ICC ਵਨਡੇ ਵਿਸ਼ਵ ਕੱਪ 2027 ਦਾ ਪੂਰਾ ਸ਼ਡਿਊਲ ਜਾਰੀ: ਦੇਖੋ ਕਦੋਂ ਹੋਵੇਗਾ ਭਾਰਤ-ਪਾਕਿ ਦਾ ਮਹਾਮੁਕਾਬਲਾ

ਨਵੀਂ ਦਿੱਲੀ : ਅੰਤਰਰਾਸ਼ਟਰੀ ਕ੍ਰਿਕਟ ਪਰਿਸ਼ਦ (ICC) ਨੇ 2027 ਪੁਰਸ਼ ਵਨਡੇ ਵਿਸ਼ਵ ਕੱਪ ਦਾ ਪੂਰਾ ਪ੍ਰੋਗਰਾਮ ਜਾਰੀ ਕਰ ਦਿੱਤਾ ਹੈ। ਇਸ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਦੱਖਣੀ ਅਫ਼ਰੀਕਾ, ਜ਼ਿੰਬਾਬਵੇ ਅਤੇ ਨਾਮੀਬੀਆ ਮਿਲ ਕੇ ਕਰਨਗੇ। 14 ਟੀਮਾਂ ਦੇ ਇਸ ਟੂਰਨਾਮੈਂਟ ਵਿੱਚ ਭਾਰਤੀ ਟੀਮ ਆਪਣੀ ਮੁਹਿੰਮ ਦੀ ਸ਼ੁਰੂਆਤ 7 ਅਕਤੂਬਰ ਨੂੰ ਕੇਪਟਾਊਨ ਵਿਖੇ ਆਸਟ੍ਰੇਲੀਆ ਖ਼ਿਲਾਫ਼ ਮੈਚ ਨਾਲ ਕਰੇਗੀ।

ਟੂਰਨਾਮੈਂਟ ਦਾ ਸਭ ਤੋਂ ਚਰਚਿਤ ਅਤੇ ਵੱਡਾ ਮੁਕਾਬਲਾ 10 ਅਕਤੂਬਰ ਨੂੰ ਜੋਹਾਨਸਬਰਗ ਵਿੱਚ ਖੇਡਿਆ ਜਾਵੇਗਾ, ਜਿੱਥੇ ਭਾਰਤ ਅਤੇ ਪਾਕਿਸਤਾਨ ਦੀਆਂ ਟੀਮਾਂ ਆਹਮੋ-ਸਾਹਮਣੇ ਹੋਣਗੀਆਂ। ਦੋਵੇਂ ਟੀਮਾਂ ਨੂੰ ਇੱਕੋ ਗਰੁੱਪ ਵਿੱਚ ਰੱਖਿਆ ਗਿਆ ਹੈ। 

ਗਰੁੱਪਾਂ ਦੀ ਵੰਡ:
 ਗਰੁੱਪ ਏ: ਭਾਰਤ, ਆਸਟ੍ਰੇਲੀਆ, ਅਫ਼ਗਾਨਿਸਤਾਨ, ਪਾਕਿਸਤਾਨ, ਜ਼ਿੰਬਾਬਵੇ ਅਤੇ ਇੱਕ ਕੁਆਲੀਫਾਇਰ ਟੀਮ।
 ਗਰੁੱਪ ਬੀ: ਦੱਖਣੀ ਅਫ਼ਰੀਕਾ, ਇੰਗਲੈਂਡ, ਨਿਊਜ਼ੀਲੈਂਡ, ਬੰਗਲਾਦੇਸ਼, ਸ਼੍ਰੀਲੰਕਾ ਅਤੇ ਦੂਜੀ ਕੁਆਲੀਫਾਇਰ ਟੀਮ।

ਭਾਰਤ ਦੇ ਗਰੁੱਪ ਸਟੇਜ ਦੇ ਮੁਕਾਬਲੇ:  
ਭਾਰਤੀ ਟੀਮ ਗਰੁੱਪ ਸਟੇਜ ਵਿੱਚ ਕੁੱਲ 5 ਮੈਚ ਖੇਡੇਗੀ:
 7 ਅਕਤੂਬਰ: ਬਨਾਮ ਆਸਟ੍ਰੇਲੀਆ (ਕੇਪਟਾਊਨ)
 10 ਅਕਤੂਬਰ: ਬਨਾਮ ਪਾਕਿਸਤਾਨ (ਜੋਹਾਨਸਬਰਗ)
 14 ਅਕਤੂਬਰ: ਬਨਾਮ ਅਫ਼ਗਾਨਿਸਤਾਨ (ਤਸ਼ਵਾਨੇ)
 17 ਅਕਤੂਬਰ: ਬਨਾਮ ਕੁਆਲੀਫਾਇਰ ਏ (ਬਲੋਮਫੋਂਟੇਨ)
 24 ਅਕਤੂਬਰ: ਬਨਾਮ ਜ਼ਿੰਬਾਬਵੇ (ਵਿਕਟੋਰੀਆ ਫਾਲਸ)

ਸੁਪਰ 7 ਅਤੇ ਨਾਕਆਊਟ ਮੈਚਾਂ ਦਾ ਸ਼ਡਿਊਲ:  
ਗਰੁੱਪ ਸਟੇਜ ਤੋਂ ਬਾਅਦ ਦੋਵਾਂ ਗਰੁੱਪਾਂ ਦੀਆਂ ਚੋਟੀ ਦੀਆਂ 3-3 ਟੀਮਾਂ ਅਤੇ ਚੌਥੇ ਸਥਾਨ 'ਤੇ ਰਹਿਣ ਵਾਲੀਆਂ ਟੀਮਾਂ ਵਿੱਚੋਂ ਵੱਧ ਅੰਕਾਂ ਵਾਲੀ ਟੀਮ ਸੁਪਰ 7 ਸਟੇਜ ਵਿੱਚ ਪਹੁੰਚੇਗੀ। ਸੁਪਰ 7 ਸਟੇਜ 25 ਅਕਤੂਬਰ ਤੋਂ 14 ਨਵੰਬਰ ਤੱਕ ਚੱਲੇਗਾ। ਇਸ ਤੋਂ ਬਾਅਦ ਚੋਟੀ ਦੀਆਂ ਚਾਰ ਟੀਮਾਂ ਸੈਮੀਫਾਈਨਲ ਵਿੱਚ ਜਗ੍ਹਾ ਬਣਾਉਣਗੀਆਂ।
 ਪਹਿਲਾ ਸੈਮੀਫਾਈਨਲ: 17 ਨਵੰਬਰ (ਕੇਪਟਾਊਨ)
 ਦੂਜਾ ਸੈਮੀਫਾਈਨਲ: 18 ਨਵੰਬਰ (ਤਸ਼ਵਾਨੇ)
 ਫਾਈਨਲ: 21 ਨਵੰਬਰ (ਜੋਹਾਨਸਬਰਗ) (ਖਰਾਬ ਮੌਸਮ ਲਈ 22 ਨਵੰਬਰ ਨੂੰ ਰਿਜ਼ਰਵ ਡੇਅ ਰੱਖਿਆ ਗਿਆ ਹੈ)।

ਆਈ.ਸੀ.ਸੀ. ਦੇ ਚੇਅਰਮੈਨ ਜੈ ਸ਼ਾਹ ਨੇ ਸ਼ਡਿਊਲ ਜਾਰੀ ਕਰਨ ਦੇ ਨਾਲ ਹੀ ਪ੍ਰਸ਼ੰਸਕਾਂ ਲਈ ਟਿਕਟਾਂ ਦੀ ਬੁਕਿੰਗ ਪ੍ਰਕਿਰਿਆ ਸ਼ੁਰੂ ਕਰਨ ਦਾ ਵੀ ਐਲਾਨ ਕੀਤਾ ਹੈ।