300 ਮਿਲੀਅਨ ਦੀ ਮਾਲਕ ਹੈ ਸ਼ਾਰਾਪੋਵਾ, ਕਿਹਾ- ਪੈਸਾ ਤਾਂ ਅਸਥਾਈ ਹੈ

ਜਲੰਧਰ— ਰੂਸ ਦੀ ਸਟਾਰ ਖਿਡਾਰਨ ਮਾਰੀਆ ਸ਼ਾਰਾਪੋਵਾ ਟੈਨਿਸ ਇਵੈਂਟ ਤੇ ਐਂਡੋਸਮੈਂਟ ਤੋਂ 300 ਮਿਲੀਅਨ ਡਾਲਰ (21 ਅਰਬ ਰੁਪਏ ਤੋਂ ਜ਼ਿਆਦਾ) ਦੀ ਕਮਾਈ ਕਰ ਚੁੱਕੀ ਹੈ। ਦਰਅਸਲ ਬੀਤੇ ਦਿਨੀਂ ਇਕ ਪ੍ਰੋਗਰਾਮ ਦੇ ਦੌਰਾਨ ਮਾਰੀਆ ਦੀ ਇਸ ਕਮਾਈ ਦਾ ਖੁਲਾਸਾ ਹੋਇਆ ਸੀ। ਡੋਪਿੰਗ ਬੈਨ ਤੋਂ ਪਹਿਲਾਂ ਸ਼ਾਰਾਪੋਵਾ ਲਗਾਤਾਰ 11 ਸਾਲ ਤੱਕ ਹਾਈਐੱਸਟ ਪੇਡ ਫੀਮੇਲ ਐਥਲੀਟ ਰਹੀ ਸੀ। ਆਪਣੀ ਕਮਾਈ 'ਤੇ ਸ਼ਾਰਾਪੋਵਾ ਨੇ ਕਿਹਾ ਕਿ ਜਦੋਂ ਤੁਸੀਂ ਨੌਜਵਾਨ ਹੁੰਦੇ ਹੋ ਤੇ ਤੁਸੀਂ ਸਫਲ ਹੁੰਦੇ ਹੋ ਤੇ ਵਧੀਆ ਕਰ ਰਹੇ ਹੁੰਦੇ ਹੋ ਤੇ ਤੁਹਾਡੇ ਜੀਵਨ 'ਚ ਚੀਜ਼ਾਂ ਆਟੋਮੈਟਿਕ ਹੁੰਦੀਆਂ ਹਨ ਤਾਂ ਤੁਸੀਂ ਸੋਚਦੇ ਹੁੰਦੇ ਕਿ ਇਹ ਸਾਲਾਂ ਤੱਕ ਜਾਰੀ ਰਹੇਗਾ।

ਮਾਰੀਆ ਨੇ ਕਿਹਾ ਕਿ ਬਹੁਤ ਜ਼ਿਆਦਾ ਪੈਸਾ ਖੁਸ਼ੀ ਨਹੀਂ ਦਿੰਦਾ ਹੈ ਜੋ ਬਾਹਰ ਦੇ ਲੋਕ ਦੇਖ ਸਕਦੇ ਹਨ। ਬੇਸ਼ੱਕ, ਇਹ ਤੁਹਾਨੂੰ ਜ਼ਿਆਦਾ ਭੋਤਿਕਵਾਦੀ ਉਤਪਾਦ ਖਰੀਦਣ ਦੀ ਆਗਿਆ ਦਿੰਦਾ ਹੈ ਪਰ ਉਹ ਸਾਰੀਆਂ ਚੀਜ਼ਾਂ ਬਹੁਤ ਅਸਥਾਈ ਹਨ।

ਰੂਸੀ ਟੈਨਿਸ ਸੁੰਦਰੀ ਮਾਰੀਆ ਸ਼ਾਰਾਪੋਵਾ ਭਾਵੇ ਹੀ ਮੋਢੇ ਦੀ ਸੱਟ ਕਾਰਨ ਟੈਨਿਸ ਖੇਡ ਤੋਂ ਦੂਰ ਹੈ ਪਰ ਇਸ ਦੌਰਾਨ ਉਹ ਸੋਸ਼ਲ ਹੋਣ ਦਾ ਕੋਈ ਮੌਕਾ ਨਹੀਂ ਛੱਡ ਰਹੀ ਹੈ। ਉਹ ਬੀਤੇ ਦਿਨੀਂ ਮਾਰੀਆ ਇੰਗਲੈਂਡ ਦੇ ਸਾਬਕਾ ਫੁੱਟਬਾਲ ਕਪਤਾਨ ਡੇਵਿਡ ਬੇਕਹਮ ਤੇ ਉਸਦੀ ਪਤਨੀ ਵਿਕਟੋਰੀਆ ਦੇ ਘਰ ਡਿਨਰ ਦੇ ਲਈ ਪਹੁੰਚੀ। ਲਾਸ ਐਂਜਿਲਿਸ ਸਥਿਤ ਪਾਰਟੀ ਵਾਲੀ ਜਗ੍ਹਾਂ 'ਤੇ ਮਾਰੀਆ ਨੇ ਖੂਬ ਧਮਾਲ ਮਚਾਈ। ਉਨ੍ਹਾਂ ਨੇ ਕੁਝ ਤਸਵੀਰਾਂ ਵੀ ਆਪਣੇ ਇੰਸਟਾਗ੍ਰਾਮ 'ਤੇ ਸ਼ੇਅਰ ਕੀਤੀਆਂ ਹਨ।