ਸ਼ੌਹਰਤ ਤੇ ਕਪਤਾਨੀ ਮਿਲਣ ਨਾਲ ਬਹੁਤ ਬਦਲ ਗਏ ਵਿਰਾਟ ਕੋਹਲੀ : ਅਮਿਤ ਮਿਸ਼ਰਾ

ਸਪੋਰਟਸ ਡੈਸਕ— ਭਾਰਤ ਦੇ ਤਜਰਬੇਕਾਰ ਸਪਿਨਰ ਅਮਿਤ ਮਿਸ਼ਰਾ ਨੇ ਇਕ ਇੰਟਰਵਿਊ 'ਚ ਵਿਰਾਟ ਕੋਹਲੀ ਨੂੰ ਲੈ ਕੇ ਹੈਰਾਨੀਜਨਕ ਖੁਲਾਸੇ ਕੀਤੇ ਹਨ, ਜੋ ਭਾਰਤੀ ਸਟਾਰ ਦੇ ਪ੍ਰਸ਼ੰਸਕਾਂ ਨੂੰ ਚੰਗੇ ਨਹੀਂ ਲੱਗਣਗੇ। ਮਿਸ਼ਰਾ ਦਾ ਕਹਿਣਾ ਹੈ ਕਿ ਸ਼ੌਹਰਤ, ਤਾਕਤ ਅਤੇ ਕਪਤਾਨੀ ਹਾਸਲ ਕਰਨ ਤੋਂ ਬਾਅਦ ਸਾਬਕਾ ਭਾਰਤੀ ਕਪਤਾਨ ਦੇ ਵਿਵਹਾਰ 'ਚ ਕਾਫੀ ਬਦਲਾਅ ਆਇਆ ਹੈ। 2015 ਤੋਂ 2017 ਦਰਮਿਆਨ ਕੋਹਲੀ ਦੀ ਅਗਵਾਈ 'ਚ ਖੇਡਣ ਵਾਲੇ ਮਿਸ਼ਰਾ ਨੇ ਕੋਹਲੀ ਅਤੇ ਮੌਜੂਦਾ ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ ਵਿਚਾਲੇ ਫਰਕ ਬਾਰੇ ਗੱਲ ਕੀਤੀ ਸੀ। ਮਿਸ਼ਰਾ ਨੇ ਕਿਹਾ ਕਿ ਵਿਰਾਟ ਕੋਹਲੀ ਸ਼ੌਹਰਤ, ਤਾਕਤ ਅਤੇ ਕਪਤਾਨੀ ਹਾਸਲ ਕਰਨ ਤੋਂ ਬਾਅਦ ਕਾਫੀ ਬਦਲ ਗਏ ਹਨ। ਜਦੋਂ ਤੁਸੀਂ ਤਾਕਤਵਰ ਹੋ ਜਾਂਦੇ ਹੋ ਤਾਂ ਤੁਸੀਂ ਸੋਚਣਾ ਸ਼ੁਰੂ ਕਰ ਦਿੰਦੇ ਹੋ ਕਿ ਹਰ ਕੋਈ ਸੁਆਰਥੀ ਕਾਰਨਾਂ ਕਰਕੇ ਤੁਹਾਡੇ ਨਾਲ ਗੱਲ ਕਰਨਾ ਚਾਹੁੰਦਾ ਹੈ। ਪਰ ਮੈਂ ਅਜਿਹਾ ਨਹੀਂ ਹਾਂ। ਵਿਰਾਟ ਅਤੇ ਰੋਹਿਤ ਦਾ ਸੁਭਾਅ ਵੱਖ-ਵੱਖ ਹੈ।
ਅਮਿਤ ਮਿਸ਼ਰਾ ਨੇ ਰੋਹਿਤ ਸ਼ਰਮਾ ਨਾਲ ਆਪਣੇ ਲੰਬੇ ਸਮੇਂ ਦੇ ਸਬੰਧਾਂ ਬਾਰੇ ਵਿਸਥਾਰ ਨਾਲ ਦੱਸਿਆ ਅਤੇ ਇਸ ਨੂੰ ਖੁਸ਼ੀ ਭਰਿਆ ਅਤੇ ਦੋਸਤਾਨਾ ਦੱਸਿਆ, ਜੋ ਕਿ ਰੋਹਿਤ ਦੇ ਕ੍ਰਿਕਟ ਵਿੱਚ ਸ਼ੁਰੂਆਤੀ ਦਿਨਾਂ ਦੀ ਯਾਦ ਦਿਵਾਉਂਦਾ ਹੈ। ਮਿਸ਼ਰਾ ਨੇ ਕਿਹਾ ਕਿ ਮੈਂ ਤੁਹਾਨੂੰ ਰੋਹਿਤ ਬਾਰੇ ਸਭ ਤੋਂ ਚੰਗੀ ਗੱਲ ਦੱਸਾਂਗਾ। ਜਦੋਂ ਮੈਂ ਉਨ੍ਹਾਂ ਨੂੰ ਪਹਿਲੇ ਦਿਨ ਮਿਲਿਆ ਸੀ ਅਤੇ ਅੱਜ ਜਦੋਂ ਮੈਂ ਉਨ੍ਹਾਂ ਨੂੰ ਮਿਲਿਆ ਹਾਂ, ਤਾਂ ਉਹ ਉਹੀ ਵਿਅਕਤੀ ਹੈ। ਤਾਂ, ਕੀ ਤੁਸੀਂ ਉਸ ਨਾਲ ਜ਼ਿਆਦਾ ਸਬੰਧ ਰੱਖੋਗੇ ਜਾਂ ਕਿਸੇ ਅਜਿਹੇ ਵਿਅਕਤੀ ਨਾਲ ਜੋ ਸਥਿਤੀ ਦੇ ਅਨੁਸਾਰ ਬਦਲਦਾ ਹੈ?
ਤਜਰਬੇਕਾਰ ਸਪਿਨਰ ਨੇ ਕਿਹਾ ਕਿ ਕਪਤਾਨੀ ਸੰਭਾਲਣ ਤੋਂ ਬਾਅਦ ਵਿਰਾਟ ਕੋਹਲੀ ਦੇ ਵਿਵਹਾਰ 'ਚ ਆਏ ਬਦਲਾਅ ਕਾਰਨ ਭਾਰਤੀ ਟੀਮ 'ਚ ਉਨ੍ਹਾਂ ਦੇ ਦੋਸਤ ਘੱਟ ਰਹਿ ਗਏ ਹਨ। ਕੋਹਲੀ ਦੀ ਇਹ ਧਾਰਨਾ ਕਿ ਦੂਸਰੇ ਲੋਕ ਉਨ੍ਹਾਂ ਦੇ ਨਾਲ ਸੁਆਰਥੀ ਉਦੇਸ਼ਾਂ ਲਈ ਗੱਲਬਾਤ ਕਰਦੇ ਹਨ, ਨੇ ਇੱਕ ਰੁਕਾਵਟ ਪੈਦਾ ਕੀਤੀ ਹੈ, ਜਿਸ ਨਾਲ ਉਹ ਆਪਣੇ ਕਈ ਸਾਰੇ ਸਾਥੀਆਂ ਤੋਂ ਦੂਰ ਹੋ ਗਏ ਹਨ। ਇਸ ਤੋਂ ਪਹਿਲਾਂ ਭਾਰਤ ਦੇ ਸਾਬਕਾ ਕ੍ਰਿਕਟਰ ਯੁਵਰਾਜ ਸਿੰਘ ਨੇ ਵੀ ਕਿਹਾ ਸੀ ਕਿ ਉਨ੍ਹਾਂ ਦਾ ਵਿਰਾਟ ਕੋਹਲੀ ਨਾਲ ਉਹੋ ਜਿਹਾ ਰਿਸ਼ਤਾ ਨਹੀਂ ਹੈ ਜਿਵੇਂ ਕਿ ਕੋਹਲੀ ਦੇ ਸੁਪਰਸਟਾਰ ਬਣਨ ਤੋਂ ਪਹਿਲਾਂ ਸੀ।