ਸਾਤਵਿਕ-ਚਿਰਾਗ ਦੀ ਜੋੜੀ ਆਸਟ੍ਰੇਲੀਅਨ ਓਪਨ ਦੇ ਦੂਜੇ ਦੌਰ ਵਿੱਚ ਪੁੱਜੀ

ਸਪੋਰਟਸ ਡੈਸਕ- ਭਾਰਤ ਦੇ ਸਟਾਰ ਸ਼ਟਲਰ ਸਾਤਵਿਕਸਾਈਰਾਜ ਰੰਕੀਰੈੱਡੀ ਅਤੇ ਚਿਰਾਗ ਸ਼ੈੱਟੀ ਨੇ ਮੰਗਲਵਾਰ ਨੂੰ ਚੀਨੀ ਤਾਈਪੇ ਦੇ ਚਾਂਗ ਕੋ-ਚੀ ਅਤੇ ਪੋ ਲੀ-ਵੇਈ 'ਤੇ ਸਿੱਧੀ ਗੇਮ ਵਿੱਚ ਜਿੱਤ ਨਾਲ ਆਸਟ੍ਰੇਲੀਅਨ ਓਪਨ ਸੁਪਰ 500 ਬੈਡਮਿੰਟਨ ਟੂਰਨਾਮੈਂਟ ਦੇ ਪੁਰਸ਼ ਡਬਲਜ਼ ਦੇ ਦੂਜੇ ਦੌਰ ਵਿੱਚ ਪ੍ਰਵੇਸ਼ ਕੀਤਾ। ਦੁਨੀਆ ਦੀ ਤੀਜੇ ਨੰਬਰ ਦੀ ਭਾਰਤੀ ਜੋੜੀ ਨੇ ਕੋ-ਚੀ ਅਤੇ ਪੋ ਲੀ-ਵੇਈ ਵਿਰੁੱਧ 48 ਮਿੰਟ ਚੱਲੇ ਸਖ਼ਤ ਮੁਕਾਬਲੇ ਵਿੱਚ 25-23, 21-16 ਨਾਲ ਜਿੱਤ ਦਰਜ ਕੀਤੀ। ਹਾਲਾਂਕਿ, ਮਹਿਲਾ ਡਬਲਜ਼ ਵਿੱਚ, ਤ੍ਰਿਸਾ ਜੌਲੀ ਅਤੇ ਗਾਇਤਰੀ ਗੋਪੀਚੰਦ ਆਪਣਾ ਪਹਿਲਾ ਮੈਚ ਇੰਡੋਨੇਸ਼ੀਆ ਦੀ ਐਫ. ਕੁਸੁਮਾ ਅਤੇ ਐਮ. ਪੁਸ਼ਪਿਤਾਸਰੀ ਤੋਂ 10-21, 14-21 ਨਾਲ ਹਾਰ ਗਈ। 

ਸਾਤਵਿਕ ਅਤੇ ਚਿਰਾਗ ਦੀ ਸਿਖਰਲਾ ਦਰਜਾ ਪ੍ਰਾਪਤ ਜੋੜੀ ਸ਼ੁਰੂਆਤੀ ਗੇਮ ਵਿੱਚ ਇੱਕ ਸਮੇਂ 2-6 ਨਾਲ ਪਿੱਛੇ ਸੀ। ਇੱਕ ਕਰੀਬੀ ਮੁਕਾਬਲਾ ਹੋਇਆ, ਪਰ ਚੀਨੀ ਤਾਈਪੇਈ ਦੀ ਜੋੜੀ ਨੇ 16-14 ਤੱਕ ਇੱਕ ਹਲਕੀ ਬੜ੍ਹਤ ਬਣਾਈ ਰੱਖੀ। ਭਾਰਤੀਆਂ ਨੇ ਜਵਾਬੀ ਹਮਲਾ ਕੀਤਾ ਅਤੇ 19-17 ਦੀ ਬੜ੍ਹਤ ਹਾਸਲ ਕੀਤੀ, ਪਰ ਫਿਰ ਮੈਚ ਦਿਲਚਸਪ ਹੋ ਗਿਆ। ਇਸ ਤੋਂ ਬਾਅਦ ਦੋਵਾਂ ਟੀਮਾਂ ਨੂੰ ਗੇਮ ਪੁਆਇੰਟ ਮਿਲੇ, ਪਰ ਭਾਰਤੀ ਜੋੜੀ ਨੇ ਅੰਤ ਵਿੱਚ ਆਪਣੇ ਤੀਜੇ ਗੇਮ ਪੁਆਇੰਟ ਦਾ ਲਾਹਾ ਲੈਣ ਵਿਚ ਸਫਲ ਰਹੀ। ਸਾਤਵਿਕ ਅਤੇ ਚਿਰਾਗ ਨੇ ਦੂਜੇ ਗੇਮ ਦੇ ਸ਼ੁਰੂ ਵਿੱਚ 7-4 ਦੀ ਬੜ੍ਹਤ ਬਣਾਈ, ਪਰ ਦੋ ਨੈੱਟ ਗਲਤੀਆਂ ਅਤੇ ਤਾਈਵਾਨੀ ਜੋੜੀ ਦੇ ਇੱਕ ਸ਼ਕਤੀਸ਼ਾਲੀ ਸਮੈਸ਼ ਨੇ ਉਨ੍ਹਾਂ ਨੂੰ ਬਰਾਬਰੀ 'ਤੇ ਲੈ ਆਂਦਾ। ਭਾਰਤੀ ਜੋੜੀ ਨੇ ਅੰਤਰਾਲ 'ਤੇ ਇੱਕ ਅੰਕ ਦੀ ਬੜ੍ਹਤ ਬਣਾਈ ਰੱਖੀ। ਫਿਰ ਉਨ੍ਹਾਂ ਨੇ ਆਪਣੀ ਬੜ੍ਹਤ ਬਰਕਰਾਰ ਰੱਖ ਕੇ ਮੈਚ ਜਿੱਤ ਲਿਆ। ਭਾਰਤੀ ਸਿੰਗਲ ਖਿਡਾਰੀ ਲਕਸ਼ੈ ਸੇਨ, ਐਚਐਸ ਪ੍ਰਣਯ, ਕਿਦਾਂਬੀ ਸ਼੍ਰੀਕਾਂਤ ਅਤੇ ਆਯੁਸ਼ ਸ਼ੈੱਟੀ ਬੁੱਧਵਾਰ ਨੂੰ ਆਪਣੀਆਂ ਮੁਹਿੰਮਾਂ ਸ਼ੁਰੂ ਕਰਨਗੇ।