਰਤ ਮੰਤਰੀ ਸੰਤੋਸ਼ ਗੰਗਵਾਰ ਦੀ ਅਗਵਾਈ ਵਾਲੇ ਕੇਂਦਰੀ ਟਰੱਸਟ ਬੋਰਡ ਨੇ 2019-20 ਲਈ ਈ. ਪੀ. ਐੱਫ.'ਤੇ 8.5 ਫ਼ੀਸਦੀ ਦੀ ਵਿਆਜ ਦਰ ਨੂੰ ਮਨਜ਼ੂਰੀ ਦਿੱਤੀ ਸੀ। ਸੂਤਰ ਨੇ ਕਿਹਾ ਕਿ ਹੁਣ ਕਿਉਂਕਿ ਬਾਜ਼ਾਰ ਦੀ ਸੁਥਿਤੀ ਕਾਫ਼ੀ ਬਿਹਤਰ ਹੈ ਅਤੇ ਬੈਂਚਮਾਰਕ ਇੰਡੈਕਸ ਰਿਕਾਰਡ ਉਚਾਈ 'ਤੇ ਹਨ, ਇਸ ਲਈ ਇਕ ਵਾਰ 'ਚ ਪੂਰਾ ਵਿਆਜ ਖਾਤਿਆਂ 'ਚ ਭੇਜਣ 'ਚ ਕੋਈ ਸਮੱਸਿਆ ਨਹੀਂ ਹੋਵੇਗੀ।
