ਪੀਐਸਜੀ ਨੇ ਇੰਟਰ ਨੂੰ 5-0 ਨਾਲ ਹਰਾ ਕੇ ਚੈਂਪੀਅਨਜ਼ ਲੀਗ ਦਾ ਖਿਤਾਬ ਜਿੱਤਿਆ

ਮਿਊਨਿਖ- ਪੈਰਿਸ ਸੇਂਟ-ਜਰਮੇਨ (ਪੀਐਸਜੀ) ਨੇ ਯੂਈਐਫਏ ਚੈਂਪੀਅਨਜ਼ ਲੀਗ ਦੇ ਫਾਈਨਲ ਵਿੱਚ ਇੰਟਰ ਮਿਲਾਨ ਨੂੰ 5-0 ਨਾਲ ਹਰਾ ਕੇ ਪਹਿਲੀ ਵਾਰ ਯੂਰਪੀਅਨ ਚੈਂਪੀਅਨਜ਼ ਲੀਗ ਦਾ ਖਿਤਾਬ ਜਿੱਤਿਆ। ਸ਼ਨੀਵਾਰ ਰਾਤ ਨੂੰ ਐਲੀਅਨਜ਼ ਅਰੇਨਾ ਵਿੱਚ ਖੇਡੇ ਗਏ ਮੈਚ ਵਿੱਚ, ਲੁਈਸ ਐਨਰਿਕ ਦੀ ਨੌਜਵਾਨ ਟੀਮ ਨੇ ਮੈਚ ਦੀ ਸ਼ੁਰੂਆਤ ਤੋਂ ਹੀ ਇੰਟਰ ਮਿਲਾਨ 'ਤੇ ਦਬਦਬਾ ਬਣਾਇਆ। 

ਅਸ਼ਰਫ ਹਕੀਮੀ ਨੇ 12ਵੇਂ ਮਿੰਟ ਵਿੱਚ ਪੀਐਸਜੀ ਲਈ ਪਹਿਲਾ ਗੋਲ ਕੀਤਾ। ਇਸ ਤੋਂ ਬਾਅਦ, ਡਿਜ਼ਾਇਰ ਡੌ ਨੇ 20ਵੇਂ ਅਤੇ 63ਵੇਂ ਮਿੰਟ ਵਿੱਚ ਗੋਲ ਕੀਤੇ। ਮੈਚ ਦਾ ਚੌਥਾ ਗੋਲ 73ਵੇਂ ਮਿੰਟ ਵਿੱਚ ਖਵਿਚਾ ਕਵਾਰਤਸਖੇਲੀਆ ਨੇ ਕੀਤਾ। ਇੱਕ ਹੋਰ ਖਿਡਾਰੀ ਦੀ ਜਗ੍ਹਾ ਖੇਡਣ ਲਈ ਮੈਦਾਨ 'ਤੇ ਆਏ ਸੇਨੀ ਮਯੁਲੂ ਨੇ 86ਵੇਂ ਮਿੰਟ ਵਿੱਚ ਗੋਲ ਕੀਤਾ ਅਤੇ ਟੀਮ ਨੂੰ ਇਤਿਹਾਸਕ ਜਿੱਤ ਦਿਵਾਈ। ਇਸ ਜਿੱਤ ਦੇ ਨਾਲ, ਪੀਐਸਜੀ ਯੂਰਪੀਅਨ ਕੱਪ ਜਿੱਤਣ ਵਾਲਾ 24ਵਾਂ ਕਲੱਬ ਬਣ ਗਿਆ।