ਸ਼੍ਰੀਲੰਕਾ ਨੇ ਵੈਸਟਇੰਡੀਜ਼ ਨੂੰ 5 ਵਿਕਟਾਂ ਨਾਲ ਹਰਾਇਆ

ਪੱਲੇਕੇਲੇ : ਸ੍ਰੀਲੰਕਾ ਨੇ ਮੀਂਹ ਕਾਰਨ ਪ੍ਰਭਾਵਿਤ ਵਨਡੇ ਮੈਚ ਵਿੱਚ ਵੈਸਟਇੰਡੀਜ਼ ਨੂੰ ਪੰਜ ਵਿਕਟਾਂ ਨਾਲ ਹਰਾ ਕੇ ਤਿੰਨ ਮੈਚਾਂ ਦੀ ਲੜੀ ਵਿੱਚ 1-0 ਦੀ ਬੜ੍ਹਤ ਬਣਾ ਲਈ ਹੈ। ਐਤਵਾਰ ਦੇਰ ਰਾਤ ਖੇਡੇ ਗਏ ਮੈਚ 'ਚ ਵੈਸਟਇੰਡੀਜ਼ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਬੱਲੇਬਾਜ਼ੀ ਕਰਨ ਆਈ ਵੈਸਟਇੰਡੀਜ਼ ਦੀ ਸ਼ੁਰੂਆਤ ਬੇਹੱਦ ਖ਼ਰਾਬ ਰਹੀ। ਉਸ ਨੇ ਅੱਠਵੇਂ ਓਵਰ ਵਿੱਚ ਬ੍ਰੈਂਡਨ ਕਿੰਗ (14) ਦਾ ਵਿਕਟ ਗੁਆ ਦਿੱਤਾ।

ਵੈਸਟਇੰਡੀਜ਼ ਨੇ 25 ਓਵਰਾਂ ਵਿੱਚ 100 ਦੌੜਾਂ ਦੇ ਸਕੋਰ ਤੱਕ ਚਾਰ ਵਿਕਟਾਂ ਗੁਆ ਦਿੱਤੀਆਂ ਸਨ। ਕੇਸੀ ਕਾਰਟੀ (37), ਐਲੇਕ ਅਥਨੇਜ਼ (10) ਅਤੇ ਸ਼ਾਈ ਹੋਪ (ਪੰਜ) ਦੌੜਾਂ ਬਣਾ ਕੇ ਆਊਟ ਹੋ ਗਏ। ਇਸ ਤੋਂ ਬਾਅਦ ਸ਼ਰਫਾਨ ਰਦਰਫੋਰਡ ਅਤੇ ਰੋਸਟਨ ਚੇਜ਼ ਨੇ ਹੌਲੀ ਰਫਤਾਰ ਨਾਲ ਦੌੜਾਂ ਬਣਾਈਆਂ ਅਤੇ ਵਿਕਟ ਨੂੰ ਡਿੱਗਣ ਨਹੀਂ ਦਿੱਤਾ। ਸ਼ਰਫਾਨ ਰਦਰਫੋਰਡ (ਅਜੇਤੂ 77) ਅਤੇ ਰੋਸਟਨ ਚੇਜ਼ (ਅਜੇਤੂ 33) ਨੇ ਦੌੜਾਂ ਬਣਾਈਆਂ। ਮੀਂਹ ਕਾਰਨ ਓਵਰਾਂ ਦੀ ਗਿਣਤੀ ਘਟਾ ਦਿੱਤੀ ਗਈ। ਵੈਸਟਇੰਡੀਜ਼ ਨੇ 38.3 ਓਵਰਾਂ 'ਚ ਚਾਰ ਵਿਕਟਾਂ 'ਤੇ 185 ਦੌੜਾਂ ਬਣਾਈਆਂ। ਸ਼੍ਰੀਲੰਕਾ ਲਈ ਵਨਿੰਦੂ ਹਸਾਰੰਗਾ ਨੇ ਦੋ ਵਿਕਟਾਂ ਲਈਆਂ।

ਟੀਚੇ ਦਾ ਪਿੱਛਾ ਕਰਨ ਉਤਰੀ ਸ਼੍ਰੀਲੰਕਾ ਦੀ ਸ਼ੁਰੂਆਤ ਵੀ ਬੇਹੱਦ ਖਰਾਬ ਰਹੀ ਅਤੇ ਉਸ ਦੇ ਤਿੰਨ ਬੱਲੇਬਾਜ਼ ਮਹਿਜ਼ 45 ਦੌੜਾਂ ਦੇ ਸਕੋਰ 'ਤੇ ਪੈਵੇਲੀਅਨ ਪਰਤ ਗਏ। ਅਵਿਸ਼ਕਾ ਫਰਨਾਂਡੋ (ਪੰਜ), ਕੁਸਲ ਮੈਂਡਿਸ (13) ਅਤੇ ਸਦਿਰਾ ਸਮਰਾਵਿਕਰਮਾ (18) ਦੌੜਾਂ ਬਣਾ ਕੇ ਆਊਟ ਹੋ ਗਏ। ਇਸ ਤੋਂ ਬਾਅਦ ਸਲਾਮੀ ਬੱਲੇਬਾਜ਼ ਨਿਸ਼ਾਨ ਮਦੁਸ਼ਕਾ ਅਤੇ ਕਪਤਾਨ ਚਰਿਥ ਅਸਾਲੰਕਾ ਨੇ ਮਿਲ ਕੇ ਪਾਰੀ ਨੂੰ ਸੰਭਾਲਿਆ। ਸ੍ਰੀਲੰਕਾ ਦੀ ਟੀਮ ਨੇ ਸਿਰਫ਼ 31.5 ਓਵਰਾਂ ਵਿੱਚ ਪੰਜ ਵਿਕਟਾਂ ਗੁਆ ਕੇ ਟੀਚਾ ਹਾਸਲ ਕਰ ਲਿਆ।

ਚਰਿਥ ਅਸਾਲੰਕਾ ਨੇ ਸਭ ਤੋਂ ਵੱਧ ਦੌੜਾਂ (77) ਦੀ ਆਪਣੀ ਵਿਸਫੋਟਕ ਪਾਰੀ ਵਿੱਚ ਅੱਠ ਚੌਕੇ ਅਤੇ ਤਿੰਨ ਛੱਕੇ ਲਗਾਏ। ਜਦਕਿ ਨਿਸ਼ਾਨ ਮਦੁਸ਼ਕਾ ਨੇ (69) ਦੌੜਾਂ ਬਣਾਈਆਂ। ਜਤਿਨ ਲਿਆਗੇ (18) ਅਤੇ ਕਮਿੰਦੂ ਮੈਂਡਿਸ (30) ਦੌੜਾਂ ਬਣਾ ਕੇ ਨਾਬਾਦ ਰਹੇ। ਵੈਸਟਇੰਡੀਜ਼ ਲਈ ਗੁਦਾਕੇਸ਼ ਮੋਤੀ ਨੇ ਤਿੰਨ ਵਿਕਟਾਂ ਲਈਆਂ। ਅਲਜ਼ਾਰੀ ਜੋਸੇਫ ਨੇ ਦੋ ਵਿਕਟਾਂ ਹਾਸਲ ਕੀਤੀਆਂ।