ਆਈਸੀਸੀ ਆਚਾਰ ਸੰਹਿਤਾ ਦੀ ਉਲੰਘਣਾ ਲਈ ਸ਼੍ਰੀਲੰਕਾ ਦੀ ਮਦਾਰਾ ਨੂੰ ਲੱਗੀ ਫਿੱਟਕਾਰ

ਦੁਬਈ- ਸ਼੍ਰੀਲੰਕਾ ਦੀ ਮਲਕੀ ਮਦਾਰਾ ਨੂੰ ਬੰਗਲਾਦੇਸ਼ ਵਿਰੁੱਧ ਮਹਿਲਾ ਕ੍ਰਿਕਟ ਵਿਸ਼ਵ ਕੱਪ ਲੀਗ ਮੈਚ ਦੌਰਾਨ ਆਈਸੀਸੀ ਆਚਾਰ ਸੰਹਿਤਾ ਦੀ ਲੈਵਲ 1 ਉਲੰਘਣਾ ਲਈ ਫਿੱਟਕਾਰ ਲਾਈ ਗਈ ਹੈ। ਅੰਤਰਰਾਸ਼ਟਰੀ ਕ੍ਰਿਕਟ ਪ੍ਰੀਸ਼ਦ (ਆਈਸੀਸੀ) ਨੇ ਮਦਾਰਾ ਨੂੰ ਖਿਡਾਰੀਆਂ ਅਤੇ ਖਿਡਾਰੀਆਂ ਦੇ ਸਹਾਇਤਾ ਕਰਮਚਾਰੀਆਂ ਲਈ ਆਈਸੀਸੀ ਆਚਾਰ ਸੰਹਿਤਾ ਦੀ ਧਾਰਾ 2.5 ਦੀ ਉਲੰਘਣਾ ਦਾ ਦੋਸ਼ੀ ਪਾਇਆ, ਜੋ ਕਿ "ਹਮਲਾਵਰ ਪ੍ਰਤੀਕਿਰਿਆ" ਨਾਲ ਸਬੰਧਤ ਹੈ। ਮਦਾਰਾ ਨੂੰ ਝਾੜ ਪਾਈ ਗੀ ਹੈ ਅਤੇ ਉਸਦੇ ਅਨੁਸ਼ਾਸਨੀ ਰਿਕਾਰਡ ਵਿੱਚ ਇੱਕ ਡੀਮੈਰਿਟ ਅੰਕ ਜੋੜਿਆ ਗਿਆ ਹੈ। ਇਹ 24 ਮਹੀਨਿਆਂ ਦੀ ਮਿਆਦ ਵਿੱਚ ਉਸਦਾ ਪਹਿਲਾ ਅਪਰਾਧ ਸੀ। 

ਇਹ ਘਟਨਾ ਸੋਮਵਾਰ ਨੂੰ ਨਵੀਂ ਮੁੰਬਈ ਵਿੱਚ ਬੰਗਲਾਦੇਸ਼ ਦੀ ਪਾਰੀ ਦੇ 11ਵੇਂ ਓਵਰ ਵਿੱਚ ਵਾਪਰੀ ਜਦੋਂ ਮਦਾਰਾ ਨੇ ਫਰਗਾਨਾ ਹੋਕ ਨੂੰ ਆਊਟ ਕਰਨ ਤੋਂ ਬਾਅਦ ਬੱਲੇਬਾਜ਼ ਦੇ ਬਹੁਤ ਨੇੜੇ ਜਾ ਕੇ ਜਸ਼ਨ ਮਨਾਇਆ, ਜਿਸ ਨਾਲ ਬੱਲੇਬਾਜ਼ ਤੋਂ ਹਮਲਾਵਰ ਪ੍ਰਤੀਕਿਰਿਆ ਹੋ ਸਕਦੀ ਸੀ। ਮੈਦਾਨੀ ਅੰਪਾਇਰ ਕੈਂਡੇਸ ਲਾ ਬੋਰਡੇ ਅਤੇ ਸਾਰਾਹ ਡੰਬੇਨਵਾਨਾ, ਤੀਜੇ ਅੰਪਾਇਰ ਲੌਰੇਨ ਏਜੇਨਬੈਗ ਅਤੇ ਚੌਥੇ ਅੰਪਾਇਰ ਕਲੇਅਰ ਪੋਲੋਸਾਕ ਨੇ ਮਦਾਰਾ 'ਤੇ ਅਪਰਾਧ ਦਾ ਦੋਸ਼ ਲਗਾਇਆ ਸੀ। ਮਦਾਰਾ ਨੇ ਅਪਰਾਧ ਸਵੀਕਾਰ ਕਰ ਲਿਆ ਅਤੇ ਅਮੀਰਾਤ ਆਈਸੀਸੀ ਇੰਟਰਨੈਸ਼ਨਲ ਪੈਨਲ ਆਫ਼ ਮੈਚ ਰੈਫਰੀ ਦੇ ਸ਼ੈਂਡਰੇ ਫ੍ਰਿਟਜ਼ ਦੁਆਰਾ ਪ੍ਰਸਤਾਵਿਤ ਸਜ਼ਾ ਨੂੰ ਸਵੀਕਾਰ ਕਰ ਲਿਆ, ਇਸ ਲਈ ਰਸਮੀ ਸੁਣਵਾਈ ਦੀ ਕੋਈ ਲੋੜ ਨਹੀਂ ਸੀ। ਆਈਸੀਸੀ ਦੇ ਇੱਕ ਬਿਆਨ ਦੇ ਅਨੁਸਾਰ, ਲੈਵਲ 1 ਦੀ ਉਲੰਘਣਾ ਲਈ ਘੱਟੋ-ਘੱਟ ਸਜ਼ਾ ਇੱਕ ਅਧਿਕਾਰਤ ਤਾੜਨਾ ਹੈ, ਵੱਧ ਤੋਂ ਵੱਧ ਸਜ਼ਾ ਇੱਕ ਖਿਡਾਰੀ ਦੀ ਮੈਚ ਫੀਸ ਦਾ 50 ਪ੍ਰਤੀਸ਼ਤ ਅਤੇ ਇੱਕ ਜਾਂ ਦੋ ਡੀਮੈਰਿਟ ਅੰਕ ਹਨ।