ਸ਼ਾਹਰੁਖ ਖਾਨ ਨੇ ਰਚਿਆ ਇਤਿਹਾਸ, 3000 ਮੀਟਰ ਸਟੀਪਲਚੇਜ਼ ''ਚ ਬਣਾਇਆ ਰਿਕਾਰਡ

ਸਪੋਰਟਸ ਡੈਸਕ- ਭਾਰਤ ਦੇ ਨੌਜਵਾਨ ਅਥਲੀਟ ਸ਼ਾਹਰੁਖ ਖਾਨ ਨੇ ਇਤਿਹਾਸ ਰਚ ਦਿੱਤਾ ਹੈ। ਉਨ੍ਹਾਂ ਨੇ 3000 ਮੀਟਰ ਸਟੀਪਲਚੇਜ਼ ਵਿੱਚ ਨੈਸ਼ਨਲ ਅੰਡਰ 20 ਦਾ ਰਿਕਾਰਡ ਤੋੜ ਕੇ ਆਪਣੀ ਹੀਟ ਵਿੱਚ ਛੇਵੇਂ ਸਥਾਨ 'ਤੇ ਰਹਿੰਦੇ ਹੋਏ ਵਿਸ਼ਵ ਅਥਲੈਟਿਕਸ ਅੰਡਰ 20 ਚੈਂਪੀਅਨਸ਼ਿਪ ਦੇ ਫਾਈਨਲ ਵਿੱਚ ਜਗ੍ਹਾ ਪੱਕੀ ਕੀਤੀ। ਸ਼ਾਹਰੁਖ ਨੇ ਇਹ ਉਪਲਬਧੀ ਸਿਰਫ 8 ਮਿੰਟ 45.12 ਸਕਿੰਟ 'ਚ ਹਾਸਲ ਕਰ ਲਈ।
18 ਸਾਲ ਦੇ ਸ਼ਾਹਰੁਖ ਨੇ ਆਪਣੀ ਹੀਟ ਵਿੱਚ ਛੇਵਾਂ ਸਥਾਨ ਹਾਸਲ ਕੀਤਾ। ਸ਼ਾਹਰੁਖ ਦਾ ਫਾਈਨਲ ਮੁਕਾਬਲਾ 31 ਅਗਸਤ ਨੂੰ ਹੋਵੇਗਾ। ਖਾਸ ਗੱਲ ਇਹ ਹੈ ਕਿ ਦੋਵਾਂ ਹੀਟਸ ਦੇ ਚੋਟੀ ਦੇ ਅੱਠ ਖਿਡਾਰੀਆਂ ਨੇ ਫਾਈਨਲ ਵਿੱਚ ਥਾਂ ਬਣਾਈ ਹੈ। ਇਸ ਤੋਂ ਪਹਿਲਾਂ ਅੰਡਰ-20 ਦਾ ਰਾਸ਼ਟਰੀ ਰਿਕਾਰਡ ਰਾਜਸਥਾਨ ਦੇ 19 ਸਾਲਾ ਰਾਜੇਸ਼ ਦੇ ਨਾਂ ਸੀ, ਜਿਨ੍ਹਾਂ ਨੇ ਮਈ 'ਚ ਭੁਵਨੇਸ਼ਵਰ 'ਚ ਫੈਡਰੇਸ਼ਨ ਕੱਪ ਨੈਸ਼ਨਲ ਸੀਨੀਅਰ ਚੈਂਪੀਅਨਸ਼ਿਪ 'ਚ 8 ਮਿੰਟ 50.12 ਸਕਿੰਟ ਦਾ ਸਮਾਂ ਕੱਢਿਆ ਸੀ।
ਜੈ ਕੁਮਾਰ ਨੇ ਫਾਈਨਲ 'ਚ ਥਾਂ ਬਣਾਈ
ਖਾਨ ਦਾ ਇਸ ਤੋਂ ਪਹਿਲਾਂ ਸਰਵੋਤਮ ਵਿਅਕਤੀਗਤ ਪ੍ਰਦਰਸ਼ਨ 8 ਮਿੰਟ 51.75 ਸਕਿੰਟ ਸੀ। ਉਨ੍ਹਾਂ ਨੇ ਪਿਛਲੇ ਸਾਲ ਜੂਨ ਵਿੱਚ ਕੋਰੀਆ ਵਿੱਚ ਏਸ਼ੀਅਨ ਅੰਡਰ-20 ਚੈਂਪੀਅਨਸ਼ਿਪ ਵਿੱਚ ਚਾਂਦੀ ਦਾ ਤਮਗਾ ਜਿੱਤਿਆ ਸੀ। ਇਸ ਦੇ ਨਾਲ ਹੀ ਭਾਰਤ ਦੇ ਜੈ ਕੁਮਾਰ ਨੇ ਪੁਰਸ਼ਾਂ ਦੀ 400 ਮੀਟਰ ਦੌੜ ਦੇ ਫਾਈਨਲ ਵਿੱਚ ਪ੍ਰਵੇਸ਼ ਕਰ ਲਿਆ ਜੋ ਆਪਣੀ ਸੈਮੀਫਾਈਨਲ ਹੀਟ ਵਿੱਚ ਤੀਜੇ ਪਾਇਦਾਨ ’ਤੇ ਰਹੇ।