ਹੁਣ ਹਰ ਮੁਕਾਬਲਾ ਨਾਕਆਊਟ ਵਰਗਾ, ਸਮੂਹਿਕ ਤੌਰ ’ਤੇ ਬਿਹਤਰ ਪ੍ਰਦਰਸ਼ਨ ਕਰਨਾ ਪਵੇਗਾ : ਬਦਾਨੀ

ਨਵੀਂ ਦਿੱਲੀ– ਦਿੱਲੀ ਕੈਪੀਟਲਸ ਦੇ ਕੋਚ ਹੇਮਾਂਗ ਬਦਾਨੀ ਨੇ ਚੇਨਈ ਸੁਪਰ ਕਿੰਗਜ਼ ਵਿਰੁੱਧ ਮੈਚ ’ਚ ਮਿਲੀ 8 ਵਿਕਟਾਂ ਦੀ ਕਰਾਰੀ ਹਾਰ ਤੋਂ ਬਾਅਦ ਕਿਹਾ ਕਿ ਟੀਮ ਨੂੰ ਮੌਜੂਦਾ ਸਥਿਤੀ ਤੋਂ ਉੱਭਰਨ ਲਈ ਸਮੂਹਿਕ ਤੌਰ ’ਤੇ ਬਿਹਤਰ ਪ੍ਰਦਰਸ਼ਨ ਕਰਨਾ ਪਵੇਗਾ ਤੇ ਹੁਣ ਹਰ ਮੁਕਾਬਲਾ ਲੱਗਭਗ ਨਾਕਆਊਟ ਵਰਗਾ ਹੋ ਗਿਆ ਹੈ।

ਪਹਿਲਾਂ ਬੱਲੇਬਾਜ਼ੀ ਦਾ ਫੈਸਲਾ ਕਰਨ ਤੋਂ ਬਾਅਦ ਦਿੱਲੀ ਕੈਪੀਟਲਸ ਨੇ ਮੰਗਲਵਾਰ ਨੂੰ ਇੱਥੇ 12 ਓਵਰਾਂ ’ਚ 69 ਦੌੜਾਂ ਤੱਕ 5 ਵਿਕਟਾਂ ਗੁਆ ਦਿੱਤੀਆਂ ਸਨ। ਟੀਮ ਨੇ ਹਾਲਾਂਕਿ ਖਰਾਬ ਸ਼ੁਰੂਆਤ ਤੋਂ ਉੱਭਰਦੇ ਹੋਏ 7 ਵਿਕਟਾਂ ’ਤੇ 155 ਦੌੜਾਂ ਬਣਾਈਆਂ ਪਰ ਚੇਨਈ ਸੁਪਰ ਕਿੰਗਜ਼ ਨੇ ਸੰਜੂ ਸੈਮਸਨ ਦੀ 52 ਗੇਂਦਾਂ ’ਚ ਅਜੇਤੂ 87 ਦੌੜਾਂ ਦੀ ਪਾਰੀ ਦੀ ਬਦੌਲਤ 17.3 ਓਵਰਾਂ ’ਚ ਹੀ ਆਸਾਨੀ ਨਾਲ ਟੀਚਾ ਹਾਸਲ ਕਰ ਲਿਆ।

ਇਸ ਹਾਰ ਨਾਲ ਟੀਮ ਲਈ ਪਲੇਅ ਆਫ ’ਚ ਜਗ੍ਹਾ ਬਣਾਉਣ ਦੀ ਰਾਹ ਮੁਸ਼ਕਿਲ ਹੋ ਗਈ ਹੈ। ਟੀਮ ਨੂੰ ਇਸ ਦੇ ਲਈ ਆਪਣੇ ਬਚੇ ਹੋਏ ਚਾਰੋਂ ਮੈਚਾਂ ’ਚ ਜਿੱਤ ਦਰਜ ਕਰਨੀ ਪਵੇਗੀ। ਬਦਾਨੀ ਨੇ ਕਿਹਾ, ‘‘ਹੁਣ ਮਾਮਲਾ ਨਾਕਆਊਟ ਵਰਗਾ ਹੈ, 4 ਮੈਚਾਂ ’ਚੋਂ ਚਾਰੇ ਹੀ ਜਿੱਤਣੇ ਪੈਣਗੇ। ਡ੍ਰੈਸਿੰਗ ਰੂਮ ’ਚ ਸਾਰੇ ਖਿਡਾਰੀ ਸਥਿਤੀ ਤੋਂ ਜਾਣੂ ਹਨ ਤੇ ਹੁਣ ਪ੍ਰਦਰਸ਼ਨ ਕਰ ਕੇ ਟੀਚਾ ਹਾਸਲ ਕਰਨਾ ਹੀ ਇਕਲੌਤਾ ਬਦਲ ਹੈ। ਸਮੂਹਿਕ ਤੌਰ ’ਤੇ ਬਿਹਤਰ ਪ੍ਰਦਰਸ਼ਨ ਕਰਨਾ ਪਵੇਗਾ।’’

ਉਸ ਨੇ ਕਿਹਾ, ‘‘ਅਸੀਂ ਲਗਾਤਾਰ ਚੰਗਾ ਪ੍ਰਦਰਸ਼ਨ ਨਹੀਂ ਕਰ ਪਾ ਰਹੇ ਹਾਂ। ਕਦੇ ਗੇਂਦਬਾਜ਼ੀ ਚੰਗੀ ਹੁੰਦੀ ਹੈ, ਬੱਲੇਬਾਜ਼ੀ ਨਹੀਂ ਤੇ ਕਦੇ ਇਸ ਦਾ ਉਲਟ। ਇਸ ਪੱਧਰ ’ਤੇ 60-70 ਫੀਸਦੀ ਖਿਡਾਰੀਆਂ ਦਾ ਯੋਗਦਾਨ ਜ਼ਰੂਰੀ ਹੈ, ਜਿਹੜਾ ਅਜੇ ਨਹੀਂ ਹੋ ਪਾ ਰਿਹਾ।’’