ਪ੍ਰਾਗ ਸ਼ਤਰੰਜ ਫੈਸਟੀਵਲ: ਗੁਕੇਸ਼ ਨੂੰ ਮਿਲੀ ਹਾਰ; ਅਰਵਿੰਦ ਨੇ ਮੈਚ ਡਰਾਅ ਖੇਡਿਆ

ਪ੍ਰਾਗ : ਪ੍ਰਾਗ ਅੰਤਰਰਾਸ਼ਟਰੀ ਸ਼ਤਰੰਜ ਮਹੋਤਸਵ ਦੇ ਮਾਸਟਰਜ਼ ਵਰਗ ਵਿੱਚ ਭਾਰਤ ਲਈ ਤੀਜਾ ਦੌਰ ਨਿਰਾਸ਼ਾਜਨਕ ਰਿਹਾ। ਵਿਸ਼ਵ ਚੈਂਪੀਅਨ ਡੀ. ਗੁਕੇਸ਼ ਨੂੰ ਨੀਦਰਲੈਂਡ ਦੇ ਜੌਰਡਨ ਵੈਨ ਫੋਰੈਸਟ ਹੱਥੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਜਦਕਿ ਦੂਜੇ ਭਾਰਤੀ ਖਿਡਾਰੀ ਅਰਵਿੰਦ ਚਿਦੰਬਰਮ ਨੇ ਆਪਣਾ ਮੁਕਾਬਲਾ ਡਰਾਅ ਖੇਡਿਆ।

ਗੁਕੇਸ਼ ਦੀ ਖ਼ਰਾਬ ਸ਼ੁਰੂਆਤ 
ਟੂਰਨਾਮੈਂਟ ਵਿੱਚ ਆਪਣੀ ਪਹਿਲੀ ਜਿੱਤ ਦੀ ਭਾਲ ਵਿੱਚ ਲੱਗੇ ਗੁਕੇਸ਼ ਮੈਚ ਦੀ ਸ਼ੁਰੂਆਤ ਤੋਂ ਹੀ ਲੈਅ ਵਿੱਚ ਨਜ਼ਰ ਨਹੀਂ ਆਏ। ਵੈਨ ਫੋਰੈਸਟ ਨੇ ਸਫੈਦ ਮੋਹਰਿਆਂ ਨਾਲ ਖੇਡਦਿਆਂ 'ਰੂਏ ਲੋਪੇਜ਼' (Ruy Lopez) ਸ਼ੈਲੀ ਅਪਣਾਈ ਅਤੇ ਟਾਰਟਾਕੋਵਰ ਵੇਰੀਏਸ਼ਨ ਰਾਹੀਂ ਸ਼ੁਰੂਆਤੀ ਬੜ੍ਹਤ ਹਾਸਲ ਕਰ ਲਈ। ਇਸ ਦਬਾਅ ਕਾਰਨ ਗੁਕੇਸ਼ ਨੂੰ ਆਪਣਾ ਇੱਕ ਮੋਹਰਾ ਗੁਆਉਣਾ ਪਿਆ ਅਤੇ ਰਾਣੀ ਦੇ ਤਬਾਦਲੇ ਤੋਂ ਬਾਅਦ ਉਨ੍ਹਾਂ ਦੀ ਸਥਿਤੀ ਹੋਰ ਖ਼ਰਾਬ ਹੋ ਗਈ। ਅੰਤ ਵਿੱਚ 48 ਚਾਲਾਂ ਤੋਂ ਬਾਅਦ ਫੋਰੈਸਟ ਨੇ ਜਿੱਤ ਦਰਜ ਕੀਤੀ।

ਅੰਕ ਸੂਚੀ ਦੀ ਸਥਿਤੀ
ਇਸ ਜਿੱਤ ਨਾਲ ਵੈਨ ਫੋਰੈਸਟ 2 ਅੰਕਾਂ ਨਾਲ ਉਜ਼ਬੇਕਿਸਤਾਨ ਦੇ ਨੋਦਿਰਬੇਕ ਯਾਕੂਬੋਏਵ, ਨੋਦਿਰਬੇਕ ਅਬਦੁਸਤੋਰੋਵ ਅਤੇ ਸਥਾਨਕ ਖਿਡਾਰੀ ਡੇਵਿਡ ਨਵਾਰਾ ਦੇ ਨਾਲ ਸਾਂਝੇ ਤੌਰ 'ਤੇ ਸਿਖਰ 'ਤੇ ਪਹੁੰਚ ਗਏ ਹਨ। ਦੂਜੇ ਪਾਸੇ, ਗੁਕੇਸ਼ ਤਿੰਨ ਮੈਚਾਂ ਵਿੱਚ ਸਿਰਫ਼ ਇੱਕ ਅੰਕ ਨਾਲ ਸੱਤਵੇਂ ਸਥਾਨ 'ਤੇ ਹਨ। ਭਾਰਤ ਦੇ ਅਰਵਿੰਦ ਚਿਦੰਬਰਮ ਨੇ ਈਰਾਨ ਦੇ ਪਰਹਮ ਮਗਸੂਦਲੂ ਨਾਲ ਡਰਾਅ ਖੇਡ ਕੇ ਆਪਣੇ ਅੰਕਾਂ ਦੀ ਗਿਣਤੀ 1.5 ਕਰ ਲਈ ਹੈ।

ਚੈਲੇਂਜਰਜ਼ ਵਰਗ ਵਿੱਚ ਵੀ ਮਿਲੀ ਨਿਰਾਸ਼ਾ 
ਚੈਲੇਂਜਰਜ਼ ਵਰਗ ਵਿੱਚ ਖੇਡ ਰਹੇ ਭਾਰਤੀ ਖਿਡਾਰੀਆਂ ਦਾ ਪ੍ਰਦਰਸ਼ਨ ਵੀ ਫਿੱਕਾ ਰਿਹਾ। ਮਹਿਲਾ ਵਿਸ਼ਵ ਕੱਪ ਜੇਤੂ ਦਿਵਿਆ ਦੇਸ਼ਮੁਖ ਨੂੰ ਚੀਨ ਦੀ ਜਿਨੇਰ ਝੂ ਨੇ ਮਾਤ ਦਿੱਤੀ। ਇਸੇ ਤਰ੍ਹਾਂ ਸੂਰਿਆ ਸ਼ੇਖਰ ਗਾਂਗੁਲੀ ਨੂੰ ਚੈੱਕ ਗਣਰਾਜ ਦੇ ਜੈਚਿਮ ਨੇਮੇਕ ਹੱਥੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਤਿੰਨ ਦੌਰ ਤੋਂ ਬਾਅਦ ਦਿਵਿਆ ਦਾ ਇੱਕ ਅੰਕ ਹੈ, ਜਦਕਿ ਗਾਂਗੁਲੀ ਅੱਧੇ ਅੰਕ 'ਤੇ ਹਨ। ਚੈੱਕ ਗਣਰਾਜ ਦੇ ਫਾਈਨਕ ਵਾਕਲਾਵ 2.5 ਅੰਕਾਂ ਨਾਲ ਇਸ ਵਰਗ ਵਿੱਚ ਸਭ ਤੋਂ ਅੱਗੇ ਹਨ।