ਭਾਰਤ ’ਚ ਕਰਮਚਾਰੀਆਂ ਦੀ ਤਨਖਾਹ ’ਚ ਹੋ ਸਕਦੈ 9.5 ਫੀਸਦੀ ਦਾ ਵਾਧਾ

ਮੁੰਬਈ (ਭਾਸ਼ਾ) - ਅਰਥਵਿਵਸਥਾ ਦੇ ਵੱਖ-ਵੱਖ ਖੇਤਰਾਂ ’ਚ ਸਾਕਾਰਾਤਮਕ ਕਾਰੋਬਾਰੀ ਦ੍ਰਿਸ਼ ’ਚ ਭਾਰਤ ’ਚ ਅਗਲੇ ਕੈਲੰਡਰ ਸਾਲ ’ਚ 9.5 ਫੀਸਦੀ ਦਾ ਤਨਖਾਹ ਵਾਧਾ ਹੋਣ ਦਾ ਅੰਦਾਜ਼ਾ ਹੈ। ਇਕ ਸਰਵੇਖਣ ਰਿਪੋਰਟ ’ਚ ਇਹ ਸੰਭਾਵਨਾ ਜਤਾਈ ਗਈ ਹੈ। ਕੌਮਾਂਤਰੀ ਪੇਸ਼ੇਵਰ ਸੇਵਾ ਫਰਮ ਏਆਨ ਪੀ. ਐੱਲ. ਸੀ. ਦੇ ‘30ਵੇਂ ਸਾਲਾਨਾ ਤਨਖਾਹ ਵਾਧਾ ਅਤੇ ਕਾਰੋਬਾਰ’ ਸਰਵੇਖਣ ਦੌਰਾਨ ਇਹ ਗੱਲ ਸਾਹਮਣੇ ਆਈ ਹੈ।

ਸਰਵੇਖਣ ਰਿਪੋਰਟ ਮੁਤਾਬਕ ਇੰਜੀਨੀਅਰਿੰਗ, ਨਿਰਮਾਣ ਅਤੇ ਪ੍ਰਚੂਨ ਉਦਯੋਗਾਂ ’ਚ 10 ਫੀਸਦੀ ਤਨਖਾਹ ਵਾਧਾ ਹੋਣ ਦਾ ਅੰਦਾਜ਼ਾ ਹੈ। ਇਸ ਤੋਂ ਬਾਅਦ ਵਿੱਤੀ ਸੰਸਥਾਨਾਂ ’ਚ 9.9 ਫੀਸਦੀ ਦਾ ਤਨਖਾਹ ਵਾਧਾ ਹੋ ਸਕਦਾ ਹੈ।

ਹਾਲਾਂਕਿ, ਸਾਲ 2024 ਦੀ ਸ਼ੁਰੂਆਤ ਤਕਨੀਕੀ ਖੇਤਰ ਲਈ ਸਾਵਧਾਨੀ ਨਾਲ ਹੋਈ ਸੀ ਪਰ ਕੌਮਾਂਤਰੀ ਸਮਰੱਥਾ ਕੇਂਦਰਾਂ ਅਤੇ ਤਕਨੀਕੀ ਉਤਪਾਦਾਂ ਅਤੇ ਮੰਚਾਂ ਦੇ ਕਰਮਚਾਰੀਆਂ ਨੂੰ ਕ੍ਰਮਵਾਰ 9.9 ਫੀਸਦੀ ਅਤੇ 9.3 ਫੀਸਦੀ ਦਾ ਤਨਖਾਹ ਵਾਧਾ ਹੋਣ ਦੀ ਉਮੀਦ ਹੈ। ਹਾਲਾਂਕਿ, ਤਕਨੀਕੀ ਸਲਾਹ-ਮਸ਼ਵਰਾ ਅਤੇ ਸੇਵਾ ਖੇਤਰ ’ਚ ਤਨਖਾਹ ਵਾਧਾ 8.1 ਫੀਸਦੀ ਦੇ ਹੇਠਲੇ ਪੱਧਰ ’ਤੇ ਰਹਿ ਸਕਦਾ ਹੈ।

ਏਆਨ ’ਚ ਭਾਈਵਾਲ ਰੂਪਾਂਕ ਚੌਧਰੀ ਨੇ ਕਿਹਾ,‘‘ਕੌਮਾਂਤਰੀ ਆਰਥਿਕ ਚੁਣੌਤੀਆਂ ਦੇ ਬਾਵਜੂਦ ਸਾਡਾ ਅਧਿਐਨ ਭਾਰਤ ’ਚ ਕਈ ਖੇਤਰਾਂ ’ਚ ਸਾਕਾਰਾਤਮਕ ਕਾਰੋਬਾਰੀ ਦ੍ਰਿਸ਼ ਨੂੰ ਦਰਸਾਉਂਦਾ ਹੈ। ਇਹ ਧਾਰਨਾ ਸਥਾਨਕ ਬਾਜ਼ਾਰ ਦੇ ਦਮ ’ਤੇ ਅੱਗੇ ਵਧਣ ਵਾਲੇ ਕਈ ਖੇਤਰਾਂ ’ਚ ਜਾਰੀ ਹੈ ਅਤੇ ਇਹ ਨਿਰਮਾਣ, ਜੀਵਨ ਵਿਗਿਆਨ ਅਤੇ ਪ੍ਰਚੂਨ ਉਦਯੋਗਾਂ ’ਚ ਅੰਦਾਜ਼ਨ ਤਨਖਾਹ ਵਾਧੇ ਤੋਂ ਸਾਫ ਹੁੰਦੀ ਹੈ।