ਹਾਰਦਿਕ ਨਾਲ ਕੋਈ ਮੁਕਾਬਲਾ ਨਹੀਂ, ਸਾਡਾ ਟੀਚਾ ਭਾਰਤ ਲਈ ਮੈਚ ਜਿੱਤਣਾ : ਵਿਜੇ ਸ਼ੰਕਰ

ਨਵੀਂ ਦਿੱਲੀ : ਵਿਸ਼ਵ ਕੱਪ ਲਈ ਭਾਰਤੀ ਕ੍ਰਿਕਟ ਟੀਮ ਵਿਚ ਜਗ੍ਹਾ ਪਾਉਣ ਵਾਲੇ ਆਲਰਾਊਂਡਰ ਵਿਜੇ ਸ਼ੰਕਰ ਨੇ ਕਿਹਾ ਕਿ ਉਹ ਪਲੇਇੰਗ ਇਲੈਵਨ ਵਿਚ ਜਗ੍ਹਾ ਬਣਾਉਣ ਲਈ ਹਾਰਦਿਕ ਨਾਲ ਮੁਕਾਬਲੇਬਾਜ਼ੀ ਨਹੀਂ ਕਰ ਰਹੇ ਅਤੇ ਜੇਕਰ ਕਿਹਾ ਗਿਆ ਤਾਂ ਉਹ ਚੌਥੇ ਨੰਬਰ 'ਤੇ ਵੀ ਬੱਲੇਬਾਜ਼ੀ ਕਰਨ ਲਈ ਤਿਆਰ ਹਨ। ਤਾਮਿਲਨਾਡੂ ਦੇ ਇਸ ਆਲਰਾਊਂਡਰ ਖਿਡਾਰੀ ਨੇ ਨਿਊਜ਼ੀਲੈਂਡ ਦੌਰੇ 'ਚੇ ਕਾਫੀ ਪ੍ਰਭਾਵਿਤ ਕੀਤਾ ਜਿਸ ਤੋਂ ਬਾਅਦ ਉਹ ਚੌਥੇ ਨੰਬਰ 'ਤੇ ਬੱਲੇਬਾਜ਼ੀ ਕਰਨ ਲਈ ਸੰਭਾਵਿਤਾਂ ਵਿਚ ਸ਼ਾਮਲ ਹਨ। ਸ਼ੰਕਰ ਦੇ ਖੇਡਣ ਦਾ ਤਰੀਕਾ ਪੰਡਯਾ ਤੋਂ ਬਿਲਕੁਲ ਅਲੱਗ ਹੈ ਅਤੇ ਸ਼ਾਇਦ ਇਸ ਲਈ ਉਸ ਨੂੰ ਲਗਦਾ ਹੈ ਕਿ ਉਹ ਪੰਡਯਾ ਨਾਲ ਕਿਸੇ ਦੌੜ ਵਿਚ ਸ਼ਾਮਲ ਨਹੀਂ ਹਨ।

ਸ਼ੰਕਰ ਨੇ ਮੀਡੀਆ ਨੂੰ ਦਿੱਤੇ ਇੰਟਰਵਿਊ ਵਿਚ ਕਿਹਾ, ''ਮੈਨੂੰ ਨਹੀਂ ਲਗਦਾ ਕਿ ਮੈਂ ਪੰਡਯਾ ਨਾਲ ਮੁਕਾਬਲਾ ਕਰ ਰਿਹਾ ਹਾਂ, ਉਹ ਕਮਾਲ ਦਾ ਕ੍ਰਿਕਟਰ ਹੈ। ਹਾਂ ਅਸੀਂ ਦੋਵੇਂ ਆਲਰਾਊਂਡਰ ਹਾਂ ਪਰ ਇਕ-ਦੂਜੇ ਤੋਂ ਵੱਖ ਹਾਂ। ਸਾਨੂੰ ਮੁਕਾਬਲਾ ਕਰਨ ਦੀ ਜ਼ਰੂਰਤ ਕਿਊਂ ਪਵੇਗੀ। ਜੇਕਰ ਅਸੀਂ ਦੋਵੇਂ ਦੇਸ਼ ਦੀ ਜਿੱਤ ਵਿਚ ਭੂਮਿਕਾ ਨਿਭਾ ਸਕੇ ਤਾਂ ਇਹ ਸ਼ਾਨਦਾਰ ਹੋਵੇਗਾ।'' ਸ਼ੰਕਰ ਅਤੇ ਪੰਡਯਾ ਦੋਵੇਂ ਵੱਡੇ ਸ਼ਾਟ ਖੇਡਣ ਲਈ ਜਾਣੇ ਜਾਂਦੇ ਹਨ ਪਰ ਪੰਡਯਾ ਜਿੱਥੇ ਤਾਕਤ ਦਾ ਇਸਤੇਮਾਲ ਕਰਦੇ ਹਨ ਤਾਂ ਉੱਥੇ ਹੀ ਸ਼ੰਕਰ ਟਾਈਮਿੰਗ 'ਤੇ ਜ਼ਿਆਦਾ ਨਿਰਭਰ ਰਹਿੰਦੇ ਹਨ। ਸ਼ੰਕਰ ਨੇ ਕਿਹਾ ਕਿ ਮੈਨੂੰ ਵੱਡੇ ਛੱਕੇ ਲਗਾਉਣਾ ਪਸੰਦ ਹੈ। ਮੇਰੇ ਲਈ ਲੈਅ ਵਿਚ ਬਣੇ ਰਹਿਣਾ ਜ਼ਰੂਰੀ ਹੈ। ਜਦੋਂ ਮੈਂ ਤਾਕਤ ਦਾ ਇਸਤੇਮਾਲ ਕਰਦਾ ਹਾਂ ਤਾਂ ਜ਼ਿਆਦਾਤਰ ਕਾਮਯਾਬ ਨਹੀਂ ਹੁੰਦਾ ਪਰ ਜੇਕਰ ਟਾਈਮਿੰਗ ਚੰਗੀ ਹੁੰਦੀ ਹੈ ਤਾਂ ਗੇਂਦ ਦਰਸ਼ਕਾਂ ਦੀ ਗੈਲਰੀ ਵਿਚ ਜਾਂਦੀ ਹੈ।