ਰਿਆਨ ਪਰਾਗ ਦੀ ਬੱਲੇਬਾਜ਼ੀ ''ਚ ਕੋਈ ਕਮੀ ਨਹੀਂ, ਉਹ ਮਜ਼ਬੂਤ ਵਾਪਸੀ ਕਰੇਗਾ : ਵਿਕਰਮ ਰਾਠੌੜ

ਜੈਪੁਰ : ਆਈ.ਪੀ.ਐੱਲ. 2026 ਵਿੱਚ ਰਾਜਸਥਾਨ ਰਾਇਲਜ਼ ਦੇ ਕਪਤਾਨ ਰਿਆਨ ਪਰਾਗ ਦੀ ਖ਼ਰਾਬ ਫਾਰਮ ਟੀਮ ਲਈ ਚਿੰਤਾ ਦਾ ਵਿਸ਼ਾ ਬਣੀ ਹੋਈ ਹੈ। ਇਸ ਵਿਚਾਲੇ ਟੀਮ ਦੇ ਬੱਲੇਬਾਜ਼ੀ ਕੋਚ ਵਿਕਰਮ ਰਾਠੌਰ ਨੇ ਕਪਤਾਨ ਦਾ ਪੱਖ ਲੈਂਦਿਆਂ ਕਿਹਾ ਹੈ ਕਿ ਪਰਾਗ ਦੀ ਬੱਲੇਬਾਜ਼ੀ ਵਿੱਚ ਕੋਈ ਕਮੀ ਨਹੀਂ ਹੈ ਅਤੇ ਉਹ ਜਲਦ ਹੀ ਮਜ਼ਬੂਤ ਵਾਪਸੀ ਕਰਨਗੇ।

ਸੀਜ਼ਨ ਦੇ ਪਹਿਲੇ 8 ਮੈਚਾਂ 'ਚ ਫੇਲ੍ਹ ਰਹੇ ਪਰਾਗ
ਰਿਆਨ ਪਰਾਗ ਲਈ ਮੌਜੂਦਾ ਸੀਜ਼ਨ ਦੀ ਸ਼ੁਰੂਆਤ ਕਾਫੀ ਮਾੜੀ ਰਹੀ ਹੈ। ਉਨ੍ਹਾਂ ਨੇ ਹੁਣ ਤੱਕ ਖੇਡੇ ਗਏ 8 ਮੈਚਾਂ ਵਿੱਚ ਸਿਰਫ਼ 88 ਦੌੜਾਂ ਬਣਾਈਆਂ ਹਨ, ਜਿਸ ਦੌਰਾਨ ਉਨ੍ਹਾਂ ਦਾ ਸਟ੍ਰਾਈਕ ਰੇਟ ਮਹਿਜ਼ 112.82 ਰਿਹਾ ਹੈ। ਉਨ੍ਹਾਂ ਦਾ ਹੁਣ ਤੱਕ ਦਾ ਸਭ ਤੋਂ ਵੱਡਾ ਸਕੋਰ ਸਿਰਫ਼ 20 ਦੌੜਾਂ ਹੈ। ਦੂਜੇ ਪਾਸੇ, ਟੀਮ ਦੇ ਨੌਜਵਾਨ ਖਿਡਾਰੀ ਵੈਭਵ ਸੂਰਿਆਵੰਸ਼ੀ (357 ਦੌੜਾਂ), ਯਸ਼ਸਵੀ ਜਾਇਸਵਾਲ (255 ਦੌੜਾਂ) ਅਤੇ ਧਰੁਵ ਜੁਰੇਲ (232 ਦੌੜਾਂ) ਸ਼ਾਨਦਾਰ ਪ੍ਰਦਰਸ਼ਨ ਕਰ ਰਹੇ ਹਨ, ਜਿਸ ਕਾਰਨ ਪਰਾਗ ਦੀ ਫਾਰਮ 'ਤੇ ਸਵਾਲ ਉੱਠਣੇ ਲਾਜ਼ਮੀ ਹਨ। ਉਹ ਰਵਿੰਦਰ ਜਡੇਜਾ ਅਤੇ ਡੋਨੋਵਨ ਫਰੇਰਾ ਵਰਗੇ ਖਿਡਾਰੀਆਂ ਤੋਂ ਵੀ ਦੌੜਾਂ ਦੇ ਮਾਮਲੇ ਵਿੱਚ ਪਿੱਛੇ ਚੱਲ ਰਹੇ ਹਨ।

ਕਪਤਾਨੀ ਦੇ ਫੈਸਲੇ 'ਤੇ ਹੋਈ ਸੀ ਚਰਚਾ 
ਯਸ਼ਸਵੀ ਜਾਇਸਵਾਲ ਅਤੇ ਧਰੁਵ ਜੁਰੇਲ ਵਰਗੇ ਸਥਾਪਿਤ ਭਾਰਤੀ ਖਿਡਾਰੀਆਂ ਦੇ ਹੁੰਦੇ ਹੋਏ ਰਿਆਨ ਪਰਾਗ ਨੂੰ ਟੀਮ ਦੀ ਕਮਾਨ ਸੌਂਪਣਾ ਪਹਿਲਾਂ ਹੀ ਚਰਚਾ ਦਾ ਵਿਸ਼ਾ ਰਿਹਾ ਹੈ। ਹੁਣ ਉਨ੍ਹਾਂ ਦੇ ਖ਼ਰਾਬ ਪ੍ਰਦਰਸ਼ਨ ਨੇ ਇਸ ਚਰਚਾ ਨੂੰ ਹੋਰ ਹਵਾ ਦਿੱਤੀ ਹੈ।

ਕੋਚ ਨੇ ਦਿੱਤੀ ਸਫਾਈ 
ਸਨਰਾਈਜ਼ਰਜ਼ ਹੈਦਰਾਬਾਦ ਵਿਰੁੱਧ ਮੈਚ ਹਾਰਨ ਤੋਂ ਬਾਅਦ ਵਿਕਰਮ ਰਾਠੌਰ ਨੇ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਕਿਹਾ ਕਿ ਪਰਾਗ ਅਭਿਆਸ ਦੌਰਾਨ ਬਹੁਤ ਵਧੀਆ ਬੱਲੇਬਾਜ਼ੀ ਕਰ ਰਹੇ ਹਨ ਅਤੇ ਸਖ਼ਤ ਮਿਹਨਤ ਕਰ ਰਹੇ ਹਨ। ਉਨ੍ਹਾਂ ਕਿਹਾ, "ਕਈ ਵਾਰ ਖੇਡ ਵਿੱਚ ਅਜਿਹਾ ਦੌਰ ਆਉਂਦਾ ਹੈ ਜਦੋਂ ਤੁਸੀਂ ਉਨੀਆਂ ਦੌੜਾਂ ਨਹੀਂ ਬਣਾ ਪਾਉਂਦੇ ਜਿੰਨੀਆਂ ਚਾਹੁੰਦੇ ਹੋ, ਪਰ ਇਹ ਖੇਡ ਦਾ ਹਿੱਸਾ ਹੈ।" ਰਾਠੌਰ ਨੇ ਭਰੋਸਾ ਜਤਾਇਆ ਕਿ ਪਰਾਗ ਜਲਦ ਹੀ ਵੱਡਾ ਸਕੋਰ ਬਣਾਉਣ ਵਿੱਚ ਸਫਲ ਹੋਣਗੇ ਅਤੇ ਮਜ਼ਬੂਤ ਵਾਪਸੀ ਕਰਨਗੇ।