ਸ਼ੁਰੂ ਹੋਣ ਜਾ ਰਹੀ ਹੈ ਨਵੀਂ ਪੰਜਾਬ ਪ੍ਰੀਮੀਅਰ ਲੀਗ, ਦਿਸੇਗਾ ਸ਼ੁਭਮਨ-ਅਰਸ਼ਦੀਪ-ਅਭਿਸ਼ੇਕ ਦਾ ਜਲਵਾ

ਚੰਡੀਗੜ੍ਹ : ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ (PCA) ਵੱਲੋਂ ਜੂਨ 2026 ਵਿੱਚ ਇੱਕ ਨਵੀਂ ਪਛਾਣ ਅਤੇ ਨਵੇਂ ਫਾਰਮੈਟ ਦੇ ਨਾਲ ਪੰਜਾਬ ਪ੍ਰੀਮੀਅਰ ਲੀਗ (PPL) ਦਾ ਆਯੋਜਨ ਕੀਤਾ ਜਾਵੇਗਾ। ਸੂਬੇ ਦੀ ਇਹ ਘਰੇਲੂ ਟੀ-20 ਲੀਗ ਹੁਣ ਫ੍ਰੈਂਚਾਇਜ਼ੀ-ਬੇਸਡ ਮਾਡਲ 'ਤੇ ਖੇਡੀ ਜਾਵੇਗੀ, ਜਿਸ ਵਿੱਚ ਕੁੱਲ ਛੇ ਟੀਮਾਂ ਹਿੱਸਾ ਲੈਣਗੀਆਂ।

ਨਿਲਾਮੀ ਰਾਹੀਂ ਚੁਣੇ ਜਾਣਗੇ ਖਿਡਾਰੀ
ਪੀ.ਪੀ.ਐਲ. 2026 ਵਿੱਚ ਸਾਰੀਆਂ ਛੇ ਟੀਮਾਂ ਫ੍ਰੈਂਚਾਇਜ਼ੀ ਆਧਾਰਿਤ ਹੋਣਗੀਆਂ ਅਤੇ ਖਿਡਾਰੀਆਂ ਦੀ ਚੋਣ ਨਿਲਾਮੀ (Auction) ਰਾਹੀਂ ਕੀਤੀ ਜਾਵੇਗੀ। ਇਸ ਲੀਗ ਵਿੱਚ ਸਿਰਫ਼ ਪੰਜਾਬ ਦੇ ਰਜਿਸਟਰਡ ਖਿਡਾਰੀ ਹੀ ਹਿੱਸਾ ਲੈ ਸਕਣਗੇ। ਖਿਡਾਰੀਆਂ ਨੂੰ ਵੱਖ-ਵੱਖ ਕੀਮਤ ਸਲੈਬਾਂ (Price Slabs) ਵਿੱਚ ਰੱਖਿਆ ਜਾਵੇਗਾ ਤਾਂ ਜੋ ਟੀਮਾਂ ਆਪਣੀ ਰਣਨੀਤੀ ਅਨੁਸਾਰ ਬੋਲੀ ਲਗਾ ਸਕਣ।

ਸ਼ੁਭਮਨ ਗਿੱਲ ਅਤੇ ਅਰਸ਼ਦੀਪ ਸਿੰਘ ਵਰਗੇ ਸਿਤਾਰੇ ਹੋਣਗੇ ਖਿੱਚ ਦਾ ਕੇਂਦਰ 
ਇਸ ਲੀਗ ਵਿੱਚ ਪੰਜਾਬ ਦੇ ਵੱਡੇ ਕ੍ਰਿਕਟ ਸਿਤਾਰੇ ਮੈਦਾਨ ਵਿੱਚ ਉਤਰਨਗੇ। ਮਾਰਕੀ ਖਿਡਾਰੀਆਂ ਵਿੱਚ ਸ਼ੁਭਮਨ ਗਿੱਲ, ਅਭਿਸ਼ੇਕ ਸ਼ਰਮਾ ਅਤੇ ਅਰਸ਼ਦੀਪ ਸਿੰਘ ਦੇ ਨਾਮ ਪ੍ਰਮੁੱਖ ਹਨ। ਇਨ੍ਹਾਂ ਤੋਂ ਇਲਾਵਾ ਰਮਨਦੀਪ ਸਿੰਘ, ਨੇਹਾਲ ਵਢੇਰਾ, ਨਮਨ ਧੀਰ, ਅਨਮੋਲਪ੍ਰੀਤ ਸਿੰਘ ਅਤੇ ਪ੍ਰਭਸਿਮਰਨ ਸਿੰਘ ਵਰਗੇ ਤਜਰਬੇਕਾਰ ਖਿਡਾਰੀ ਵੀ ਮਾਰਕੀ ਨਾਵਾਂ ਵਿੱਚ ਸ਼ਾਮਲ ਹੋ ਸਕਦੇ ਹਨ।

ਨੌਜਵਾਨਾਂ ਅਤੇ ਅੰਡਰ-23 ਪ੍ਰਤਿਭਾਵਾਂ ਨੂੰ ਮਿਲੇਗਾ ਵੱਡਾ ਮੰਚ 
ਪੀ.ਪੀ.ਐਲ. 2026 ਵਿੱਚ ਸੀਨੀਅਰ ਖਿਡਾਰੀਆਂ ਦੇ ਨਾਲ-ਨਾਲ ਅੰਡਰ-23 ਅਤੇ ਹੋਰ ਨੌਜਵਾਨ ਪ੍ਰਤਿਭਾਵਾਂ ਨੂੰ ਵੀ ਆਪਣਾ ਹੁਨਰ ਦਿਖਾਉਣ ਦਾ ਮੌਕਾ ਮਿਲੇਗਾ। ਮੌਜੂਦਾ ਭਾਰਤੀ ਅੰਡਰ-19 ਟੀਮ ਦਾ ਹਿੱਸਾ ਵਿਹਾਨ ਮਲਹੋਤਰਾ ਵੀ ਇਸ ਲੀਗ ਵਿੱਚ ਖੇਡਦੇ ਨਜ਼ਰ ਆਉਣਗੇ। ਇਸ ਤੋਂ ਇਲਾਵਾ ਮਯੰਕ ਮਾਰਕੰਡੇ, ਹਰਪ੍ਰੀਤ ਬਰਾੜ, ਗੁਰਨੂਰ ਬਰਾੜ, ਹਰਨੂਰ ਸਿੰਘ, ਸਲਿਲ ਅਰੋੜਾ ਅਤੇ ਰਘੂ ਸ਼ਰਮਾ ਵਰਗੇ ਖਿਡਾਰੀ ਟੂਰਨਾਮੈਂਟ ਦੀ ਗਹਿਰਾਈ ਨੂੰ ਵਧਾਉਣਗੇ।

ਕਾਰਪੋਰੇਟ ਘਰਾਣਿਆਂ ਨੇ ਦਿਖਾਈ ਦਿਲਚਸਪੀ 
ਪੰਜਾਬ ਦੇ ਕਈ ਵੱਡੇ ਕਾਰੋਬਾਰੀ ਘਰਾਣੇ ਅਤੇ ਕਾਰਪੋਰੇਟ ਗਰੁੱਪ ਇਸ ਲੀਗ ਵਿੱਚ ਟੀਮਾਂ ਦਾ ਮਾਲਕੀ ਹੱਕ ਲੈਣ ਲਈ ਕਾਫੀ ਉਤਸੁਕ ਹਨ। ਇਸ ਭਾਰੀ ਦਿਲਚਸਪੀ ਕਾਰਨ ਇਹ ਲੀਗ ਸੂਬੇ ਦੀ ਸਭ ਤੋਂ ਵੱਡੀ ਘਰੇਲੂ ਟੀ-20 ਪ੍ਰਤੀਯੋਗਤਾ ਬਣਨ ਦੀ ਰਾਹ 'ਤੇ ਹੈ।