ਗੇਂਦਬਾਜ਼ ਨੇ ਰਚ''ਤਾ ਇਤਿਹਾਸ, ਹੈਟ੍ਰਿਕ ਨਾਲ ਨਾ ਭਰਿਆ ਮਨ ਤਾਂ ਇਕੱਲੇ ਹੀ ਪੂਰੀ ਟੀਮ ਦਾ ਬਿਸਤਰਾ ਕਰ''ਤਾ ''ਗੋਲ''

ਸਪੋਰਟਸ ਡੈਸਕ - ਕੁਝ ਦਿਨ ਪਹਿਲਾਂ ਹੀ ਰਣਜੀ ਟਰਾਫੀ 'ਚ ਹਰਿਆਣਾ ਦੇ ਤੇਜ਼ ਗੇਂਦਬਾਜ਼ ਅੰਸ਼ੁਲ ਕੰਬੋਜ ਨੇ ਇਕ ਪਾਰੀ 'ਚ 10 ਵਿਕਟਾਂ ਲੈ ਕੇ ਹਲਚਲ ਮਚਾ ਦਿੱਤੀ ਸੀ। ਕੰਬੋਜ ਨੇ ਸਾਬਕਾ ਭਾਰਤੀ ਕਪਤਾਨ ਅਤੇ ਮਹਾਨ ਲੈੱਗ ਸਪਿਨਰ ਅਨਿਲ ਕੁੰਬਲੇ ਦੀ ਯਾਦ ਦਿਵਾ ਦਿੱਤੀ, ਜਿਸ ਨੇ ਪਾਕਿਸਤਾਨ ਦੇ ਖਿਲਾਫ ਇੱਕ ਹੀ ਪਾਰੀ ਵਿੱਚ ਸਾਰੀਆਂ 10 ਵਿਕਟਾਂ ਲਈਆਂ ਸਨ। ਹੁਣ ਇਨ੍ਹਾਂ ਦੋਵਾਂ ਤੋਂ ਅੱਗੇ ਬਿਹਾਰ ਦਾ ਇਕ ਲਾਲ ਨਿਕਲ ਗਿਆ ਹੈ, ਜਿਸ ਨੇ ਇਕੱਲੇ ਹੀ ਪੂਰੀ ਟੀਮ ਨੂੰ ਹਰਾ ਕੇ ਇਤਿਹਾਸ ਰਚ ਦਿੱਤਾ ਹੈ। ਇਸ ਗੇਂਦਬਾਜ਼ ਨੇ ਨਾ ਸਿਰਫ਼ 10 ਵਿਕਟਾਂ ਲਈਆਂ, ਸਗੋਂ ਇਸ ਦੌਰਾਨ ਹੈਟ੍ਰਿਕ ਲੈਣ ਦਾ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਨਾਮ ਸੁਮਨ ਕੁਮਾਰ ਹੈ।

ਬੀ.ਸੀ.ਸੀ.ਆਈ. ਦੇ ਘਰੇਲੂ ਸੈਸ਼ਨ ਵਿੱਚ ਜਿੱਥੇ ਨਜ਼ਰਾਂ ਲਗਾਤਾਰ ਰਣਜੀ ਟਰਾਫੀ ਅਤੇ ਹੁਣ ਜੂਨੀਅਰ ਪੱਧਰ ਦੇ ਸਭ ਤੋਂ ਮਹੱਤਵਪੂਰਨ ਟੂਰਨਾਮੈਂਟ ਸਈਅਦ ਮੁਸ਼ਤਾਕ ਅਲੀ ਟਰਾਫੀ ’ਤੇ ਕੇਂਦਰਿਤ ਹਨ, ਉੱਥੇ ਹੀ ਕੂਚ ਬਿਹਾਰ ਟਰਾਫੀ ਵੀ ਨਾਲੋ-ਨਾਲ ਚੱਲ ਰਹੀ ਹੈ। ਰਣਜੀ ਟਰਾਫੀ ਵਾਂਗ ਇਸ ਅੰਡਰ-19 ਪੱਧਰੀ ਰੈੱਡ ਬਾਲ ਟੂਰਨਾਮੈਂਟ ਵਿੱਚ ਹਰ ਰਾਜ ਸੰਘ ਦੀਆਂ ਟੀਮਾਂ ਹਿੱਸਾ ਲੈਂਦੀਆਂ ਹਨ। ਅਜਿਹਾ ਹੀ ਇੱਕ ਮੈਚ ਰਾਜਸਥਾਨ ਅਤੇ ਬਿਹਾਰ ਵਿਚਾਲੇ ਖੇਡਿਆ ਜਾ ਰਿਹਾ ਹੈ, ਜਿਸ ਦੇ ਤੀਜੇ ਦਿਨ ਤੇਜ਼ ਗੇਂਦਬਾਜ਼ ਸੁਮਨ ਨੇ ਸਾਰੀਆਂ 10 ਵਿਕਟਾਂ ਲੈ ਕੇ ਇਤਿਹਾਸ ਰਚ ਦਿੱਤਾ ਹੈ।

ਪਹਿਲਾਂ ਹੈਟ੍ਰਿਕ ਲਈ, ਫਿਰ ਪੂਰੀ ਟੀਮ ਨੂੰ ਹਰਾਇਆ
ਤੀਜੇ ਦਿਨ ਰਾਜਸਥਾਨ ਨੇ 70 ਦੌੜਾਂ 'ਤੇ 1 ਵਿਕਟ ਦੇ ਨੁਕਸਾਨ ਨਾਲ ਆਪਣੀ ਪਾਰੀ ਦੀ ਸ਼ੁਰੂਆਤ ਕੀਤੀ। ਸੁਮਨ ਨੇ ਦੂਜੇ ਦਿਨ ਹੀ ਪਹਿਲਾ ਵਿਕਟ ਲਿਆ ਸੀ। ਤੀਜੇ ਦਿਨ ਇਸ ਨੌਜਵਾਨ ਤੇਜ਼ ਗੇਂਦਬਾਜ਼ ਨੇ ਵਿਕਟਾਂ ਦੀ ਝੜੀ ਲਾ ਦਿੱਤੀ। ਇਸ ਦੌਰਾਨ ਪਾਰੀ ਦੇ 36ਵੇਂ ਓਵਰ ਵਿੱਚ ਸੁਮਨ ਨੇ ਪੂਰੀ ਤਰ੍ਹਾਂ ਤਬਾਹੀ ਮਚਾਈ। ਉਸ ਨੇ ਓਵਰ ਦੀ ਚੌਥੀ, ਪੰਜਵੀਂ ਅਤੇ ਛੇਵੀਂ ਗੇਂਦ 'ਤੇ ਲਗਾਤਾਰ ਤਿੰਨ ਬੱਲੇਬਾਜ਼ਾਂ ਨੂੰ ਪੈਵੇਲੀਅਨ ਵਾਪਸ ਭੇਜ ਕੇ ਹੈਟ੍ਰਿਕ ਪੂਰੀ ਕੀਤੀ।

ਜੇਕਰ ਇਹ ਪ੍ਰਾਪਤੀ ਕਾਫੀ ਨਹੀਂ ਸੀ ਤਾਂ ਸੁਮਨ ਨੇ ਇਸ ਤੋਂ ਵੀ ਵੱਡਾ ਕਾਰਨਾਮਾ ਕਰਨ ਦਾ ਫੈਸਲਾ ਕੀਤਾ। ਬਿਹਾਰ ਦੇ ਸਮਸਤੀਪੁਰ ਤੋਂ ਆਏ ਇਸ ਗੇਂਦਬਾਜ਼ ਨੇ ਬਾਕੀ ਬੱਲੇਬਾਜਾਂ ਨੂੰ ਤੇਜ਼ੀ ਨਾਲ ਫਸਾਇਆ ਅਤੇ ਉਨ੍ਹਾਂ ਨੂੰ ਪੈਵੇਲੀਅਨ ਦਾ ਰਸਤਾ ਦਿਖਾਇਆ ਅਤੇ ਇਸ ਤਰ੍ਹਾਂ ਰਾਜਸਥਾਨ ਦੀ ਪਾਰੀ ਦੀਆਂ ਸਾਰੀਆਂ 10 ਵਿਕਟਾਂ ਲੈ ਕੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਰਾਜਸਥਾਨ ਦੀ ਪੂਰੀ ਪਾਰੀ ਸਿਰਫ਼ 182 ਦੌੜਾਂ 'ਤੇ ਹੀ ਸਮੇਟ ਗਈ। ਸੁਮਨ ਨੇ ਆਪਣੇ 33.5 ਓਵਰਾਂ ਵਿੱਚ 20 ਮੇਡਨ ਗੇਂਦਬਾਜ਼ੀ ਕੀਤੀ ਅਤੇ ਸਿਰਫ਼ 53 ਦੌੜਾਂ ਦੇ ਕੇ ਸਾਰੀਆਂ 10 ਵਿਕਟਾਂ ਲਈਆਂ।

ਬਿਹਾਰ ਨੂੰ ਮਿਲੀ ਵੱਡੀ ਲੀਡ
ਮੈਚ ਦੀ ਗੱਲ ਕਰੀਏ ਤਾਂ ਬਿਹਾਰ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ ਪਹਿਲੀ ਪਾਰੀ 'ਚ 467 ਦੌੜਾਂ ਦਾ ਵੱਡਾ ਸਕੋਰ ਬਣਾਇਆ। ਉਸ ਲਈ ਦੀਪੇਸ਼ ਗੁਪਤਾ (ਅਜੇਤੂ 183) ਅਤੇ ਪ੍ਰਿਥਵੀ ਰਾਜ (128) ਨੇ ਸ਼ਾਨਦਾਰ ਸੈਂਕੜੇ ਲਗਾਏ। ਬਿਹਾਰ ਨੇ ਪਹਿਲੀ ਪਾਰੀ ਵਿੱਚ 285 ਦੌੜਾਂ ਦੀ ਵੱਡੀ ਲੀਡ ਲੈ ਲਈ ਸੀ। ਫਿਰ ਰਾਜਸਥਾਨ ਨੂੰ ਫਾਲੋਆਨ ਕਰਨ ਲਈ ਮਜਬੂਰ ਹੋਣਾ ਪਿਆ। ਹਾਲਾਂਕਿ ਰਾਜਸਥਾਨ ਨੇ ਦੂਜੀ ਪਾਰੀ 'ਚ ਜ਼ਬਰਦਸਤ ਵਾਪਸੀ ਕੀਤੀ ਅਤੇ ਤੀਜੇ ਦਿਨ ਦੀ ਖੇਡ ਖਤਮ ਹੋਣ ਤੱਕ 2 ਵਿਕਟਾਂ ਗੁਆ ਕੇ 173 ਦੌੜਾਂ ਬਣਾ ਲਈਆਂ ਸਨ। ਹਾਲਾਂਕਿ ਟੀਮ ਅਜੇ ਵੀ 112 ਦੌੜਾਂ ਪਿੱਛੇ ਹੈ।