ਸਮਾਜ ਦੇ ਮਹਾਨ ਬਣਨ ਨਾਲ ਹੀ ਦੇਸ਼ ਮਹਾਨ ਬਣੇਗਾ : ਅਰੁਣ ਕੁਮਾਰ

ਅੰਮ੍ਰਿਤਸਰ : ਰਾਸ਼ਟਰੀ ਸਵੈਮ ਸੇਵਕ ਸੰਘ (RSS) ਵੱਲੋਂ ਅੱਜ ਅੰਮ੍ਰਿਤਸਰ ਦੇ ਹੋਟਲ ਗੋਲਡਨ ਗਲੈਕਸੀ ਵਿੱਚ ਇੱਕ ਵਿਸ਼ਾਲ 'ਯੁਵਾ ਸੰਮੇਲਨ' ਦਾ ਆਯੋਜਨ ਕੀਤਾ ਗਿਆ। ਇਸ ਸੰਮੇਲਨ ਵਿੱਚ ਅੰਮ੍ਰਿਤਸਰ ਮਹਾਨਗਰ ਦੇ ਲਗਭਗ 2000 ਨੌਜਵਾਨਾਂ ਨੇ ਉਤਸ਼ਾਹ ਨਾਲ ਹਿੱਸਾ ਲਿਆ। ਸਮਾਗਮ ਦੇ ਮੁੱਖ ਬੁਲਾਰੇ ਅਖਿਲ ਭਾਰਤੀ ਸਹਿ ਜਨਰਲ ਸਕੱਤਰ ਅਰੁਣ ਕੁਮਾਰ ਜੀ ਸਨ।

ਨੌਜਵਾਨਾਂ ਨੂੰ ਸੰਬੋਧਨ ਕਰਦਿਆਂ ਅਰੁਣ ਕੁਮਾਰ ਨੇ ਕਿਹਾ ਕਿ ਸਾਡੀ ਹਜ਼ਾਰਾਂ ਸਾਲਾਂ ਤੋਂ ਇੱਕ ਹੀ ਪਛਾਣ ਰਹੀ ਹੈ ਕਿ ਅਸੀਂ ਸਾਰੇ ਭਾਰਤੀ ਹਾਂ। ਉਨ੍ਹਾਂ ਕਿਹਾ ਕਿ ਭਾਰਤ ਇੱਕ ਪ੍ਰਾਚੀਨ ਅਤੇ ਸਨਾਤਨ ਰਾਸ਼ਟਰ ਹੈ। ਉਨ੍ਹਾਂ ਡਾ. ਬਾਬਾ ਸਾਹਿਬ ਅੰਬੇਡਕਰ ਜੀ ਦਾ ਹਵਾਲਾ ਦਿੰਦਿਆਂ ਦੱਸਿਆ ਕਿ ਭਾਰਤੀ ਸੰਵਿਧਾਨ ਦੀ ਪ੍ਰਸਤਾਵਨਾ (Preamble) ਵਿੱਚ ਵੀ 'We the people of India' ਭਾਵ 'ਅਸੀਂ ਭਾਰਤ ਦੇ ਲੋਕ' ਲਿਖ ਕੇ ਸਾਡੀ ਸਾਂਝੀ ਭਾਰਤੀ ਪਛਾਣ ਨੂੰ ਮਾਨਤਾ ਦਿੱਤੀ ਗਈ ਹੈ।

ਉਨ੍ਹਾਂ ਨੇ ਅਲੈਗਜ਼ੈਂਡਰ, ਹੀਰੋਡੋਟਸ ਅਤੇ ਵਾਸਕੋ ਡੀ ਗਾਮਾ ਵਰਗੇ ਇਤਿਹਾਸਕ ਪਾਤਰਾਂ ਦੀਆਂ ਲਿਖਤਾਂ ਦਾ ਉਦਾਹਰਣ ਦਿੰਦਿਆਂ ਦੱਸਿਆ ਕਿ ਇਨ੍ਹਾਂ ਸਾਰਿਆਂ ਨੇ ਆਪਣੀਆਂ ਪੁਸਤਕਾਂ ਵਿੱਚ ਇਸ ਦੇਸ਼ ਨੂੰ ਭਾਰਤ ਜਾਂ ਹਿੰਦੁਸਤਾਨ ਵਜੋਂ ਹੀ ਸੰਬੋਧਿਤ ਕੀਤਾ ਹੈ। ਉਨ੍ਹਾਂ ਸੰਘ ਦੀ 100 ਸਾਲਾਂ ਦੀ ਯਾਤਰਾ ਅਤੇ ਨੌਜਵਾਨਾਂ ਤੋਂ ਸੰਘ ਦੀਆਂ ਉਮੀਦਾਂ ਬਾਰੇ ਵੀ ਵਿਚਾਰ ਰੱਖੇ। ਉਨ੍ਹਾਂ ਕਿਹਾ ਕਿ ਕੋਈ ਦੇਸ਼ ਸਿਰਫ ਕੁਝ ਮਹਾਨ ਲੋਕਾਂ ਨਾਲ ਨਹੀਂ, ਸਗੋਂ ਸਮਾਜ ਦੇ ਮਹਾਨ ਬਣਨ ਨਾਲ ਹੀ ਮਹਾਨ ਬਣਦਾ ਹੈ।

ਅਰੁਣ ਕੁਮਾਰ ਨੇ ਜ਼ੋਰ ਦੇ ਕੇ ਕਿਹਾ ਕਿ ਸੰਘ ਦਾ ਮੁੱਖ ਕਾਰਜ 'ਵਿਅਕਤੀ ਨਿਰਮਾਣ' ਹੈ, ਜਿਸ ਰਾਹੀਂ 'ਰਾਸ਼ਟਰ ਸਰਵਉੱਚ' ਦੀ ਭਾਵਨਾ ਪੈਦਾ ਕੀਤੀ ਜਾਂਦੀ ਹੈ। ਉਨ੍ਹਾਂ ਨੌਜਵਾਨਾਂ ਨੂੰ ਦੇਸ਼ ਨਿਰਮਾਣ ਦੇ ਪਵਿੱਤਰ ਕਾਰਜ ਵਿੱਚ ਜੁੜਨ ਦਾ ਸੱਦਾ ਦਿੱਤਾ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਦੇਸ਼ ਦੀ ਸੇਵਾ ਲਈ ਸਿਰਫ ਸੰਘ ਦੇ ਬੈਨਰ ਹੇਠ ਕੰਮ ਕਰਨਾ ਹੀ ਜ਼ਰੂਰੀ ਨਹੀਂ ਹੈ, ਸਗੋਂ ਕਿਸੇ ਵੀ ਨਿਰਸਵਾਰਥ ਸੰਸਥਾ ਨਾਲ ਜੁੜ ਕੇ ਕੀਤਾ ਗਿਆ ਸਮਾਜ ਭਲਾਈ ਦਾ ਕੰਮ ਵੀ ਸੰਘ ਦੇ ਕਾਰਜ ਵਾਂਗ ਹੀ ਪਵਿੱਤਰ ਹੈ। ਇਸ ਮੌਕੇ ਮੰਚ 'ਤੇ ਪੰਜਾਬ ਪ੍ਰਾਂਤ ਦੇ ਸਹਿ ਸੰਘਚਾਲਕ ਡਾ. ਕਰੁਣੇਸ਼ ਗੁਪਤਾ ਅਤੇ ਮਹਾਨਗਰ ਸੰਘਚਾਲਕ ਪ੍ਰਵੀਨ ਮਹਿਰਾ ਵੀ ਮੌਜੂਦ ਸਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e