ਪਹਿਲਵਾਨਾਂ ਨੇ ਰਾਸ਼ਟਰਮੰਡਲ ਖੇਡਾਂ ''ਚ ਦਿੱਤਾ ਤਗਮੇ ਦਾ ਭਰੋਸਾ

ਨਵੀਂ ਦਿੱਲੀ, (ਬਿਊਰੋ)— ਭਾਰਤੀ ਮਹਿਲਾ ਪਹਿਲਵਾਨਾਂ ਨੇ ਪ੍ਰੋ ਕੁਸ਼ਤੀ ਲੀਗ (ਪੀ.ਡਬਲਿਊ.ਐੱਲ)  ਅਤੇ ਏਸ਼ੀਆਈ ਚੈਂਪੀਅਨਸ਼ਿਪ ਤੋਂ ਮਿਲੇ ਬੇਹੱਦ ਤਜਰਬੇ ਦੀ ਬਦੌਲਤ ਅਗਲੀਆਂ ਰਾਸ਼ਟਰਮੰਡਲ ਖੇਡਾਂ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਦਾ ਭਰੋਸਾ ਜਤਾਇਆ ਹੈ । ਭਾਰਤੀ ਮਹਿਲਾ ਟੀਮ ਦੀ ਕੋਚ ਅਲਕਾ ਤੋਮਰ  ਨੇ ਕਿਹਾ ਕਿ ਸਾਰੇ ਖਿਡਾਰੀ ਇਨ੍ਹਾਂ ਖੇਡਾਂ ਲਈ ਪੂਰੀ ਤਰ੍ਹਾਂ ਨਾਲ ਤਿਆਰ ਹਨ । ਸੱਚ ਤਾਂ ਇਹ ਹੈ ਕਿ ਹਾਲ ਵਿੱਚ ਪੀ.ਡਬਲਿਊ.ਐੱਲ. ਨੇ ਖਿਡਾਰੀਆਂ ਦੇ ਮਨ ਤੋਂ ਦਿੱਗਜ ਅੰਤਰਰਾਸ਼ਟਰੀ ਪਹਿਲਵਾਨਾਂ ਦਾ ਸਾਹਮਣਾ ਕਰਨ ਦਾ ਡਰ ਦੂਰ ਕਰ ਦਿੱਤਾ ਹੈ । ਪੂਜਾ ਢਾਂਡਾ ਦੀ ਲੀਗ ਵਿੱਚ ਰਿਕਾਰਡ ਤੋੜ ਕਾਮਯਾਬੀ ਨਾਲ ਹੋਰ ਭਾਰਤੀ ਮਹਿਲਾ ਪਹਿਲਵਾਨਾਂ ਦਾ ਵੀ ‍ਆਤਮਵਿਸ਼ਵਾਸ ਵਧਿਆ ਹੈ । ਸ਼ਾਇਦ ਇਹੀ ਵਜ੍ਹਾ ਹੈ ਕਿ ਏਸ਼ੀਆਈ ਚੈਂਪੀਅਨਸ਼ਿਪ ਵਿੱਚ ਪਿਛਲੇ ਦਿਨਾਂ 'ਚ ਭਾਰਤੀ ਮਹਿਲਾ ਪਹਿਲਵਾਨ ਜਾਪਾਨ ਦੀਆਂ ਦਿੱਗਜਾਂ ਨੂੰ ਹਰਾਉਣ ਵਿੱਚ ਸਫਲ ਰਹੀਆਂ । ਵਿਸ਼ਵ ਕੁਸ਼ਤੀ ਚੈਂਪੀਅਨਸ਼ਿਪ ਵਿੱਚ ਤਗਮਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਅਲਕਾ ਤੋਮਰ ਨੇ ਕਿਹਾ ਕਿ ਦਿੱਗਜ ਪਹਿਲਵਾਨਾਂ  ਦੇ ਨਾਲ ਅਭਿਆਸ ਕਰਨ, ਉਨ੍ਹਾਂ ਦੀ ਤਕਨੀਕ ਨੂੰ ਜਾਨਣ ਅਤੇ ਉਨ੍ਹਾਂ ਦਾ ਸਾਹਮਣਾ ਕਰਨ ਦੇ ਮੌਕੇ ਮਿਲਣਾ ਅੰਤਰਰਾਸ਼ਟਰੀ ਮੁਕਾਬਲਿਆਂ ਦੀ ਤਿਆਰੀ ਲਈ ਬਹੁਤ ਜਰੂਰੀ ਹਨ । ਇਹ ਤਿੰਨੇ ਚੀਜ਼ਾਂ ਪੀ.ਡਬਲਿਊ.ਐੱਲ ਨਾਲ ਸੰਭਵ ਹੋ ਸਕੀਆਂ ।

ਪਿਛਲੇ ਦਿਨਾਂ 'ਚ ਏਸ਼ੀਆਈ ਚੈਂਪੀਅਨਸ਼ਿਪ ਵਿੱਚ ਸੋਨ ਤਗਮਾ ਜਿੱਤਣ ਵਾਲੀ ਨਵਜੋਤ ਕੌਰ ਨੇ ਕਿਹਾ ਬੇਸ਼ੱਕ ਮੈਨੂੰ ਪੀ.ਡਬਲਿਊ.ਐੱਲ ਸੀਕਾਨ ਦੋ ਅਤੇ ਤਿੰਨ ਵਿੱਚ ਲੜਨ ਦਾ ਮੌਕਾ ਨਹੀਂ ਮਿਲਿਆ ਪਰ ਇਸ ਵਿੱਚ ਲੜਨ ਵਾਲੇ ਪਹਿਲਵਾਨਾਂ ਦੀਆਂ ਕੁਸ਼ਤੀਆਂ ਨੂੰ ਟੀ.ਵੀ. ਉੱਤੇ ਕਰੀਬ ਨਾਲ ਦੇਖਣ ਅਤੇ ਉਸ ਤੋਂ ਸਿੱਖਣ ਦਾ ਮੌਕਾ ਮੈਨੂੰ ਜ਼ਰੂਰ ਮਿਲਿਆ । ਏਸ਼ੀਆਈ ਚੈਂਪੀਅਨਸ਼ਿਪ ਵਿੱਚ ਇਹ ਅਨੁਭਵ ਅਤੇ ਕੋਚਾਂ ਦੀ ਸਲਾਹ ਮੇਰੇ ਬਹੁਤ ਕੰਮ ਆਈ । ਦੁਨੀਆ ਵਿੱਚ ਦੂਜੇ ਰੈਂਕ ਦੀ ਨਵਜੋਤ ਨੇ ਕਿਹਾ ਸਾਡਾ ਦਿੱਗਜ ਪਹਿਲਵਾਨਾਂ ਨਾਲ ਮੁਕਾਬਲਾ ਕਰਨ ਦਾ ਡਰ ਹੁਣ ਖਤਮ ਹੋ ਗਿਆ ਹੈ । ਸਾਡੇ ਪਹਿਲਵਾਨ ਹੁਣ ਜ਼ਿਆਦਾ ਖੁੱਲ੍ਹਕੇ ਕੁਸ਼ਤੀ ਲੜਨ ਲੱਗੇ ਹਨ । ਨਵਜੋਤ ਰਾਸ਼ਟਰਮੰਡਲ ਖੇਡਾਂ ਲਈ ਭਾਰਤੀ ਟੀਮ ਦਾ ਹਿੱਸਾ ਨਹੀਂ ਹੈ ਪਰ ਉਨ੍ਹਾਂ ਨੇ ਪੂਰੀ ਟੀਮ ਨੂੰ ਸ਼ੁੱਭਕਾਮਨਾਵਾਂ ਦਿੱਤੀਆਂ ਹਨ । ਇਨ੍ਹਾਂ ਦਿਨਾਂ 'ਚ ਭਾਰਤੀ ਮਹਿਲਾ ਪਹਿਲਵਾਨ ਲਖਨਊ ਵਿੱਚ ਲੱਗੇ ਕੋਚਿੰਗ ਕੈਂਪ ਵਿੱਚ ਮੁੜ੍ਹਕਾ ਵਹਾ ਰਹੀਆਂ ਹਨ । ਇਨ੍ਹਾਂ ਖੇਡਾਂ ਵਿੱਚ ਇਸ ਵਾਰ ਵਿਨੇਸ਼ (50 ਕਿਲੋ), ਬਬੀਤਾ (53 ਕਿੱਲੋ), ਪੂਜਾ ਢਾਂਡਾ (57 ਕਿਲੋ), ਸਾਕਸ਼ੀ ਮਲਿਕ (62 ਕਿਲੋ), ਦਿਵਿਆ ਕਾਕਰਾਨ (68 ਕਿਲੋ) ਅਤੇ ਕਿਰਨ (76 ਕਿਲੋ) ਹਿੱਸਾ ਲੈ ਰਹੀਆਂ ਹਨ ਜਦੋਂਕਿ ਪੁਰਸ਼ਾਂ ਵਿੱਚ ਰਾਹੁਲ ਆਵਾਰੇ (57 ਕਿਲੋ), ਬਜਰੰਗ ਪੂਨੀਆ (65 ਕਿਲੋ), ਸੁਸ਼ੀਲ (74 ਕਿਲੋ), ਸੋਮਵੀਰ (86 ਕਿਲੋ), ਮੌਸਮ ਖਤਰੀ (97 ਕਿਲੋ) ਅਤੇ ਸੁਮਿਤ (125 ਕਿਲੋ) ਚੁਣੌਤੀ ਰੱਖਣਗੇ ।