ਕੈਂਚੀ ਧਾਮ ਪਹੁੰਚੇ ਵਿਰਾਟ ਅਤੇ ਅਨੁਸ਼ਕਾ, ਨੀਮ ਕਰੌਲੀ ਮਹਾਰਾਜ ਦੇ ਕੀਤੇ ਦਰਸ਼ਨ

ਨੈਨੀਤਾਲ (ਵਾਰਤਾ)- ਭਾਰਤੀ ਟੀਮ ਦੇ ਸਾਬਕਾ ਕਪਤਾਨ ਅਤੇ ਦਿੱਗਜ ਖਿਡਾਰੀ ਵਿਰਾਟ ਕੋਹਲੀ ਨੇ ਪਤਨੀ ਅਤੇ ਅਦਾਕਾਰਾ ਅਨੁਸ਼ਕਾ ਸ਼ਰਮਾ ਅਤੇ ਧੀ ਨਾਲ ਵੀਰਵਾਰ ਨੂੰ ਨੈਨੀਤਾਲ ਦੇ ਮਸ਼ਹੂਰ ਕੈਂਚੀ ਧਾਮ ਦੇ ਦਰਸ਼ਨ ਕੀਤੇ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਵਿਰਾਟ ਕੋਹਲੀ ਅੱਜ ਸਵੇਰੇ ਸਿੱਧਾ ਕੈਂਚੀ ਧਾਮ ਪੁੱਜੇ ਅਤੇ ਤਿੰਨਾਂ ਨੇ ਨੀਮ ਕਰੌਲੀ ਮਹਾਰਾਜ ਦੇ ਦਰਸ਼ਨ ਕੀਤੇ। ਉਨ੍ਹਾਂ ਨੇ ਆਰਤੀ ਵਿਚ ਹਿੱਸਾ ਲਿਆ ਅਤੇ ਕੁਝ ਸਮਾਂ ਮੰਦਰ ਵਿੱਚ ਰੁਕੇ।

ਇਸ ਦੌਰਾਨ ਉਨ੍ਹਾਂ ਨੇ ਮੰਦਰ ਦੇ ਪੁਜਾਰੀ ਅਤੇ ਕਰਮਚਾਰੀਆਂ ਨਾਲ ਤਸਵੀਰਾਂ ਵੀ ਖਿਚਵਾਈਆਂ। ਹਾਲਾਂਕਿ, ਉਨ੍ਹਾਂ ਨੇ ਇਸ ਸਮੇਂ ਦੌਰਾਨ ਲੋਕਾਂ ਅਤੇ ਸ਼ਰਧਾਲੂਆਂ ਤੋਂ ਦੂਰੀ ਬਣਾਈ ਰੱਖੀ। ਇਸ ਤੋਂ ਬਾਅਦ ਉਹ ਮੁਕਤੇਸ਼ਵਰ ਲਈ ਰਵਾਨਾ ਹੋ ਗਏ। ਜ਼ਿਕਰਯੋਗ ਹੈ ਕਿ ਕੋਹਲੀ ਆਪਣੇ ਪਰਿਵਾਰ ਸਮੇਤ ਬੁੱਧਵਾਰ ਨੂੰ ਨੈਨੀਤਾਲ ਦੇ ਰਾਮਗੜ੍ਹ-ਮੁਕਤੇਸ਼ਵਰ ਪਹੁੰਚੇ। ਉਹ ਨਿੱਜੀ ਹੈਲੀਕਾਪਟਰ ਰਾਹੀਂ ਸਿੱਧਾ ਘੋੜਾਖਲ ਸੈਨਿਕ ਸਕੂਲ ਵਿੱਚ ਉਤਰੇ ਅਤੇ ਮੁਕਤੇਸ਼ਵਰ ਲਈ ਰਵਾਨਾ ਹੋਏ।

ਇਸ ਦੌਰਾਨ ਉਨ੍ਹਾਂ ਨੇ ਕਿਸੇ ਨਾਲ ਗੱਲ ਨਹੀਂ ਕੀਤੀ। ਇਸ ਮੌਕੇ ਘੋੜਾਖਲ ਸਕੂਲ ਦੇ ਵਿਦਿਆਰਥੀ ਵੀ ਉਨ੍ਹਾਂ ਦੀ ਅਗਵਾਈ ਕਰਨ ਲਈ ਖੜ੍ਹੇ ਰਹੇ। ਉਨ੍ਹਾਂ ਨੇ ਤਾੜੀਆਂ ਵਜਾ ਕੇ ਵਿਰਾਟ ਅਤੇ ਅਨੁਸ਼ਕਾ ਦਾ ਸਵਾਗਤ ਕੀਤਾ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਮੁਕਤੇਸ਼ਵਰ 'ਚ ਆਪਣੇ ਖਾਸ ਦੋਸਤ ਦੇ ਘਰ ਰੁਕੇ ਹਨ। ਦੋਵੇਂ ਇੱਥੋਂ ਦੀਆਂ ਸ਼ਾਂਤ ਵਾਦੀਆਂ 'ਚ ਕੁਝ ਦਿਨ ਬਿਤਾਉਣਾ ਚਾਹੁੰਦੇ ਹਨ।