WPL 2027 ਦੀਆਂ ਤਾਰੀਖਾਂ ਦਾ ਐਲਾਨ; 14 ਜਨਵਰੀ ਨੂੰ ਹੋਵੇਗਾ ਸ਼ੁਰੂ, 35 ਦਿਨ ਚੱਲੇਗਾ ਟੂਰਨਾਮੈਂਟ

ਸਪੋਰਟਸ ਡੈਸਕ : ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ ਵੂਮੈਨ ਪ੍ਰੀਮੀਅਰ ਲੀਗ (WPL) ਦੇ ਨਵੇਂ ਸੀਜ਼ਨ ਦੀਆਂ ਤਾਰੀਖ਼ਾਂ ਦਾ ਐਲਾਨ ਕਰ ਦਿੱਤਾ ਹੈ। ਲੀਗ ਦਾ ਪੰਜਵਾਂ ਸੀਜ਼ਨ 14 ਜਨਵਰੀ 2027 ਤੋਂ ਸ਼ੁਰੂ ਹੋ ਕੇ 7 ਫਰਵਰੀ 2027 ਤੱਕ ਖੇਡਿਆ ਜਾਵੇਗਾ। ਇਹ ਪਹਿਲਾ ਮੌਕਾ ਹੈ ਜਦੋਂ ਇਸ ਟੂਰਨਾਮੈਂਟ ਦਾ ਆਯੋਜਨ ਫਰਵਰੀ-ਮਾਰਚ ਦੀ ਬਜਾਏ ਸਾਲ ਦੇ ਪਹਿਲੇ ਮਹੀਨੇ ਜਨਵਰੀ ਵਿੱਚ ਹੀ ਸ਼ੁਰੂ ਹੋਵੇਗਾ।

ਬੋਰਡ ਅਨੁਸਾਰ WPL 2027 ਲਈ ਇੱਕ ਦਿਨਾਂ 'ਮਿਨੀ ਆਕਸ਼ਨ' 28 ਅਕਤੂਬਰ 2026 ਨੂੰ ਆਯੋਜਿਤ ਕੀਤਾ ਜਾਵੇਗਾ। ਇਸ ਨਿਲਾਮੀ ਲਈ ਪਹਿਲੀ ਵਾਰ ਕੇਰਲ ਦੇ ਸ਼ਹਿਰ ਕੋਚੀ ਦੇ 'ਗ੍ਰੈਂਡ ਹਯਾਤ' ਹੋਟਲ ਨੂੰ ਚੁਣਿਆ ਗਿਆ ਹੈ, ਜਿੱਥੇ ਖਿਡਾਰੀਆਂ 'ਤੇ ਬੋਲੀ ਲੱਗੇਗੀ। ਇਸ ਤੋਂ ਠੀਕ ਇੱਕ ਮਹੀਨਾ ਪਹਿਲਾਂ, ਸਾਰੀਆਂ 5 ਫ੍ਰੈਂਚਾਇਜ਼ੀਆਂ ਲਈ ਆਪਣੇ ਰਿਟੇਨ ਕੀਤੇ ਖਿਡਾਰੀਆਂ ਦੇ ਸਕੁਐਡ ਦਾ ਐਲਾਨ ਕਰਨ ਲਈ 28 ਸਤੰਬਰ 2026 ਦੀ ਆਖਰੀ ਮਿਤੀ (ਡੈੱਡਲਾਈਨ) ਤੈਅ ਕੀਤੀ ਗਈ ਹੈ।

ਟੂਰਨਾਮੈਂਟ ਵਿੱਚ ਟੀਮਾਂ ਦੀ ਗਿਣਤੀ ਵਿੱਚ ਫਿਲਹਾਲ ਕੋਈ ਬਦਲਾਅ ਨਹੀਂ ਕੀਤਾ ਗਿਆ ਹੈ ਅਤੇ 5 ਟੀਮਾਂ ਹੀ ਹਿੱਸਾ ਲੈਣਗੀਆਂ। ਹਾਲਾਂਕਿ, ਮੈਚ ਕਿਹੜੇ ਵੇਨਿਊ 'ਤੇ ਖੇਡੇ ਜਾਣਗੇ, ਇਸ ਬਾਰੇ ਅਜੇ ਅੰਤਿਮ ਫੈਸਲਾ ਨਹੀਂ ਹੋਇਆ ਹੈ। ਰਿਪੋਰਟਾਂ ਅਨੁਸਾਰ ਇਸ ਸੀਜ਼ਨ ਲਈ ਮੁੰਬਈ, ਵਡੋਦਰਾ ਅਤੇ ਵਾਰਾਣਸੀ ਦੇ ਨਵੇਂ ਬਣੇ ਸਟੇਡੀਅਮ ਨੂੰ ਸ਼ਾਰਟਲਿਸਟ ਕੀਤਾ ਗਿਆ ਹੈ।