ਪੁਰਤਗਾਲ ਨੂੰ ਮੇਜ਼ਬਾਨੀ ਦੇ ਅਧਿਕਾਰ ਮਿਲਣ ਤੋਂ ਬਾਅਦ ਰੋਨਾਲਡੋ ਨੇ ਕਿਹਾ, 2030 ਵਿਸ਼ਵ ਕੱਪ ਹੋਵੇਗਾ ਖਾਸ

ਮੈਡ੍ਰਿਡ- ਪੁਰਤਗਾਲ ਅਤੇ ਪੰਜ ਹੋਰ ਦੇਸ਼ਾਂ ਨੂੰ 2030 ਫੁੱਟਬਾਲ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਦੇ ਅਧਿਕਾਰ ਮਿਲਣ ਤੋਂ ਬਾਅਦ ਸਟਾਰ ਸਟਰਾਈਕਰ ਕ੍ਰਿਸਟੀਆਨੋ ਰੋਨਾਲਡੋ ਨੇ ਕਿਹਾ ਕਿ ਇਹ ਛੇ ਸਾਲ ਬਾਅਦ ਹੋਣ ਵਾਲਾ ਇਹ ਟੂਰਨਾਮੈਂਟ ਬਹੁਤ ਖਾਸ ਹੋਵੇਗਾ। ਵਿਸ਼ਵ ਫੁੱਟਬਾਲ ਦੀ ਸਰਵਉੱਚ ਸੰਸਥਾ ਫੀਫਾ ਨੇ ਬੁੱਧਵਾਰ ਨੂੰ 2030 ਅਤੇ 2034 'ਚ ਹੋਣ ਵਾਲੇ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਦਾ ਰਸਮੀ ਐਲਾਨ ਕੀਤਾ। 

ਵਿਸ਼ਵ ਕੱਪ 2030 ਦੇ ਮੈਚ ਤਿੰਨ ਮਹਾਂਦੀਪਾਂ ਦੇ ਛੇ ਦੇਸ਼ਾਂ ਵਿੱਚ ਖੇਡੇ ਜਾਣਗੇ। ਇਹ ਪਹਿਲੀ ਵਾਰ ਹੋਵੇਗਾ ਜਦੋਂ ਵਿਸ਼ਵ ਕੱਪ ਛੇ ਦੇਸ਼ਾਂ ਵਿੱਚ ਆਯੋਜਿਤ ਕੀਤਾ ਜਾਵੇਗਾ। ਸਪੇਨ, ਪੁਰਤਗਾਲ ਅਤੇ ਮੋਰੋਕੋ ਨੂੰ ਸੰਯੁਕਤ ਮੇਜ਼ਬਾਨੀ ਦੇ ਅਧਿਕਾਰ ਦਿੱਤੇ ਗਏ ਹਨ ਪਰ ਦੱਖਣੀ ਅਮਰੀਕੀ ਦੇਸ਼ਾਂ ਅਰਜਨਟੀਨਾ, ਪੈਰਾਗੁਏ ਅਤੇ ਉਰੂਗਵੇ ਵਿਚ ਇਕ-ਇਕ ਮੈਚ ਆਯੋਜਿਤ ਕੀਤਾ ਜਾਵੇਗਾ। ਪਹਿਲਾ ਵਿਸ਼ਵ ਕੱਪ 1930 ਵਿੱਚ ਉਰੂਗਵੇ ਵਿੱਚ ਆਯੋਜਿਤ ਕੀਤਾ ਗਿਆ ਸੀ ਅਤੇ ਫੀਫਾ ਨੇ ਇਸਦੀ 100ਵੀਂ ਵਰ੍ਹੇਗੰਢ ਮਨਾਉਣ ਲਈ ਇਹਨਾਂ ਦੱਖਣੀ ਅਮਰੀਕੀ ਦੇਸ਼ਾਂ ਨੂੰ ਇੱਕ-ਇੱਕ ਮੈਚ ਦੇ ਮੇਜ਼ਬਾਨੀ ਦੇ ਅਧਿਕਾਰ ਦਿੱਤੇ ਹਨ।

ਰੋਨਾਲਡੋ ਨੇ ਇੰਸਟਾਗ੍ਰਾਮ 'ਤੇ ਪੁਰਤਗਾਲ ਦੀ ਜਰਸੀ ਪਹਿਨ ਕੇ ਜਸ਼ਨ ਮਨਾਉਂਦੇ ਹੋਏ ਇਕ ਤਸਵੀਰ ਪੋਸਟ ਕੀਤੀ, ਜਿਸ 'ਚ ਉਸ ਨੇ ਲਿਖਿਆ, ''ਸੁਪਨਾ ਸੱਚ ਹੋਇਆ। ਇਹ ਬਹੁਤ ਹੀ ਖਾਸ ਵਿਸ਼ਵ ਕੱਪ ਹੋਵੇਗਾ। ਪੁਰਤਗਾਲ 2030 ਵਿੱਚ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਕਰਕੇ ਸਾਨੂੰ ਮਾਣ ਮਹਿਸੂਸ ਕਰੇਗਾ।'' ਫੀਫਾ ਨੇ 2034 ਵਿੱਚ ਹੋਣ ਵਾਲੇ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਸਾਊਦੀ ਅਰਬ ਨੂੰ ਸੌਂਪਣ ਦਾ ਵੀ ਐਲਾਨ ਕੀਤਾ।