ਸ਼ੁਭਮਨ ਗਿੱਲ ਨੇ ਬਤੌਰ ਕਪਤਾਨ IPL ਵਿੱਚ ਜਿੱਤਿਆ ਆਪਣਾ ਪਹਿਲਾ ਮੈਚ, ਦੱਸਿਆ ਕਿਵੇਂ ਮਿਲੀ ਜਿੱਤ

ਸਪੋਰਟਸ ਡੈਸਕ : ਗੁਜਰਾਤ ਟਾਈਟਨਜ਼ ਦੇ ਕਪਤਾਨ ਸ਼ੁਭਮਨ ਗਿੱਲ ਨੇ ਜਿੱਤ ਦੀ ਦਹਿਲੀਜ਼ 'ਤੇ ਖੜ੍ਹੀ ਮੁੰਬਈ ਇੰਡੀਅਨਜ਼ ਦੇ ਜਬਾੜੇ 'ਚੋਂ ਜਿੱਤ ਖੋਹ ਕੇ ਖੂਬ ਸ਼ਲਾਘਾ ਖੱਟੀ। ਉਹ ਗੁਜਰਾਤ ਦੀ ਪਹਿਲੀ ਵਾਰ IPL ਵਿੱਚ ਕਪਤਾਨੀ ਕਰ ਰਿਹਾ ਹੈ। ਉਨ੍ਹਾਂ ਦਾ ਪਹਿਲਾ ਮੈਚ ਮੁੰਬਈ ਇੰਡੀਅਨਜ਼ ਨਾਲ ਸੀ ਜਿਸ ਦੇ ਕਪਤਾਨ ਹਾਰਦਿਕ ਪੰਡਯਾ ਨੇ ਗੁਜਰਾਤ ਟੀਮ ਨੂੰ ਛੱਡ ਦਿੱਤਾ ਸੀ। ਅਹਿਮ ਮੈਚ ਜਿੱਤਣ ਤੋਂ ਬਾਅਦ ਸ਼ੁਭਮਨ ਨੇ ਆਪਣੇ ਸਾਥੀ ਖਿਡਾਰੀਆਂ ਦੀ ਤਾਰੀਫ ਕੀਤੀ। ਉਸ ਨੇ ਮੈਚ ਤੋਂ ਬਾਅਦ ਕਿਹਾ ਕਿ ਤ੍ਰੇਲ ਆਉਣ 'ਤੇ ਜਿਸ ਤਰ੍ਹਾਂ ਨਾਲ ਲੜਕਿਆਂ ਨੇ ਆਪਣਾ ਸੰਜਮ ਬਣਾਈ ਰੱਖਿਆ ਉਹ ਸ਼ਾਨਦਾਰ ਸੀ। ਸਾਡੇ ਸਪਿਨਰਾਂ ਨੇ ਜਿਸ ਤਰ੍ਹਾਂ ਗੇਂਦਬਾਜ਼ੀ ਕੀਤੀ, ਉਸ ਨੇ ਇਹ ਯਕੀਨੀ ਬਣਾਇਆ ਕਿ ਅਸੀਂ ਹਮੇਸ਼ਾ ਖੇਡ 'ਚ ਹਾਂ। 
 
ਸ਼ੁਭਮਨ ਨੇ ਕਿਹਾ ਕਿ ਉਹ (ਸਾਈਂ ਸੁਦਰਸ਼ਨ) ਸਾਡੇ ਲਈ ਇਕ ਮਿਸਟਰੀ ਹਨ। ਅਸੀਂ ਸਿਰਫ ਦਬਾਅ ਬਣਾਉਣਾ ਚਾਹੁੰਦੇ ਸੀ ਅਤੇ ਉਨ੍ਹਾਂ ਦੀਆਂ ਗਲਤੀ ਕਰਨ ਦਾ ਇੰਤਜ਼ਾਰ ਕਰ ਰਹੇ ਸਨ। ਪ੍ਰਸ਼ੰਸਕਾਂ ਨੂੰ ਸ਼ੁਭਕਾਮਨਾਵਾਂ ਦਿੰਦੇ ਹੋਏ ਸ਼ੁਭਮਨ ਨੇ ਕਿਹਾ ਕਿ ਭੀੜ ਇੱਕ ਚੀਜ਼ ਹੈ, ਚਾਹੇ ਉਹ ਦਿਨ ਦੀ ਖੇਡ ਹੋਵੇ ਜਾਂ ਰਾਤ ਦੀ ਖੇਡ, ਉਹ ਹਮੇਸ਼ਾ ਸਮਰਥਨ ਲਈ ਆਉਂਦੇ ਹਨ। 169 ਦੇ ਟੀਚੇ 'ਤੇ ਗਿੱਲ ਨੇ ਕਿਹਾ, ਮੈਂ ਸੋਚਿਆ ਕਿ ਇਹ ਵਧੀਆ ਸਕੋਰ ਹੈ, ਪਰ ਅਸੀਂ ਯਕੀਨੀ ਤੌਰ 'ਤੇ ਉੱਥੇ ਘੱਟੋ-ਘੱਟ 15 ਦੌੜਾਂ ਛੱਡ ਦਿੱਤੀਆਂ, ਉਨ੍ਹਾਂ ਛੋਟੀਆਂ ਗੇਂਦਾਂ 'ਤੇ ਹਿੱਟ ਕਰਨਾ ਮੁਸ਼ਕਲ ਸੀ ਕਿਉਂਕਿ ਵਿਕਟ ਅੰਤ 'ਤੇ ਥੋੜੀ ਹੌਲੀ ਹੋ ਗਈ ਸੀ।

ਮੈਚ ਦੀ ਗੱਲ ਕਰੀਏ ਤਾਂ ਗੁਜਰਾਤ ਟਾਈਟਨਸ ਨੇ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ 'ਚ ਮੁੰਬਈ ਇੰਡੀਅਨਜ਼ ਨੂੰ 6 ਦੌੜਾਂ ਨਾਲ ਹਰਾਇਆ। ਪਹਿਲਾਂ ਖੇਡਦਿਆਂ ਗੁਜਰਾਤ ਨੇ ਸ਼ੁਭਮਨ ਦੀਆਂ 31 ਦੌੜਾਂ ਅਤੇ ਸਾਈ ਸੁਦਰਸ਼ਨ ਦੀਆਂ 45 ਦੌੜਾਂ ਦੀ ਮਦਦ ਨਾਲ 168 ਦੌੜਾਂ ਬਣਾਈਆਂ ਸਨ। ਜਵਾਬ 'ਚ ਮੁੰਬਈ ਦੀ ਟੀਮ ਰੋਹਿਤ ਦੀਆਂ 43 ਦੌੜਾਂ ਅਤੇ ਡੇਵਾਲਡ ਬ੍ਰੇਵਿਸ ਦੀਆਂ 46 ਦੌੜਾਂ ਦੇ ਬਾਵਜੂਦ ਜਿੱਤ ਹਾਸਲ ਨਹੀਂ ਕਰ ਸਕੀ।