‘ਤੇਜ਼ਾਬੀ ਹਮਲਾ ਕਰਨ ਵਾਲਿਆਂ ਦੀ ਸਜ਼ਾ ਵਧਾਈ ਜਾਵੇ’ ਸੁਪਰੀਮ ਕੋਰਟ ਦਾ ਸਹੀ ਸੁਝਾਅ!

ਅਪਰਾਧੀ ਅਨਸਰਾਂ ਵੱਲੋਂ ਵੱਖ-ਵੱਖ ਅਪਰਾਧਾਂ ਨੂੰ ਅੰਜਾਮ ਦੇਣ ਜਾਂ ਨਿੱਜੀ ਦੁਸ਼ਮਣੀ ਕੱਢਣ ਲਈ ਵੱਖ-ਵੱਖ ਤਰੀਕੇ ਅਪਣਾਏ ਜਾਂਦੇ ਹਨ ਅਤੇ ਤੇਜ਼ਾਬ ਰਾਹੀਂ ਹਮਲਾ ਅਜਿਹਾ ਹੀ ਬੇਹੱਦ ਘਿਨਾਉਣਾ ਅਤੇ ਭਿਆਨਕ ਤਰੀਕਾ ਹੈ।

ਮਾਰਬਲ ਅਤੇ ਧਾਤ ਨੂੰ ਵੀ ਗਲਾ ਦੇਣ ਵਾਲੇ ‘ਕੰਸੈਂਟਰੇਟਿਡ ਸਲਫਿਊਰਿਕ ਐਸਿਡ’ ਦੀ ਹਮਲੇ ਦੇ ਹਥਿਆਰ ਵਜੋਂ ਹੁਣ ਖੁੱਲ੍ਹੀ ਵਰਤੋਂ ਹੋਣ ਲੱਗੀ ਹੈ, ਜਿਸ ਦੀਆਂ ਇਸੇ ਸਾਲ ਸਾਹਮਣੇ ਆਈਆਂ ਸਾਢੇ ਤਿੰਨ ਮਹੀਨਿਆਂ ਦੀਆਂ ਕੁਝ ਘਟਨਾਵਾਂ ਹੇਠਾਂ ਦਰਜ ਹਨ :

* 20 ਜਨਵਰੀ, 2026 ਨੂੰ ‘ਸ਼੍ਰੀਗੰਗਾਨਗਰ’ (ਰਾਜਸਥਾਨ) ’ਚ ਇਕ ਵਿਆਹ ਸਮਾਗਮ ’ਚ ਸ਼ਾਮਲ 14 ਸਾਲਾ ਬੱਚੀ ਨਾਲ ਉੱਥੇ ਮੌਜੂਦ ਇਕ ਫੋਟੋਗ੍ਰਾਫਰ ਨੇ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਅਤੇ ਬੱਚੀ ਵੱਲੋਂ ਉਸ ਨਾਲ ਗੱਲ ਨਾ ਕਰਨ ’ਤੇ ਫੋਟੋਗ੍ਰਾਫਰ ਨੇ ਉਸ ’ਤੇ ਤੇਜ਼ਾਬ ਸੁੱਟ ਕੇ ਉਸ ਨੂੰ ਜ਼ਖ਼ਮੀ ਕਰ ਦਿੱਤਾ।

* 17 ਫਰਵਰੀ ਨੂੰ ‘ਲੁਧਿਆਣਾ’ (ਪੰਜਾਬ) ਦੀ ‘ਦੁਗਰੀ ਕਾਲੋਨੀ’ ’ਚ ‘ਪਾਨ ਸਿੰਘ’ ਨਾਂ ਦੇ ਵਿਅਕਤੀ ਨੂੰ ਆਪਣੀ ਸਾਬਕਾ ਲਿਵ-ਇਨ-ਪਾਰਟਨਰ ’ਤੇ ਤੇਜ਼ਾਬ ਨਾਲ ਹਮਲਾ ਕਰਨ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ। ‘ਪਾਨ ਸਿੰਘ’ ਇੰਸਟਾਗ੍ਰਾਮ ’ਤੇ ਰੀਲ ਬਣਾਉਣ ਦੀ ਉਸਦੀ ਆਦਤ ਤੋਂ ਨਾਰਾਜ਼ ਸੀ।

* 8 ਮਾਰਚ ਨੂੰ ‘ਗੁਰੂਗ੍ਰਾਮ’ (ਹਰਿਆਣਾ) ’ਚ ਇਕ ਵਿਅਕਤੀ ਨੇ ਇਕ ਔਰਤ ’ਤੇ ਤੇਜ਼ਾਬ ਨਾਲ ਹਮਲਾ ਕਰਕੇ ਉਸ ਨੂੰ ਬੁਰੀ ਤਰ੍ਹਾਂ ਜ਼ਖ਼ਮੀ ਕਰ ਦਿੱਤਾ ਜਿਸ ਨੂੰ ਇਲਾਜ ਲਈ ਪੀ. ਜੀ. ਆਈ. ਐੱਮ. ਐੱਸ. ਰੋਹਤਕ ਰੈਫਰ ਕਰਨਾ ਪਿਆ।

* 13 ਮਾਰਚ ਨੂੰ ‘ਸੂਰਤ’ (ਗੁਜਰਾਤ) ਦੀ ‘ਫੈਮਿਲੀ ਕੋਰਟ’ ਦੇ ਅੰਦਰ ਜਦੋਂ 75 ਸਾਲਾ ਡਾ. ‘ਵਿਨੋਦ ਭਾਨੂਸ਼ਾਲੀ’ ਅਤੇ ਉਨ੍ਹਾਂ ਦੀ 61 ਸਾਲਾ ਪਤਨੀ ‘ਸ਼ਾਰਦਾ ਬੇਨ’ ਦੇ ਵਿਚਾਲੇ ਭਰਨ-ਪੋਸ਼ਣ ਭੱਤੇ ਅਤੇ ਘਰੇਲੂ ਹਿੰਸਾ ਸਬੰਧੀ ਮਾਮਲੇ ਦੀ ਸੁਣਵਾਈ ਹੋ ਰਹੀ ਸੀ, ਉਦੋਂ ਹੀ ਡਾ. ‘ਵਿਨੋਦ ਭਾਨੂਸ਼ਾਲੀ’ ਨੇ ‘ਸ਼ਾਰਦਾ ਬੇਨ’ ’ਤੇ ਤੇਜ਼ਾਬ ਨਾਲ ਹਮਲਾ ਕਰ ਦਿੱਤਾ ਜਿਸ ਨਾਲ ਉਸ ਦੀ ਇਕ ਅੱਖ ਦੀ ਰੋਸ਼ਨੀ ਚਲੀ ਗਈ।

* 27 ਮਾਰਚ ਨੂੰ ‘ਚਿਤੌੜਗੜ੍ਹ’ (ਰਾਜਸਥਾਨ) ’ਚ ਇਕ ਮਾਂ-ਬੇਟੀ ’ਤੇ ਤੇਜ਼ਾਬ ਹਮਲੇ ’ਚ ‘ਅਜਮੇਰ’ ਦੀ ਇਕ ਅਦਾਲਤ ਨੇ ਦੋਸ਼ੀ ‘ਮੁਹੰਮਦ ਇਸਮਾਈਲ’ ਨੂੰ ਉਮਰਕੈਦ ਦੀ ਸਜ਼ਾ ਸੁਣਾਈ। ਇਸ ਹਮਲੇ ’ਚ 12 ਸਾਲ ਦੀ ਬੱਚੀ ਦਾ ਚਿਹਰਾ ਅਤੇ ਸਰੀਰ ਬੁਰੀ ਤਰ੍ਹਾਂ ਝੁਲਸ ਗਿਆ ਸੀ ਤੇ ਉਸ ਦੀ ਮਾਂ ਵੀ ਗੰਭੀਰ ਰੂਪ ’ਚ ਜ਼ਖ਼ਮੀ ਹੋ ਗਈ ਸੀ।

* 1 ਅਪ੍ਰੈਲ ਨੂੰ ‘ਵਿਸ਼ਾਖਾਪਟਨਮ’ (ਆਂਧਰਾ ਪ੍ਰਦੇਸ਼) ਦੇ ‘ਗਜੂਵਾਕਾ’ ’ਚ ਇਕ ਵਿਅਕਤੀ ਨੇ ਕਿਸੇ ਰੰਜਿਸ਼ ਕਾਰਨ ਇਕ ਜੀਵਨ ਬੀਮਾ ਏਜੰਟ ਦੇ ਘਰ ਦੇ ਬਾਹਰ ਉਸ ’ਤੇ ਤੇਜ਼ਾਬ ਨਾਲ ਹਮਲਾ ਕਰਕੇ ਉਸ ਨੂੰ ਗੰਭੀਰ ਰੂਪ ’ਚ ਜ਼ਖ਼ਮੀ ਕਰ ਦਿੱਤਾ।

* 6 ਅਪ੍ਰੈਲ ਨੂੰ ‘ਹੈਦਰਾਬਾਦ’ (ਤੇਲੰਗਾਨਾ) ’ਚ ਇਕ ਔਰਤ ਨੂੰ ਇਕ 4 ਸਾਲਾ ਬੱਚੇ ਨੂੰ ਜ਼ਬਰਦਸਤੀ ਤੇਜ਼ਾਬ ਪਿਲਾ ਕੇ ਉਸ ਦੀ ਜ਼ਿੰਦਗੀ ਖ਼ਤਰੇ ’ਚ ਪਾਉਣ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ।

* 15 ਅਪ੍ਰੈਲ ਨੂੰ ਉੱਤਰ ਪੂਰਬੀ ਦਿੱਲੀ ਦੇ ‘ਗੋਕੁਲਪੁਰੀ’ ਇਲਾਕੇ ’ਚ ‘ਗੁਲਿਸਤਾਂ’ ਨਾਂ ਦੀ ਇਕ 26 ਸਾਲਾ ਔਰਤ ਨੂੰ ਆਪਣੀ 21 ਸਾਲਾ ਗੁਆਂਢਣ ’ਤੇ ਤੇਜ਼ਾਬ ਨਾਲ ਹਮਲਾ ਕਰਕੇ ਉਸ ਨੂੰ ਬੁਰੀ ਤਰ੍ਹਾਂ ਝੁਲਸਾ ਦੇਣ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ। ‘ਗੁਲਿਸਤਾਂ’ ਦਾ ਪੀੜਤਾ ਦੇ ਹੋਣ ਵਾਲੇ ਪਤੀ ਨਾਲ ਰੋਮਾਂਸ ਚੱਲ ਰਿਹਾ ਸੀ ਅਤੇ ਉਹ ਇਸ ਦਾ ਵਿਰੋਧ ਕਰ ਰਹੀ ਸੀ।

* 27 ਅਪ੍ਰੈਲ ਨੂੰ ‘ਪੀਲੀਭੀਤ’ (ਉੱਤਰ ਪ੍ਰਦੇਸ਼) ਦੇ ‘ਖੈਰੁੱਲਾ ਸ਼ਾਹ’ ਮੁਹੱਲੇ ’ਚ ‘ਸ਼ਿਲਪੀ’ ਨਾਂ ਦੀ ਇਕ ਔਰਤ ਨੇ ਆਪਣੇ ਪਤੀ ‘ਹੇਮੰਤ’ ਨਾਲ 5 ਸਾਲਾਂ ਤੋਂ ਚੱਲ ਰਹੇ ਵਿਵਾਦ ਦੇ ਕਾਰਨ ਉਸ ’ਤੇ ਤੇਜ਼ਾਬ ਸੁੱਟ ਦਿੱਤਾ ਜਿਸ ਨਾਲ ਉਹ ਬੁਰੀ ਤਰ੍ਹਾਂ ਝੁਲਸ ਗਿਆ। ਦੋਵਾਂ ਵਿਚਾਲੇ ਤਲਾਕ ਦੀ ਪ੍ਰਕਿਰਿਆ ਚੱਲ ਰਹੀ ਸੀ।

ਅਜਿਹੀਆਂ ਹੀ ਘਟਨਾਵਾਂ ਦੇ ਮੱਦੇਨਜ਼ਰ ਸੁਪਰੀਮ ਕੋਰਟ ਦੇ ਚੀਫ ਜਸਟਿਸ ਸੂਰਿਆਕਾਂਤ ਤੇ ਜਸਟਿਸ ‘ਜੌਏਮਾਲਿਆ ਬਾਗਚੀ’ ਨੇ 4 ਮਈ, 2026 ਨੂੰ ਤੇਜ਼ਾਬ ਹਮਲੇ ਦੀ ਪੀੜਤਾ ‘ਸ਼ਾਹੀਨ ਮਲਿਕ’ ਵੱਲੋਂ ਦਾਇਰ ਜਨਹਿੱਤ ਪਟੀਸ਼ਨ ਦੀ ਸੁਣਵਾਈ ਕਰਦੇ ਹੋਏ ਕੇਂਦਰ ਸਰਕਾਰ ਨੂੰ ਅਜਿਹੇ ਅਪਰਾਧਾਂ ਲਈ ਸਜ਼ਾ ਵਧਾਉਣ ’ਤੇ ਵਿਚਾਰ ਕਰਨ ਦਾ ਸੁਝਾਅ ਦਿੱਤਾ ਹੈ।

ਅਦਾਲਤ ਨੇ ਨਿਰਦੇਸ਼ ਦਿੱਤਾ ਕਿ ਢੁੱਕਵੀਂ ਸੋਧ ਹੋਣ ਤੱਕ ਜਿਨ੍ਹਾਂ ਲੋਕਾਂ ਨੂੰ ਜ਼ਬਰਦਸਤੀ ਤੇਜ਼ਾਬ ਪਿਲਾਇਆ ਗਿਆ ਹੋਵੇ ਜਾਂ ਜਿਨ੍ਹਾਂ ਨੂੰ ਸਰੀਰ ਦਾ ਸਰੂਪ ਵਿਗੜਨ ਤੋਂ ਇਲਾਵਾ ਅੰਦਰੂਨੀ ਸੱਟਾਂ ਆਈਆਂ ਹੋਣ, ਉਹ ਦਿਵਿਆਂਗ ਵਿਅਕਤੀਆਂ ਦਾ ਅਧਿਕਾਰ ਐਕਟ 2016 ਤਹਿਤ ਤੇਜ਼ਾਬ ਹਮਲਿਆਂ ਦੇ ਪੀੜਤਾਂ ਦੇ ਦਾਇਰੇ ’ਚ ਆਉਣਗੇ।

ਕੇਂਦਰ ਸਰਕਾਰ ਨੂੰ ਮਾਣਯੋਗ ਸੁਪਰੀਮ ਕੋਰਟ ਦੇ ਸੁਝਾਅ ’ਤੇ ਧਿਆਨ ਦੇ ਕੇ ਤੁਰੰਤ ਇਸ ਦਿਸ਼ਾ ’ਚ ਕਾਰਵਾਈ ਕਰਨੀ ਚਾਹੀਦੀ ਹੈ ਅਤੇ ਅਜਿਹੇ ਹਮਲਿਆਂ ’ਚ ਸ਼ਾਮਲ ਦੋਸ਼ੀਆਂ ਦੀ ਸਜ਼ਾ ਵਧਾਉਣੀ ਚਾਹੀਦੀ ਹੈ।

—ਵਿਜੇ ਕੁਮਾਰ